39
Yʼomutangirisi wʼabembi. Yedusuuni. Ezabbuli ya Dawudi.
1 Naloma ti, “Nehuumenga mu sambo jange
era negenderesenga ohutaloma hibi.
Sinja huloma hiitu hyoshyosi abahosi bʼebibi ni baliŋo.”
2 Ne wayire naŋoleera nʼohuloma nandindoma
neyongera hubonaabona.
3 Omwoyo gweyongera ohunefubuha,
era ni gwahubba amaluga neyongera ohwerarihirira.
Nga ndoma ti,
4 “O Musengwa ndomere, ndifa ŋaali era nja huhena myaha jinga?
Kebulise ti obulamu wange wa haseera buseera.”
5 Wahola endaalo jʼobulamu wange waaba wuupi hyʼekengo jʼenjala.
Emyaha jʼobulamu wange sihiitu mu moni jijo.
Obulamu wa hiisi muutu, muuya wuuya.
6 Omuutu hisisigo busisigo!
Byosibyosi ebi huhola byawereere abunga obuŋinda aye saamanya alibuŋira.
7 Ne ŋaahani Musengwa hiina ehi nendula?
Esuubi lyange liri mu ndiiwe.
8 Noŋole mu bibi byange byosibyosi
otandeha baŋubeebe hunjeherera.
9 Nja huŋoleera huŋoleera
olwohuba ndiiwe oli humboneresa.
10 Lehera aŋo ohumboneresa
amaŋi agawukubbire gahena.
11 Ohayula era waboneresa abaatu olwʼebibi byawe
olya obuŋinda waawe hyʼebisereŋi hiisi muutu muuya wuuya.
12 O Musengwa, ŋulira ohusaba hwange,
ŋuliirisa ni sunga obuyeedi,
nja wunjeede nahweriririra,
otaba hyʼomusiŋa eyiri ohulira hwange,
ndi mugendi hyʼabasehulu bange.
13 Ndehe nahamwenyaho
ko pwe hu hyalo huno.