5
Te Punua Sipsip ia ma te launiu e pini
1 Anau ku kite te Tama e noho i aruna te Nohorana raa e ttaohi te launiu e pini ma te rima laaua Aia; saa vahi te launiu raa e pii roo na tattaa, ia e isi e hitu na hakamaatino.
2 Tena anau ku kite te ensel e hai mahi roo e tattara hakamaroa roo ma, “Koai te tama e lavaa te ssau na hakamaatino raa i taha no taaraki te launiu e pini raa?”
3 Emeia se hai tama i te vaelani, ia te maarama nei ia ma te maarama te mate raa e lavaa te taaraki te launiu raa no mmata i roto.
4 Tena anau ku tani okioki roo, maitaname ku se hai tama hoki e lave ki taaraki te launiu e pini raa ia ma ki mmata i roto.
5 Tena he tanata matua hokotahi i na taanata mattua raa ku mee mai anau ma, “Auu se tani. Kira ake! Te laion te kaha i Juda raa, te mokopuna hakanaaniu Devit raa e ivi roo i aruna na tama e kiri lloto aia raa, tena aia e lavaa te ssau na hakamaatino e hitu raa i taha no taaraki te launiu e pini raa.”
6 Tena anau ku kite te Punua Sipsip raa ku tuu i lottonu te Nohorana raa, tena na manu e haa e ora tahi raa hakapaa ma na taanata mattua raa ku ttuu alleha te Nohorana raa. Te Punua Sipsip raa e ssau pera ma he manu ku oti te taia ria no mate. Te Punua Sipsip raa e isi e hitu na mahi hai mmahi ia ma e hitu na karemata, teenaa ko na anana e hitu TeAtua ni kauna ki oo vaa roto te maarama nei hakaatoa raa.
7 Te Punua Sipsip raa e haere no too te launiu e pini raa i taha ma te rima laaua te Tama e noho i aruna te Nohorana raa.
8 Te saaita Aia ni ppena peenei, na manu e haa e ora tahi raa laatou ma na taanata mattua raa ku maoha no tutturi i mua te Punua Sipsip raa. Na tama nei hakaatoa e isi te haap ia ma na hopeni e pena i na gol e pii na insens, teenaa ko na lotu na tama TeAtua raa.
9 Na tama raa e huhua te rue hoou ma,
“Akoe e tau hakamaoni te too te launiu e pini raa,
tena ku ssau na hakamaatino e hitu raa i taha.
Maitaname Akoe ni taia ria no mate,
tena te toto Akoe raa e sui muri ake TeAtua
na tama na hareakina hakaatoa,
na tama na tattara hakaatoa,
na tama na henua hakaatoa
ia ma na tama roo hakaatoa.
10 Akoe e mee na tama raa
pera ma he kanohenua na maatua te lotu
ki hehekau ma TeAtua taatou raa,
tena laatou e me ki hakamattua i te maarama nei.”
11 Anau ku kkira hoki no rono simata na maano na ensel hakaatoa! Na ensel nei e ttuu alleha te Nohorana raa ma na manu e haa e ora tahi raa ia ma na taanata mattua raa
12 no huhua hakamaroa roo ma:
“Te Punua Sipsip ni taia ria no mate raa e tau roo te too na mahi i te vaelani,
na mee taualleka,
te atamai, na mahi,
te hakammaha, te tauareka, ia ki hakamaru ria.
13 Tena anau ku rono na tama hakaatoa i te vaelani, te maarama nei ma te maarama te mate raa, ia i roto te lottai ia ma na mee hakaatoa roo e ora i roto te maarama nei raa ku huhua ma,
Hakammaha ake te Tama
e noho i aruna te Nohorana raa
ia ma te Punua Sipsip raa.
Hua ki ssau na inoa Tokorua raa,
ki hakamaru ake,
ia ki hakanaau na mahi hai mmahi Tokorua raa
ki mmoe tahi na vahao hakaatoa!”
14 Tena na manu e haa e ora tahi raa ki meake ma, “Amen” Tena tipu rua ma haa na taanata mattua raa ku tteiho no tutturi no lotu.