94
1 O Musengwa, Hatonda owesasusa,
O Hatonda owegalula, ale ni webonese.
2 Yinyoheramo ewe asala emisango hu hyalo,
abehudumbasa baŋe ehi basaanira.
3 O Musengwa, balyosa ŋe?
Abahosi bʼebibi balyosa ŋe ohweyagala?
4 Bajofumula ebibono ni bepaahapaaha
abahosi bʼebibi bejuuye ohweginiha.
5 O Musengwa, bahiyaania abaatu babo,
banyigirisa abo abawefunira.
6 Batemula abanamwandu nʼabalugendwa
era batemula abafuubbi.
7 Baloma baati, “Musengwa saabona,
Hatonda wa Yakobbo sabifaho.”
8 Baatu enywe, muli baŋubeebe ba ngeri hi?
Muliba nʼamagesi ŋaali?
9 Oyo owatonda amatwi, saŋulira?
Owahola emoni, saabona?
10 Oyo ahangavula amawanga, saaja hubahangavula?
Omuŋi wʼamagesi asobola ohuŋuma magesi?
11 Musengwa amanyire ebiŋeego byʼabaatu,
amanyire ati ebiŋeego byawe biŋuma mahulu.
12 Musengwa, nga gesiimire oyo oyu oŋamo endabusi,
omuutu oyu osomesa amagambi gago.
13 Omuŋa ehiŋuumulo mu biseera ebigosi
ohwola olu bayabira abahosi bʼebibi obuloŋo,
14 olwohuba Musengwa salireha baatu babe,
saaja hwabulira abo ababe.
15 Abaŋugi baja husala emisango ni batehubbira,
era abʼemyoyo emigwalaafu baja huhisiima.
16 Njʼani aja hwemeerera hu lwange ohuŋahania abahosi bʼebibi?
Njʼani aja ohuŋiriŋania abahola ebibi?
17 Singa Musengwa siganjeeda,
hani natiina hale e magombe.
18 O Musengwa, ni naloma ti, “Ohugulu ni hwaterera,”
ohwenda huhwo hwapambirira.
19 Ni naali ni neralihiriiye bugali
ohumbudawuda hyandeetera esangaalo.
20 Oŋuma kolagana nʼabaŋugi abahosi bʼebibi
sibasobola huloma baati oli ŋalala ni nabo,
abalanga ohwehubbira baati hiraŋi?
21 Behobaana ohwita abagwalaafu,
era abo abaŋumaho omusango babasalira ogwʼohufa.
22 Aye Musengwa njʼowukuuma,
era Hatonda wange njʼebaale omuneŋogoma.
23 Aja hubegalula olwʼebibi byawe
era aja hubasihiirisa olwʼebibi byawe,
Musengwa Hatonda weefe aja hubasihiirisa.