103
Ya Dawudi.
1 Omwoyo gwange gwebase Musengwa,
hiisi ehiri mu ese hyebase esiina lirye eryawufu.
2 Omwoyo gwange gwebase Musengwa
era gutebirira ebiraŋi ebi ahola.
3 Asoniŋa ebibi bibyo byosibyosi
era ahuŋonia obulwaye wuwo wosiwosi.
4 Ahununula ohuŋwa mwiroŋo,
gahulaga ohwenda nʼehyere.
5 Ahuŋa ebiraŋi bingi, wasigala nʼohiiri muŋere
nʼoli nʼamaani hya haŋungu.
6 Musengwa wʼamazima musala eyʼemisango
era agayira abo ababanyigirisa nʼatehubbira.
7 Gahwehulira Musa etegeha yiye,
era galaga Abayisirayiri ebikolwa bibye ebyʼamaani.
8 Musengwa ali nʼehisa nʼehisasabirisi,
alwaŋo ohusunguŋala era ali nʼohwenda ohubitiirifu.
9 Saaja huba mu hwoloobyanga hiisi hiseera
oba ohusidihirira obusungu hu mwoyo emirembe nʼemirembe.
10 Satuhangavula ngʼolu hyahali ni hisaana olwʼebibi byefe
era satwegalula ni geema hu hubbenga hwefe.
11 Ngʼolu egulu liri ŋaleeŋi nʼehyalo,
nʼohwenda huhwe huutyo hubitiirifu eyiri abo abamutya.
12 Ngʼolu ebuŋwalyuba yiri ŋaleeŋi bugali nʼebugwalyuba,
atyo po atutusaho ebibi byefe gaabita ŋaleeŋi ni neefe.
13 Ngʼolu omusaaye aŋambira abaana babe ehisa,
ni Musengwa yeesi po aŋambira abo abamutya ehisa.
14 Hiri hiityo olwohuba amanyire ngʼolu gatuwumba,
ahebulira ati gatuwumba ohuŋwa mu fuuhe.
15 Obulamu wʼomuutu buli hyʼenyaasi,
ali hyʼehimuli ehiŋotoha ehiseera hyosihyosi.
16 Embeŋo ehifuuŋa nga hikukumuha
era ŋaŋuma alihebulira aŋa hyali.
17 Aye ohuŋwa ahale nʼahale Musengwa genda abo abamutya
era mulaŋi eyiri abejuhulu nʼebijuhulu,
18 abo abahuuma endagaano yiye
era bagondera ebiragiro bibye.
19 Musengwa atongohiise etebe eyʼobuŋugi buwe mwigulu
era aŋuga emirembe nʼemirembe.
20 Mweyaase Musengwa enywe abamalayika abasooli abʼamaani abahola ebi genda,
abagondera ehibono hihye era mwaŋulirisa ebi aloma.
21 Mweyaase Musengwa enywe eŋe lirye mwesimwesi mwigulu,
enywe abaŋeeresa babe abahola ebi genda.
22 Mweyaase Musengwa enywe ebitonde bibye mwesimwesi,
hiisi hifo aŋa aŋuga.
Omwoyo gwange gujumirye Musengwa.