37
Ya Dawudi.
1 Oteŋendeheranga olwʼabahosi bʼebibi
oba esaalwa ohuhuŋamba olwʼabo abahola ebitali biruŋamu,
2 olwohuba bali hyʼenyaasi
baja huŋotoha hyʼebimera mu hiseera ehitali hya ŋaleeŋi,
hyʼomuloofe ngʼolu guŋotoha mangumangu boosi baja hufa baatyo.
3 Wesigenga Musengwa,
era oholenga ebiraŋi omenye mu hyalo
onyumirwenga ebiraŋi ebi ahuŋa.
4 Sangaalanga olwa Musengwa,
alihuŋa ebi omwoyo gugwo guŋembaho.
5 Ŋambya Musengwa obulamu wuwo
omwesigenga era aja huhuyeeda.
6 Aja huleetera obugwalaafu wuwo ohwaduhirira hyʼenjase mu mawiiwi,
nʼohuba omuutu atehubbira ohwaduha hyʼeryuba eryomu muusi tangalwe.
7 Weŋomehanga mu moni ja Musengwa omuhuumiirire nʼobugumiikiriza,
oteralihiriranga abaatu banabitamo mu tegeha jaawe ecaamu.
8 Leheraaŋo ohunyiiga oba obuhambwe,
bihuleetera bigosi byereere.
9 Abahosi bʼebibi baja husihiiriha,
aye abesiga Musengwa baja huba njʼabeene ehyalo ehi gasuubisa.
10 Mu hamanga hatono, abahosi bʼebibi baja huŋwaŋo
era nʼoja hubendula, sibaja huboneha.
11 Aye abeŋomeha balisikira ehyalo hino
era baja huba nʼemiyaaya mingi.
12 Abahosi bʼebibi besoomera abagwalaafu
era baluma emba olwʼobucaayi.
13 Aye Musengwa ajeherera abahosi bʼebibi olwohuba amanyire ati
oludaalo lwawe luja hwola basihiirihe.
14 Abahosi bʼebibi basoŋolayo epiima
era balasa obusaale ohusihiirisa abagadi nʼabali mu wetaavu
ko nʼohwita abo abahola ebiruŋamu.
15 Aye nawoogi wʼefumo wiita nʼobuŋagaaye
epiima jaawe jija hubeta nibo abeene
era obusaale waawe buja hubbwagiha.
16 Ebitono ebi omugwalaafu ali ni nabyo byamugaso,
ohuhira obuŋinda wʼabahosi bʼebibi eduuli.
17 Hiri hiityo olwohuba amaani gʼabahosi bʼebibi gaja huhoma
aye Musengwa njʼahuuma abagwalaafu.
18 Musengwa alabirira abagwalaafu
era obusika waawe buja huba wʼemirembe nʼemirembe.
19 Mu biseera ebigosi sibaja huŋotoha
era mu biseera ebyʼenjala baja hubanga nʼemere mbitiirufu.
20 Aye abahosi bʼebibi balisihiiriha,
abalabe ba Musengwa baliŋotoha hyʼebimuli
era baja hugotaŋo hyʼeriisi.
21 Abahosi bʼebibi beŋola ne sibasasula
aye abagwalaafu bagaba nʼomwoyo mulala.
22 Abo aba Musengwa aŋa ekabi balisikira ehyalo hino
aye abo aba aŋwaba balisihiiriha.
23 Musengwa anaba nʼasiima engenda yʼomuutu
amutaho obuhuumi,
24 nʼolu atagala saaja hugwa olwohuba Musengwa
amulera mu ngalo jije.
25 Naali muŋere ne ŋaahani ndi kulire
simbonangaho Musengwa nʼahubbire omugwalaafu omugongo
oba abaana babe ni basungirisa emere.
26 Baba nʼehyere hiisi hiseera baŋola ni baŋuma ehi beŋambya
era nʼabaana baawe baja husuna ekabi.
27 Mucuuhe ohuŋwe mu bibi muhole ebiruŋamu
muja humenya hu hyalo hino emirembe nʼemirembe.
28 Musengwa genda abatehubbira era salehaŋo abesigwa babe.
Aja hubahuuma emirembe nʼemirembe
aye olulyo lwʼabahosi bʼebibi lulisihiiriha.
29 Abagwalaafu baja husikira ehyalo
era balihimenyamo emirembe nʼemirembe.
30 Omuutu omuluŋamu ebimuŋwamo biba byʼamagesi
era aloma ebiruŋamu.
31 Ahuuma amagambi ga Hatonda wuwe
mu mwoyo gugwe era sagalehaŋo.
32 Omubi geteega omugwalaafu
ni genda amwite
33 aye Musengwa salireha bagwalaafu mu buŋangi wʼababi
oba ohuleha bamusalire omusango.
34 Wesigenga Musengwa
era ogenderenga mu magira gage, oja husikira ehyalo hino.
Era olibona ababi ni basihiiriha.
35 Nabona omuhosi wʼebibi nʼaŋuma hisa
era nʼali bulaŋi hyʼomusaala gwʼe Lebbanooni, oguhulira mwiroba egimu
36 aye siŋabita hiseera ngʼafa era ngagota
ni namwendula sinamubona.
37 Wehaŋaase omuutu omugwalaafu era omulaŋi
aja huba nʼobulamu owʼemiyaaya mu moni eyo.
38 Aye abahola ebibi bosibosi
baja husihiiriha baŋwereŋo erala.
39 Obunoŋosi wʼabagwalaafu buŋwa eyiri Musengwa
era njʼabahuuma mu biseera ebigosi.
40 Musengwa njʼabayeeda era njʼabanunula, abaŋonia abahosi bʼebibi
era gabanoŋola olwohuba bamwesiga.