26
Ya Dawudi.
1 O Musengwa, langirira ngʼolu pumaaho musango,
olwohuba mu bulamu wange pumaaho mbalo,
era nesiga Musengwa ni puma hubuusabuusa.
2 O Musengwa, hebera omwoyo nʼebiŋeego byange
3 olwohuba bunyendera erala
era keesi hiisi obuhya ngendera mu mazima gago.
4 Siniisa hirala nʼabadulingi
era singendera ŋalala nʼabanafuusi.
5 Sikola muhumba nʼabahola ebibi
era sifugiirira hwihala nʼabahosi bʼebibi.
6 O Musengwa, saaba mu ngalo jange
ohulaga ti mbula musango
era natiina hu hituuti hihyo nahyetoloola ni njumirya.
7 Era kujumirya nʼejanjaasi eryʼamaani ni ndoma
hu byamaliholiho ebi ohola.
8 O Musengwa, nyumirwa ohuba mu nyumba yiyo omu omenya,
ehifo omu eŋono liryo liba.
9 Otapirira ŋalala nʼababbengi,
otambalira ŋalala nʼabatemu,
10 abaŋeega hu huhola ebibi
era abaliira mu nguzi.
11 Ne ese mbulaaho musango,
era pambire ehisa, wununule.
12 Nemeereye aŋaatu aŋagumu,
era nja hwebasanga Musengwa mu luhumbaano olubba.