4
Amagesi njʼehihulu mu byosibyosi
1 Baana bange muŋulirisenga ebi senywe abasomesa.
Mutengayo omwoyo ko mwahasuna ohutegeera.
2 Ebi mbasomesa biraŋi
olwʼehyo mutabiŋwangaho.
3 Ni naali ni kiiri mu nyumba ya laata yange ni kiiri museere muŋere
era ni ndi mulala hu maayi yange,
4 bbaabba gaasomesanga ni gandoma ati,
“Nʼonahuumenga ebiragiro byange mu mwoyo gugwo oja huwangaala.
5 Nenda obe mwana alimo amagesi era ategeera
siwibiriranga bibono ebi kuloma era sobiŋwangaho.
6 Solehanga magesi olwohuba gaja huhuhuuma
era yendanga ohuba nʼamagesi, gaja huhulabirira.
7 Ohusuna amagesi njʼehiitu ehisinga obuhulu mu byosibyosi.
Wayire hihuŋiraho ebiitu byosibyosi aye ofubanga wagasuna.
8 Yendanga amagesi galihugulumisa waaba wʼamaani bugali
gafumbetererenga galihuŋeesa eŋono.
9 Amagesi galihutwihira engule eyʼeŋono
gaja huhuŋeesa engule eyʼobuŋoono.”
10 Mwana wase ŋulirisanga ebibono ebi kuloma,
oja huwangaala.
11 Kuluŋamya mu ngira ayʼamagesi
era kulaga engira enduŋamu.
12 Nʼonabenga nʼogenda
sooja hwegumula
sooja hwetega nʼoduluma.
13 Ŋira esomesa yange ngʼehihulu
soyiŋwangaho, oyihuumanga bulaŋi olwohuba njʼobulamu wuwo.
14 Otaholanga ebi bahosi bʼebibi bahola
oba ohugenderanga mu magira gʼabahola ebibi.
15 Ehyo ohyebayanga era soholanga hya nibo
otagenderanga ŋalala nʼabaatu hyʼabo,
16 olwohuba abahosi bʼebibi sibaŋenyuha ni bataholire bibi,
sibaŋenyuha ohutusaho ni bakohiise omuutu.
17 Ebi balya nʼebi banywa mbebyo
ebi baba ni basunire mu hutemula abahyawe.
18 Aye ekola yʼabagwalaafu yiri hyʼohwanuuha hwʼeryuba ni litandihirisa ohuŋwayo,
enjase yitiina ni yeyongera hweyongera ohwola olu guba mu muusi tangalwe.
19 Ne ekola yʼabahosi bʼebibi yiri hyʼehiirema ehiŋambire oti ngu ngu ngu
sibamanyire ehi begumulaho.
20 Mwana wase, taayo omwoyo hu ebibono byange
ŋuliirisa ebi ndoma.
21 Bitahuŋwanga mu biŋeego
obihuumanga hu mwoyo gugwo,
22 olwohuba bireeta obulamu eyiri abo ababitegeera
era bulesi eyiri omubiri gwʼomuutu.
23 Mu byosibyosi, huumanga omwoyo gugwo
olwohuba njʼesimuho yʼobulamu.
24 Yeŋalamenga ohuloma ebyakalebule,
weŋalenga ohuloma ebi otamanyireho mutwe nʼamagulu.
25 Luŋamya emoni eyi oba nʼotiina,
yegumyenga ohulengerera mu moni eyi oja.
26 Teresanga amagendere gago gabe maluŋamu
era ogumirenga ohuhola ebiitu ebiraŋi.
27 Otasagasagananga,
leheraŋo ohuhola ebiitu ebicaamu.