13
1 Omwana omugesi ataayo omwoyo hu ebi semwana amulaabbira
aye omunyoomi saŋulira nʼolu muhangavula.
2 Omuutu omugwalaafu asuna omuhemba olwʼebibono ebiraŋi ebi aloma
aye abo abadulingi baŋemba huhuhola ebitoola.
3 Oyo owegenderesa mu ndoma ahuuma obulamu wuwe
aye oyo oweromaja hifaabi gesihiirisa omwene.
4 Omuutu omudoto safuna ehi gegomba
aye oyo owʼehyonji asuna ehi aba ni genda.
5 Omuutu omugwalaafu acaawa obudulingi
aye omuhosi wʼebibi ahola ebiswasa.
6 Esambo jʼomugwalaafu jimuŋonia
aye ehibi hyʼomubbengi himuhubbiraŋo.
7 Ŋaliŋo omuutu oweranga ohuba muŋinda atenga ko panaŋo
ne ŋabaaŋo owehosa ati mugadi
aye nga ali nʼobuŋinda buhehere.
8 Omuŋinda atambisa obuŋinda wuwe ohwenunula mu higosi
aye omugadi aŋuma ehimweralihirisa.
9 Omugwalaafu ali hyʼenjase eyimulisa hiisi ŋaatu
aye omuhosi wʼebibi ali hyʼetaala eyisimire.
10 Amalala galeeta obuyoga
aye hiraŋi ohuba omuutu aŋeeha amagesi.
11 Obuŋinda obu muutu asuna mu ngeri embi buŋwaŋo mangumangu
aye oyo abuhumbaania polapola weyongera ohwala.
12 Ohuŋuma esuubi hireetera omwoyo ohulwala
aye ehi obaaye nʼoŋembaho hinolerera hihusangaasa.
13 Oyo anyooma ebi bamubulirira aja husihiiriha
aye oyo agondera ehiragiro alisuna omuhemba.
14 Esomesa yʼomuutu omugesi yiri oti sulo eyireeta obulamu
era yireetera omuutu ohuŋwa mu mitego jʼohufa.
15 Ohusalaŋo ohulaŋi hihuleetera owende
aye abo abatali besigwa baŋambire oluguudo olutiina mu husihiiriha.
16 Omuutu omutegeefu ahena huŋeega hu hiitu ko gahihola
aye omuŋubeebe golesa obutamanya wuwe.
17 Omuhwenda omuhosi wʼebibi ahugwisa mu bugosi
aye oyo omwesigwa aleeta emiyaaya.
18 Atenda humubuulirira gafuŋala gahena gaswala
aye aleha bamunenya, asuna eŋono.
19 Omuutu asangaala singa asuna ehi abaaye nʼaŋembaho
aye abaŋubeebe sibenda hulehaŋo ebibi byawe.
20 Oyo ahola omuhumba nʼomuutu omugesi yeesi afuuha mugesi
aye oyo asyana nʼabaŋubeebe gereetera hubonaabona.
21 Ebigosi birumba abo abahosi bʼebibi
aye abagwalaafu basuna ebiraŋi.
22 Omuutu omulaŋi asuna obuŋinda obu aleeheraho nʼabejuhulu babe
aye owʼomubbengi babubungihira bagwalaafu.
23 Endimiro yʼomugadi yisobola ohwama emere nyingi
aye abatali bʼamazima sibamuganya huyirya.
24 Oyo ataŋamo mwana wuwe endabusi aba samwenda
aye owenda omwana wuwe afaayo ohumuluŋamya.
25 Omugwalaafu alya geguta
aye omuhosi wʼebibi asiiba nʼali njala.