66
Yʼomutangirisi wʼabembi. Olwembo. Ezabbuli.
1 Abaatu hu hyalo hyosihyosi mwembere Hatonda nʼesangaalo.
2 Yemba hu ŋono lyʼesiina lirye,
mujumirye nʼomuŋa eŋono.
3 Loma Hatonda oti, “Ebiitu ebi ohola byeŋunjisa
era ebi ohola bireetera abalabe babo ohuhubbira amafuha olwʼohuhutya.
4 Abaatu hu hyalo hyosihyosi bahujumirya,
bemba hu ŋono liryo ni bahutendereza.”
5 Nja webonere ebi Hatonda aholire,
ebikolwa ebyeŋunjisa ebi aholera abaatu.
6 Gafuula enyanja yaaba hyʼowoomu ngʼabasehulu beefe babitaamo nʼamagulu.
Kale olwa niye muuje husangaale.
7 Aŋuga emirembe nʼemirembe olwʼamaani gage
emoni jije jibona amawanga olwʼehyo ŋaŋume amwepahiraho.
8 Abaatu mwesimwesi mwebase Hatonda weefe
era amajanjaasi geefe gaŋulirihane.
9 Atuhuumire ni huli balamu
era sigatuleha hwefumuliraŋo.
10 O Hatonda, watugezesa
ngʼolu feeza bayita hu muliro ohuyihenunulamo obucaafu.
11 Watuleha hwagwa mu mutego
watutwiha emigugu.
12 Waleha abalabe beefe
batwema hu mitwe.
Hwabita mu muliro nomu maaji
aye watwambusa watwosa mu hyalo ehyejuuye ebiraŋi.
13 Nja huuja mu nyumba yiyo nʼeŋongo
eri bohya ehwiye lyaguguliha ohwoheresa ebi neeyama,
14 nja huleeta ehi neeyama ni ndi mu bigosi.
15 Nja huŋonga ebyayo ebisava
emiigu yʼetaama nʼebunwa yʼeŋombe ko nʼembusi,
eriisi litiine ŋamugulu.
16 Mwesimwesi abaŋa Hatonda eŋono muuje muŋulire
leha mbalomere ehi gakoleeye.
17 Namweriririra gaape obuyeedi
era namujumirya.
18 Mbanga ni naali ni ndehire ehibi mu bulamu wange ni nasifayo
singa Musengwa sigapuliirisa.
19 Aye Hatonda gaapulira
era gagobolamo ohusaba hwange.
20 Hatonda gebasiwe olwohutagaana huŋulira esaala jange
oba ohugaana ohundaga ohwenda huhwe ohubitiirifu.