9
TeAtua ia ma na hakattina ana Aia
1 Anau e tattara atu te hakamaoni; anau se mariu, maitaname anau e hukui ma Krais. TeAnana Tapu e hakattaki na hakataakoto anau raa, tena na hakataakoto anau raa e mee mai hoki pera ma anau se mariu,
2 te aroha anau e rahi roo, ia te aroha i roto te hatu manava anau raa se isi te hakaoti
3 i na tama te hareakina anau ia ma na llave ana anau raa! Anau e maanatu pera ma e tauareka anau te noho i raro na hakalono llihu TeAtua raa, tena ku havakkee ria i taha ma Krais ki tokonaki na tama nei.
4 Na tama nei ni tama hoki TeAtua, maitaname TeAtua e mee na tama raa pera ma ni tamalliki Aia, tena ki huri ake na mahi Aia raa i na tama raa. Aia e hakamoe te tattara e ivi Aia raa ma na tama raa, tena ki kou ake na Tuaa raa i na tama raa. Na tama raa e too te hakamarumaru hakamaoni raa, tena ki too hoki na tattara hakamaoni TeAtua raa.
5 Na tama raa e oo mai i te hareakina na tipuna taatou na Hibru raa, tena Krais ni hamai no tipu tama, ia he tama hoki i roto te hareakina naa. Tena taatou ki hakammaha tahi TeAtua te Tama e hakamaatua i aruna na tama hakaatoa i na vahao hakaatoa raa! Amen.
6 Anau se meatu pera ma na tattara hakamaoni TeAtua raa ku mmate, maitaname na tama hakaatoa Israel raa seai ma ni tama hakamaoni TeAtua
7 Ia hoki na hai mokopuna Abraham raa hakaatoa seai ma ni tamalliki TeAtua. E mee TeAtua ni meake Abraham ma,
“Na hai mokopuna akoe tera Anau ni tattara atu raa e me ki oo mai i te vahi Aisak.”
8 Te hakataakoto nei e mee pera ma na tamalliki Abraham raa hakaatoa seai ma ni tamalliki TeAtua. Emeia na tamalliki hakamaoni TeAtua raa ko na tamalliki e hannau mai tautari te hakataakoto TeAtua raa.
9 Maitaname na tattara hakamaoni TeAtua raa e mmoe i roto na tattara nei,
“Te saaita peenei te hetau i muri raa Anau e me ki vaakai mai,
tena Sara e me ki haanau te tamariki tanata.”
10 Ia teeraa mee hoki. Tokorua na tamalliki taanata Rebeka raa e oo mai te tamana hokotahi, teenaa ko Aisak te tipuna taatou raa.
11 12 Emeia ki mee te hakataakoto te Tamariki hokotahi raa ki hakamaoni pera ma hea TeAtua e hihai raa, tena TeAtua ki meake Rebeka ma,
“Te tama matua raa e me ki hehekau i raro na mahi te tama paamee raa.”
TeAtua e meake te tattara nei i mua tokorua raa ni hannau iho, ia i mua hoki tokorua raa e ppena na mee taualleka ia ma na mee haeo, tena te hihai TeAtua raa e me ki tautari te kanna Aia, ia seai ma hea tokorua raa ni ppena raa.
13 E ssau pera ma te Launiu Tapu raa e tattara mai ma,
“Anau e laoi Jekop,
e meia Anau se hihai Iso.”
14 Kaa taatou e me ki tattara pera ma hea TeAtua e ppena raa e sara? Seai.
15 E mee Aia ni tattara ake Moses ma,
“Anau e me ki hai aroha na tama Anau e hihai raa,
tena ku mee hakaraoi na tama Anau e hihai raa.”
16 Ia tena na mee hakaatoa e me ki tautari koi te aroha TeAtua, ia seai ma te hihai ia ma hea te tama e hihai ki ppena.
17 Maitaname te Launiu Tapu raa ni tattara ake i te tuku Isip raa ma,
“Anau e mee akoe ki tuku raa ma ki huri ake akoe na mahi Anau raa ma ki illoa na tama hakaatoa te maarama nei raa i Anau.”
18 Ia tena TeAtua e me ki hai aroha he tama peehee Aia e hihai, tena ku mee he tama peehee ki hakatapanatta i te maanatu koi Aia.
Te roto ia ma te aroha TeAtua
19 Emeia he tama kootou e me ki mee mai Anau ma, “Kame te mee nei hakamaoni, tena kaa TeAtua e me ki mee ma taatou e ssara peehee? Koai te tama e lavaa te ttuki te hihai TeAtua?”
20 Taku taina, akoe he tama peehee ki lavaa te tattara ssui ake TeAtua naa? Na mee taatou e ppena ma na rima taatou raa se lavaa te tattara mai ma, “Aiea akoe e penapena anau peenei naea?”
21 Tena te tama e penapena te mee raa e isi na mahi ki ppena hea aia e hihai, tena aia e lavaa te pena e rua na mee i te mee hokotahi. Teeraa mee he mee na aho e llahi, tena teeraa mee he mee koi na aho vare.
22 Tena te hakamaoni raa e ssau pera ma hea TeAtua ni pena raa. Aia e hihai ki huri mai te roto Aia, tena ku mee taatou ki illoa na mahi Aia. Emeia Aia e pasemmu roo no kkumi hemuu te roto Aia i na tama tera e mee Aia ki roto raa ia ma na tama hoki ku mee ki oo i te kina haeo raa.
23 Tena TeAtua e hihai hoki ki huri mai na mahi hai mmahi Aia tera Aia ni kou mai taatou na tama e tau te too te laoi Aia raa. Aanaa ko na tama Aia ni tanattana ma ki too te tauareka Aia raa.
24 Maitaname taatou ko na tama Aia ni kanna, tena Aia se kkana koi na Jiu raa, e meia Aia e kanna hoki na tama seai ma ni Jiu raa.
25 Aanei na tattara TeAtua i roto te launiu Hosea ma,
“Na tama seai ma ni tama Anau raa,
Anau e me ki kanna na tama naa ma,
‘Ni tama Anau.’
Tena te kanohenua seai ma he kanohenua Anau ni laoi raa,
Anau e me ki kanna ma teenaa ‘He kanohenua Anau.’
26 Ia tena i te kina roo Anau ni meake na tama raa ma,
‘Kootou seai ma ni tama Anau raa,’
Anau e me ki kanna na tama raa pera ma ni tamalliki TeAtua e ora raa.”
27 Tena Aisaia ni tattara i te vahi Israel ma,
“Niaina na tama Israel raa e tammaki pera ma na kerekere i tai,
e meia na tama e me ki ora raa e me ki moisi roo;
28 maitaname TeAtua e me ki hakatonutonu vave na sara te maarama nei raa.”
29 E ssau hoki pera ma Aisaia ni tattara mai i mua ma,
“Taatou e me ki ssau pera ma Sodom,
ia e me ki ssau pera ma Gomora;
peeraa TeAtua Hai mahi raa ki se tiaki mai alaa hai mokopuna i taatou.”
Israel ia ma te Rono Tauareka
30 Tena taatou e me ki tattara pera ma na tama seai ma ni Jiu tera ni se hahaivi ma ki mee laatou ki ttonu ma TeAtua raa ku ttonu ma Tama raa i te vahi na hakattina laatou.
31 Emeia na tama TeAtua e sesee te tuaa ma ki mee laatou ki ttonu ma TeAtua raa ku se lave te tuaa raa.
32 Aiea na tama raa se lave raea? Maitaname na tama raa se tuunaki i na hakattina laatou raa, e meia na tama raa e tuunaki koi hea laatou ni ppena raa. Tena na tama raa ku haere hinahhina vaa aruna “te hatu”
33 te Launiu Tapu raa e tattara ma,
“Kira ake, Anau e tuku te hatu i Saion tera e me ki mee na tama raa ki hinahhina raa,
te hatu e me ki mee na tama raa ki maoha.
Emeia na tama e hakatina Tama raa e me ki se lavaa te nnapa.”