8
Basihiirisa ehibuga Ayi
1 Nga Musengwa aloma Yoswa ati, “Simbuha nʼabasirikale babo bosibosi mutiine mulumbe ehibuga Ayi. Otatya, guma. Nja huhuŋangusa habaha wa Ayi nʼabaatu babe nʼehibuga ko nʼehyalo hihye bija huba bibyo.
2 Ebi waahola ehibuga Yeriko ni habaha waamo njʼehi obe nʼohola ehibuga Ayi ni habaha waamo. Aye hu mulundi guno ebiitu nʼebyayo byawe byosibyosi muja hubyesigahisa. Mulumbe ehibuga ehyo ni muhiŋwera egongo.”
3 Ngʼaŋo Yoswa nʼabasirikale bosibosi batiina balumba ehibuga Ayi. Gatobola abasirikale abʼamaani emitwalo edatu, ngʼabasindiha batiina owiire.
4 Ngʼabaŋa ebiragiro ati, “Mupulirise bulaŋi. Mutiine mweteege egongo wʼehibuga, ne mutahiba ŋaleeŋi era mwesimwesi mube butebute.
5 Ese nʼabasirikale huja hulumba ehibuga. Aye abasirikale ba Ayi ni baja huŋwayo ohutulumba ngʼolu baahola hu ludaayi, huja hubaduluma.
6 Baja hutubbinga ohwola olu baja huba ŋaleeŋi nʼehibuga ni baŋeega baati huli hubaduluma ngʼolu hwahola hu ludaayi. Aŋa huja hubemululiraho,
7 aŋo enywe paŋa muli nʼohuŋwerayo mu hyehwehere, mutiine muŋambe ehibuga. Musengwa Hatonda wenywe aja huhibaŋa.
8 Ni muhenire ohuŋamba ehibuga, muhiŋwanangaho omuliro. Muhole ehi Musengwa alagiiye. Era mubone muuti muhola ebi mbalomire.”
9 Ngʼaŋo Yoswa abasimbula batiina ohweteega ŋagati wa Bbeseeri ni Ayi ebugwalyuba wa Ayi. Aye Yoswa gasigala nʼabaatu abaali ni basigaaye mu kambi owiire obwo.
10 Nga mu mugamba pwipwipwi Yoswa ahumbaania abasirikale babe. Era nga omwene nʼabatangirisi ba Yisirayiri babatangirira ohulumba ehibuga Ayi.
11 Abasirikale bosibosi aba gaali ni nabo nga baniinaniina batiina boola mu moni wʼehibuga, ehiiho ni hiri njʼehyabula ŋagati waawe ni Ayi.
12 Yoswa gaali atiinire nʼabasirikale ekumi etaanu, ni beteegire ebugwalyuba wʼehibuga ŋagati wa Bbeseeri ni Ayi.
13 Nga bata abasirikale mu bifo ebyenjabulo ngʼehibinje ehibbala hiba mu maniino gʼehibuga nʼeŋe erindi ni liri ebugwalyuba wʼehibuga. Owiire obwo Yoswa gatiina mu hiiho.
14 Habaha wʼehibuga Ayi ni gabona abasooli ba Yoswa, genyoheramo nʼabasirikale babe bosibosi batiina ena hiiho hyʼe Yoludaani ohusoola nʼAbayisirayiri mu hifo ehyene hira ehi basooleramo oludaayi. Aye sigamanya ati baali bamweteegire enyuma.
15 Yoswa nʼAbayisirayiri bosibosi beholesa oti hani baduluma, baluŋama mu lulafu.
16 Abatangirisi bomu hibuga Ayi balanga abasirikale baawe bosibosi baŋwerehereramo ohubbinga Yoswa. Yoswa gabaŋubania oti hani abaduluma ngʼabaŋira ŋaleeŋi nʼehibuga.
17 Ŋaŋumaŋo musirikale owasigala mu Ayi oba Bbeseeri, bosibosi batiina ohubbinga Abayisirayiri. Baaleha emiryango jʼehibuga ni jiri miigule ni ŋaŋuma mu huumi.
18 Ngʼaŋo Musengwa aloma Yoswa ati, “Sosya efumo liryo hu hibuga Ayi olwohuba nja huhiŋaayo mu mihono jijo.” Nga Yoswa ahola ngʼolu bamuloma.
19 Ni gahena ohusosya hu hibuga efumo, ngʼaŋo ni naaŋo abasirikale abaali ni behwehire benyoheramo baduluma beyoŋa mu hibuga bahiŋamba. Era amangu ago nga bahiŋwanaho omuliro.
20 Abasirikale bomu Ayi ni baheja enyuma balengera eriisi ni liduunya ohuŋwa mu hibuga, byabasobera ni ŋaŋuma ŋa hudulumira olwohuba Abayisirayiri abaali ni badulumira ena lulafu, bacuuhaŋo babalumba.
21 Yoswa nʼAbayisirayiri bosibosi ni baabona baati abahyawe baŋambire ehibuga era bahiŋwanireeho nʼomuliro, nga bacuuha batagiha ohwita abasirikale ba Ayi.
22 Abayisirayiri abandi abaali mu hibuga, nga boosi batula babalumba. Nga bata aba Ayi ŋagati, babeswanigirisa hu njuyi jombi. Abayisirayiri bababulungula era ŋaŋuma wayire mulala owaŋona.
23 Aye baŋamba habaha wʼe Ayi mulamu nga bamuŋirira Yoswa.
24 Abayisirayiri ni bahena ohwita abasirikale ba Ayi abaali mu lulafu eyi baali ni badulumiiye era ni baali ni bahenire ohwita hiisi muutu hu bo, bagamayo mu hibuga Ayi nga beeta hiisi muutu owaalimo.
25 Abahasi nʼabasinde abaafa hu ludaalo olwo mu Ayi baali omutwalo mulala nʼekumi ebiri, eŋuma muutu wayire mulala owasigala.
26 Yoswa geyongera ohulengeresa efumo lirye ehibuga Ayi ohwola olu bahena ohwita hiisi owaali nʼahimenyamo.
27 Era Abayisirayiri baŋira ebyayo nʼebiitu ebindi ohuŋwa mu hibuga ngʼolu Musengwa galagira Yoswa.
28 Yoswa goohya ehibuga Ayi hyasigala mungo ya maŋuupu era hyaba gunda nʼohwola hatyane.
29 Geeta habaha wʼe Ayi gaahena gaŋaniha omulambo gugwe hu musaala era gagulehaho ohwola ehyʼegulo. Eryuba aŋa ligwira mu maaji, Yoswa galagira baŋanula omulambo ogwo bagudaanye ŋa mulyango ogwingira mu hibuga. Nga bahena bagubungihaho emungo yʼamabaale era yihiiriŋo nʼohwola hatyane.
Bahola endagaano bunyaaha hu lusozi Ebbali
30 Ebyo ni byaŋwa, nga Yoswa atongolera Musengwa Hatonda wa Yisirayiri ehituuti hu lusozi Ebbali
31 ngʼolu Musa omuŋeeresa wa Hatonda galagira Abayisirayiri. Gahitongola nʼatiinira hu ndagiriro eyiri mu hitabo hyʼAmagambi aga Hatonda gaaŋa Musa eyiroma yiiti, “Babbotanga ehituuti mu mabaale amahwiye agabatahubbire nʼehyoma hyosihyosi.” Hu hituuti ohwo baŋeerangaho Musengwa eŋongo eyi bohya ehwiye lyaguguliha nʼeŋongo eyi baŋayo olwʼohufaaŋana.
32 Ni baali eyo, Abayisirayiri bosibosi bahumbaana, ngʼaŋo ni naaŋo mu moni jaawe Yoswa agobolamo ohuŋandiiha amagambi aga Hatonda gaaŋa Musa.
33 Abayisirayiri bosibosi nʼabaatu abahulu mu gwanga nʼabahungu nʼabalamuzi, baali bemereeye hu njuyi jombi ejʼEsanduuku yʼEndagaano ya Musengwa ohulengerera Abaleevi abayibbeedanga. Abagwira nʼabasaale baamo baaliŋo. Abaatu abandi baali mu moni wʼolusozi Gerizimu nʼabandi mu moni wʼolusozi Ebbali. Musa omuŋeeresa wa Musengwa galagira bahole baatyo ehiseera ehyohusuna ekabi ni hyolire.
34 Oluvanyuma nga Yoswa asoma Amagambi gosigosi, ekabi nʼebiŋwabo, ngʼolu babiŋandiiha mu hitabo hyʼAmagambi.
35 Hiisi hibono ehyali mu hitabo hyʼamagambi aga Musengwa gaaŋa Musa, Yoswa gahisomera Abayisirayiri bosibosi abaali ni bahumbeene nga pomuli abahasi nʼabaana nʼabagwira abaali ni bamenya ni nabo.