Ko te 'Uluaki 'Ipiseli 'a Paula kiā
Tīmoté
Ko te talateú
Ko Tīmoté ko he toki Kalisitiane mei 'Ēsia Minu, ko te tama ne'e fa'ē Siu kae tamai Kalisi. Ne'e hoko ia ko he kaume'a mo te tokoni kiā Paula 'i tana ngāue fakamisinalé. Ko te 'Uluaki 'Ipiseli 'a Paula kiā Tīmoté 'oku tokanga ia ki te 'ū me'a 'e tolu.
1. 'Oku tokanga te tohí ki te akonaki hala 'i te siasí. Ko te akonaki ko 'ení 'oku fio ai 'ia te 'ū fakakaukau faka-Siu mo te 'ū fakakaukau ne'e kala faka-Siu. Ne'e tafito ia 'i te tui ko te māmani matelié 'oku kovi, pea 'e toki lava ke fakama'uli he taha 'i ha'aná a'usia he 'ilo fakalilolilo pea mo ma'u hoa.
2. 'Oku toe fakamatala foki 'e Paula 'o kau ki tono pule'i 'o te siasí mo tono 'ū ouaú, fakataha mo te fakamatala ki te fa'ahinga tō'onga ma'uli kua pau ke ma'u 'e te kau takí 'o te siasí.
3. 'Oku fakahinohino'i foki 'e Paula 'ia Tīmote ki te founga 'e ina hoko ai ko he tamaio'aliki lelei 'a Sīsū Kalaisi, mo te 'ū fatongia ke ina fakahoko ki te 'ū fa'ahinga kakai tui kehekehe.
Ko te kakano 'o te tohí
Ko te talateú (1:1-2)
Ko te 'ū fakamatala kau ki te siasí mo tono kau takí (1:3—3:16)
Ko te 'ū akonaki kiā Tīmote fekau'aki mo tana ngāué (4:1—6:21)
1
Ko te fakafe'iloakí
1 Ko au 'eni Paula, ko he 'apōsetolo 'a Sīsū Kalaisi 'i te fekau 'a te 'Atuá ko te tou Fakama'uli, mo Sīsū Kalaisi ko te tou 'amanaki'angá.
2 Ko taku tohi kiā Tīmote ko toku foha mo'oni 'i te tuí.
'Ofa ke ke ma'u kelesi mo te meesi mo te fiamālie, mei te 'Atuá ko te Tamai, mo Kalaisi Sīsū ko te tou 'Aliki.
Ko te 'ū fakatokanga ki te akonaki halá
3 Hangē ko taku kole kiā koe 'i taku 'alu ki Masitōniá, ke ke nofo ifo 'i 'Efesō, kote'uhí ke ke fekau he 'ihi ke tuku te notou ako 'aki te me'a kehé;
4 kae'uma'ā te notou nofo ki te 'ū talatupu'á, mo te lau hohokó, 'a ia 'oku fakatupu ai he fakakikihi, 'o kailoa ko te palani ngāue faka-'Atua 'ā ē 'oku 'o te tuí.
5 Kā ko te 'uhinga 'o te fekaú, ke 'i ai he 'ofa 'oku ha'u mei te loto ma'a, mo te konisēnisi 'ata'atā, mo te tui ta'elohi.
6 Kua 'i ai he 'ihi kua notou afe mei ai, 'o notou hē ai ki te launoa,
7 'o notou holi ke lau ko te kau faiako 'o te Laó, kae tā ko 'ē 'oku kailoa 'uhinga kiā nātou 'ia te 'ū lea 'oku notou faí, pe ko te 'ū me'a 'oku notou lea fakapapau ki aí.
8 Kā 'oku tou 'ilo'i 'oku lelei pē 'ia te Laó ia, kāpau 'e fakalao pē ta'atá ngāue 'aki,
9 'o 'ilo'i ai 'eni, 'oku kala fokotu'u 'ia te Laó ma'ana 'oku mā'oni'oní; kae ma'a te kau malaki laó mo te angatu'ú, ma'a te kau faka'atuamaté mo te angahalá, ma'a te kau ta'emā'oni'oní mo te anga-fakalialiá, ma'a te kau tāmate tamai mo te tāmate fa'ē, ma'a te kau fakapō,
10 ma'a te kau fe'auaki, mo te kau fai fakasōtoma, ma'a te kau kaiha'a tangata, mo te kau lohi, ma'a te kau maumau fuakava; pea mo te me'a kehekehe neongo pe ko te ā, 'a ia 'oku fehālaaki mo te tokāteline haohaoá;
11 'o fakatatau mo te ongoongolelei nāunau'ina 'o te 'Atua Mohu Manū'iá, 'ia te ongoongolelei 'a ia ne'e tuku mai kiā au ke au tauhí.
Ko te fakahounga'i te 'ofa 'a te 'Atuá
12 'Okou fakafeta'i ki te tou 'Alikí ko Kalaisi Sīsū, kote'uhí kua Ina foaki ivi ma'aku, mo lau 'oku ko te anga-tonu, 'i Tana fokotu'u 'oku ki te lakanga nei.
13 Neongo ko te toko taha 'ia au ne'e lau kovi ki te 'Atuá 'i mu'a, mo fakatanga mo pau'u, ka ne'e fai meesi kiā au, kote'uhí ne au fai ta'e'ilo'i pē, pea ko te ta'etui.
14 'Io, ne'e mātu'aki ope mai 'ia te kelesi 'a te tou 'Alikí, pea ō mo ia 'ia te tui mo te 'ofa, 'a ia 'oku tu'u 'iā Kalaisi Sīsū.
15 'Ē, 'oku mo'oni te leá, pea taau ke tali 'e te kakai kotoa pē: “Ne'e ha'u 'ia Kalaisi Sīsū ki māmaní ke fakama'uli 'ia te kakai angahalá;” 'a ia 'okou fungani aí.
16 Kā ne fai meesi kiā au kote'uhí ko te me'a nei, kote'uhí ke fakahaa'i 'e Kalaisi Sīsū 'iā au ko te fungani angahalá tono katokātoa 'o Tana kātakí, mo'o taipe ma'a nātou 'e notou tui kiā ia 'āmuli ke ma'u 'ia te ma'uli ta'engatá.
17 Pea ke 'o te Tu'i 'ītānití, ko te Ta'e'auha, ko te Ta'ehāmai, ko te 'Atua pē Taha, ke 'o Tana 'Afió 'ia te faka'apa'apá mo te kolōliá 'o lauikuonga pea ta'engata. 'Ēmeni.
18 Ko te fekau ko 'ení 'okou tuku kiā koe, 'e foha Tīmote, 'o fakatatau ki te 'ū palōfisai ne'e fu'aki fai kau kiā koé. Ke ke kofu 'aki 'ia te 'ū palōfisai ko iá, ke ke fai 'ia te tau leleí.
19 Ke puke ma'u 'e koe 'ia te tuí, kae'uma'ā 'ia te konisēnisi 'ata'atā; he ko te 'ihi, 'i te notou teke'i 'ia te me'a ko iá, kua notou tūkia 'i te me'a 'oku kau ki te tuí;
20 'a ia 'oku kau ai 'ia 'Aiminia mo 'Alekisānita, 'ā ē ne au tukuange kiā Sētane, hei'ilo 'e nā poto ai, ke tuku te nā lau kovi ki te 'Atuá.