Ebbaluŋa endaayi eya
Yowaane
Enyanjula
Ebbaluŋa ya Yowaane yino, Yowaane owaali omuhwenda wa Yesu njʼowayiŋandiiha, ŋagati wʼomwaha ogwʼataanu nʼecikumi oluvanyuma lwʼohusaaliwa hwa Kurisito. Yowaane saalaga ati njʼowaŋandiiha ebbaluŋa yino aye esuula endaayi yiraga yiiti ebi gaŋandiiha gabyeboneraho nʼemoni jije omwene (1:1-3). Abahugu mu byʼEbbayibbuli baŋeega baati Yowaane gaŋandiiha ebbaluŋa yino nʼali mu hibuga Efeeso. Yowaane omwene oyo njʼowaŋandiiha ebbaluŋa endaayi nʼeyohubiri ko nʼeyohudatu eja Yowaane.
Yowaane gaŋandiihira abafugiirira Kurisito bosibosi ebbaluŋa yino. Mu hiseera ehyo, abafugiirira Kurisito baali nʼebigosi ohuŋwa mu basomesa abʼobudulingi. Abasomesa abo baali bafugiirira baati Yesu gaali mu butuufu Hatonda aye sigaali muutu nʼali nʼomubiri nʼamafugi. Cʼehifa Yowaane aloma ati geboneraho Yesu nʼemoni jije era gamuŋambaho nʼengalo jije (1:1-3).
Ebiri mu bbaluŋa yino mu buupi
1. Hirala hu bigendererwa byʼohuŋandiiha ebbaluŋa yino (1:1-4)
2. Hatonda njʼenjase era huli nʼohugenda ngʼolu Yesu gagendanga (1:5–3:10)
3. Ehiragiro hyʼohwendananga (3:11–5:12)
4. Engohoba (5:13-21)
1
Hibono aleeta obulamu obutaŋwaŋo
1 Hubaŋandiihira ebifa hu Hibono aleeta obulamu obutaŋwaŋo era owaaliŋo ko batonde ehyalo. Hibono oyo, efe hwaŋulira ebibono ebi galoma, hwamubona era hwamwetegeeresa hwahena hwamuŋambaho nʼengalo jeefe. Ehyo cʼehigira hubuulira Amaŋuliro Amalaŋi agamuŋambaho.
2 Hatonda gahwehula Hibono aleeta obulamu obutaŋwaŋo, hwamubonaho era huli bajulizi. Hubalomera hu biŋamba hu bulamu obutaŋwaŋo, obu muutu oyo owaŋwa eyiri Semwana gatwehwehulira.
3 Hubalomera hu oyo oyu hweboneraho nʼemoni jeefe era oyu hwaŋulira nʼatulabbira omwene, ko mwesi musobole ohutweŋimbaho mu huba bulala ni Hatonda Seefe ko nʼOmwana wuwe, Yesu Kurisito.
4 Hubaŋandiihira ebiitu bino mwaheega ko hwesihwesi hube basangaafu bugali weene.
Hugenderenga mu njase
5 Buno njʼobuhwenda obuhwaŋulira ohuŋwa eyiri Yesu Kurisito era hubalomera huuti; Hatonda ali hyʼenjase emulihira abaatu era mu ye muŋuma hiirema hyosihyosi.
6 Singa huloma huuti huli bulala ni Hatonda aye ni hugendera mu hiirema, aŋo huba hudulinga era huba sihugendera mu mazima.
7 Aye singa hugendera mu njase ngʼolu niye ali hyʼenjase, ehyo hituleetera ohuba bulala nʼabahyefe era amafugi ga Yesu Omwana wuwe gatwogaaho ebibi byefe byosibyosi.
8 Singa huloma huuti huŋuma hibi, huba hwedulinga hwabeene era huba huŋuma mazima.
9 Aye hunafugiirira huuti huli nʼehibi, Hatonda asala emisango nʼatehubbira era omwesigwa, aja hutusoniŋa ahene atugwalaase.
10 Singa huloma huuti sihuholangaho hibi hyosihyosi, humufuula ohuba mudulingi era ehibono hihye hiba sihiŋuga bulamu weefe.