Nrpakxmrlz Kx Yr
Matiu
Natq Ngr Nzaplxtqngr Mz Nrpakxmrlz Kx Yr Matiu
Aposol Matiu, mrlx Alfizs yrle buk lc. Kzdq kz drtqde Livae. Mzli kc Jiszs tqkqle-ngrde nide mz nzprtr-krde mz ncblo nedeng, nide ncblo kxatakqti takes mrkc Kzpznizm. Lr Jiu kcng nzokatrlr lr Rom mz nzatakqti-krdr takes nztrkalrngr kztedrng. Murde nzokatrlr lr Rom kcng tzngi enqmi r lr Jiu mz nzaclve-krdr kandre nyzdr. X kxnzatakqting takes kxnzkqlung nzangqngutitrlr leplz nedrng x nzryrlqtrpzng trau namyaszlzle trau kx pi gzpman ngr lr Rom. X nzyrlqtxpxlr krkc tqyctrpz nangi scdr. Matiu mz nzvz-nqblq-krde Jiszs, aelwapx-ngrmle bagu kx Jiszs sa na-abrtzlvzle doa kznike tekqtrle nqmq nr drtwrde mz nzlxngiti-krde nide, kxmule-esz' alwx ngrdeng nzkqlung.
Nzryrngrkxtr Kc Kai rpile kx Mevalu Kxnzmcpx navzpxm mz nqvi lr King Devet. Nzryrkr Matiu melrmqng Jiszs aelwapx-ngrmle kx Jiszs vzpxm mz nqvi lr Devet. A' drtq kcng tqyr Matiu bletipxng mz buk sc Luk. Mc natq kxtopwz mz Matiu 1:1, 17
Mwx Matiu yrle buk lc mz mzlir yiz 45—68 AD mz nibr nzrmcngr mz Jiszs. Yrbzle buk lc mz kztedeng lr Jiu, mz nzaelwapx-krbzle badr kx Jiszs nide Kxnzmcpx x King kc tqesalz-ngrbz Gct kx sa na-atwzlr-ngrbzle badr, mz nzngini-krdr leplz nedeng. Mz nzmu-krde lcde, yr Matiu kzdung natq mz Nzryrngrkxtr Kc Kai, kcng tqangidatipeng Jiszs. Nrpakxmrlz kcng pwx nzbletipx-lxblrng mz kxmu nzaelwapx-krmlr Jiszs bagu. Murde Mak okatrle nigu nzkrlz-krgu kx Jiszs nide Kxnzawz ne Gct. Mz buk sc Luk, Jiszs nide Mrlx Leplz, x mz buk sc Jon nide Mrlx Gct. X mz buk sc Matiu, Jiszs nide Mevalu Kxnzmcpx x King kc tqesalz-ngrbz Gct na-atwzlr-ngrbzle mz leplz nedeng, lr Jiu. X ni-kzde profet kc tqapule Mosis mz nzmncti-krdr rlilrdr mz kzdq newz zbq kx nzpnu-pwx, x nzrsakrlrng rlilrdr mz nzalvztr-krdr mz Loukxtr sc Gct.
Mrkcng Mz Buk Lc
Jiszs alvztr-ngrde leplz mz nqmq kr doa neng Gct, mzli kc tzmnco-ngrmlr mz nra. [5—7]
Ycmne-ebzpx-ngrde kxmu nzmnclz-ngrbz mz Gct mz nzngini-krde King. [dckrlzde 13]
Alvztr mz Newz ngr Nc Olivi, mz nzycmnetr-krde mzli kc nayzlu-mou-ngrmle, mz nzrpipx-krde krkcng nztubqng x krkcng nzvz-rbrng. [24—25]
Jiszs kabzle nzwzngr kxmyapx mz nzokatrngr leplz x nzalvztrngr nidr mz nzvz-nqblq-krdr nide. [28:18-20]
1
Melrmqng Jiszs
1 Krlc nzryapwxtrngr mz be ngr melrmqng Jiszs Kxnzmcpx. Jiszs Kxnzmcpx vzpxm mz nqvi lr King Devet, x King Devet vzpxm mz nqvi lr Ebraam.
2 Ebraam mrlxde Aesak,
x Aesak mrlxde Jekop.
Jekop lc mrlxde Judz nidr badr mzledeng kcng nzpnu-esz'-nrade-esz', (kcng tzvzpx-ngrmqng nqvi lr ncblo kcng nzpnu-esz'-nrade-li (12) Israel, kc tqngi kzdq drtq Jekop).
3 Judz mrlxde Peres x Seera, lxedr kxtrngiulrJiu, drtqde Tama.
Peres mrlxde Hesron,
x Hesron mrlxde Ram.
4 Ram mrlxde Aminadab,
Aminadab mrlxde Nason,
x Nason mrlxde Salmon.
5 Salmon mrlxde Boas. Boas lc lxede drtqde Reab, kxtrngiulrJiu.
X Boas mrlxde Obed, x lxede drtqde Rut, kxtrngiulrJiu kz, murde vzkimle mz drtc' ngr Moab.
X Obed mrlxde Jesi.
6 Jesi lc, mrlxde King Devet.
7 Devet x Batsibz mrlxdr King Solomon. Batsibz nide kc tqngi kai olvz ngr Yuriz mzli kc trnznibqka-ngrde.
Solomon mrlxde Reoboam.
X Reoboam mrlxde Abaeja.
X Abaeja mrlxde Asa.
8 Asa mrlxde Jeosafzt.
X Jeosafzt mrlxde Jehoram.
Yusaea melrmqde Jehoram.
9 Yusaea mrlxde Jotam.
Jotam mrlxde Eas.
Eas mrlxde Hesekaea.
10 Hesekaea mrlxde Manase.
Manase mrlxde Amon.
X Amon mrlxde Josaea.
11 Jekonaea nidr badr mzledeng, melrmqdr Josaea. Mz mzli nyz mzle-lzbq lcng, nide kc tzrtulrtr-ngrbz mz lr Israel nzvz-krdr Bxbilon mz nzngini-krdr kxnzawz-nrbalqng elr.
12 Mz nibr nzrvzmingr lr Israel Bxbilon,
Jekonaea mrlxde Sealtil,
Serubabel melrmqde Sealtil.
13 Serubabel mrlxde Abiud.
Abiud mrlxde Eliakim,
x Eliakim mrlxde Aso.
14 Aso mrlxde Sadok.
Sadok mrlxde Akim.
X Akim mrlxde Eliud.
15 Eliud mrlxde Eliesa,
Eliesa mrlxde Matan
x Matan mrlxde Jekop.
16 Jekop mrlxde Josip,
Josip lc yrlztile Mxri, kc tqngi lxede Jiszs, kc tzrpibz Kxnzmcpx.
17 Nzmu narlwxq nrpr ngr leplz lcng, yzuo mz mzli nyz Ebraam, krlzbzle King Devet, e nrpr ngr leplz nzpnu-esz'-nrade-pwx. X yzuo mou, mz mzli nyz King Devet krlzbzle mzli kc lr Israel tzapusr-ngrdr kxnzawz-nrbalqng mrkc Bxbilon, nrpr ngr leplz krlz-mopwzle kx nzpnu-esz'-nrade-pwx. Yzuo mou, mzli lc x sc tqkrlzpebzle mzli kc tzrmcngr mz Jiszs Kxnzmcpx, nrpr ngr leplz nzpnu-esz'-nrade-pwx mou.
Nzrmcngr Mz Jiszs
18 Krlc be ngr nzrmcngr mz Jiszs Kxnzmcpx. Kzdq kc nzyrlzngr nzatubqtibz mz mzlir Mxri kc tqngi lxede x kzdq ncblo drtqde Josip. Josip xpepxpele Mxri mz nzyrlzngr. Kxmule-esz' Mxri trnzmwi-lxblrkang mz Josip, a' yrpe kai mz zmatq ngr Mqngrkxtr.
19 Kx adcpxbz Mxri nzyrpe-krde mz Josip, Josip aotitx pnz drtwrde nzaxtx-krde Mxri, murde nide ncblo kx mnc-nqblq-zvzle Lou sc Mosis. A' rpile na-ale-kapqle murde ma tqamyabzle drtq Mxri mz nzobqkr leplz kxkqlu.
20 Mzli kc tqaotipengr drtwrde da lcng, kzdq enjrl ne Gct adcpx-lzbqbz bade mz nzrmwible-krde, rpibzle bade kx, “Josip, bzkq mwxlrq nztwz-krm Mxri nzngini-krde olvz rm. Murde nim nqvi lr King Devet, x doa la tqyr-ngrde ngi-batrpz Mqngrkxtr, a' trngiu ncblo.
21 Sa narmc mz doa x napibzme drtqde Jiszs, kc drtwr ngrde Yawe arlapx, murde sa na-arlapxle leplz mz nzbz-krdr mz alwx ngrdrng.”
22 Krlc atutrle natq kc tqpibz Yawe mz profet Asaea mz nzrpi-krde kx,
23 “Kzdq doa olvz kxmnc-kamelr, narngine doa ncblo, x drtqde narpibz Imanuel,” kc drtwr ngrde Gct mncm bagu.
24 Zbz Josip dwalzm x sc tqyrlztipele Mxri, da kc tqwai nzpi-krbz enjrl kc le bade.
25 A' Josip trmwimileu Mxri vz, vz, x krlzbzle mzli kx nzrmcngr mz doa nede. X yrlq-kzpz Josip drtqde Jiszs.