Ⅵ
*Zeziiꞌa -dalbhoyiꞌa lbhʋ
Ⅰ A ꞌye li-ɔ, ꞌlotʋꞌa ꞌꞌnynuu-a, -abʋ -ke -Lagɔ-ɔ nʋꞌo ꞌtɔ-ɔ lbhʋꞌa dɩ, -a ꞌꞌduꞌo amʋ ꞌꞌdɩ ꞌmʋ na: -Lagɔ -wʋnnaꞌa-a amʋ ꞌꞌniti. ꞌKa-a ɩ -nɩꞌe ꞌmʋꞌa dɩ, ɛ-bɛ -zɛgɛ ɔ nʋꞌa amʋ ꞌꞌlruli, ꞌɛ ꞌꞌdu bhubhuyitiꞌa lɛ -le!
Ⅱ ꞌLe -Lagɔꞌɔ ꞌꞌbɔgʋ ꞌli, -kaa ɩ ꞌcnɩ-ɛꞌɛ -kaa ꞌle, na:
Ɔ na: -Nɔɔ ꞌɩn ꞌꞌduꞌa amʋ ꞌle ꞌɩn ꞌke amʋ -zɛgɛ ꞌꞌlrulinʋ, -bho ɛ nyni a, -ka ꞌɩn kpʋnꞌa aꞌba bhadewlu, nyʋ-ʋ ꞌye -ɩ yibo -mʋ. Ɛ-bɛ -nɔɔ ꞌmnɛ ti, -da ꞌɩn-ɩ ꞌyeꞌa aꞌba ꞌpʋnpʋan -jolʋ wɔn-flɔ -nɩ mʋ, ꞌle a ꞌke ꞌpʋn, ꞌɩn-ɩ ꞌye-e amʋ -kpa -mʋ.
A -gblee, ꞌlotʋꞌa ꞌꞌnynuu-a, -zɛgɛ -Lagɔ ꞌbɔꞌɔ ti ɔ ꞌke amʋ ꞌꞌlrulinʋ, ꞌɛ -kʋtɩ ꞌsɔnꞌɔ -kpʋnnɩnamʋ ꞌka-a! Ɔ ꞌbɔ-ɔ ti ꞌtraamʋ -a ꞌke ꞌpʋn ꞌbho ꞌɔ ꞌꞌyigbeyi.
Ⅲ Lbhʋ -a -nɩꞌa nʋnamʋ, -a -see ꞌybha, nyʋ ꞌke ꞌbho ꞌɛ da ꞌꞌdu. ꞌƖnnɛ ꞌbhleꞌe ꞌnynɩꞌa dɩ, lɛꞌꞌo lɛ-ɛ ꞌka nyɔ -zicɛ ꞌmʋ ꞌꞌdu ꞌle ɔ -kaa Zeziiꞌa ꞌꞌdɩzɩgɩ ꞌwɔɔn, -aꞌba nʋ ɛꞌo.
Ⅳ Lɛꞌꞌo lɛ -a nʋꞌa a, ɛ-ɛ tɔꞌo na, -Lagɔꞌɔ lbhʋnʋmʋ -a ꞌꞌduꞌo. A ꞌye li-ɔ, sɩasɩaalɩ -a ꞌka wɔn ꞌmʋ cɛ ꞌle -a ꞌka -Lagɔwlu ꞌmʋ-za o, -ka -a ꞌka -nyna ꞌle -a ꞌka ꞌkleyeɛɛ ꞌli ꞌwlʋ o, sɩasɩaalɩ -lrɩɩ o, -a ꞌku-o ꞌꞌgwli, ꞌle ꞌya -zaꞌa -amʋ lɛ ꞌꞌyi.
Ⅴ ꞌLe ꞌwɩtɔlʋ -ke ꞌwɩ -lrɩɩ ꞌli, ʋn-ʋ ꞌlbhaꞌa -amʋ-ɛ, ʋn-ʋ ꞌpo-o -amʋ -jie ꞌmʋ, ʋn-ʋ ꞌꞌgbu-o ti ꞌle ʋn-ʋ yiꞌe -amʋ zrɛ ꞌmʋ tibɔnamʋ, -a ꞌmɛ-ɛ lbhʋ ꞌꞌwe wɔn ꞌmʋ, -a ꞌde-e yra ꞌle ꞌmʋ-ʋ ꞌlbhaꞌa -amʋ.
Ⅵ Ɛ -nɩꞌa -kaa ꞌmʋ a, -aꞌba kpli ꞌsrɛɛꞌɛ-ɛ ꞌꞌyi ꞌbho -Lagɔꞌɔ ꞌꞌyigbeyi. -Ka ɔ ꞌybhaꞌa -a ꞌke nʋ, -a yiboꞌo-o -kaa ꞌle -a nʋ ɩꞌo. -A ꞌbhle-e ꞌꞌgwlikuɛ ꞌmʋ. -Aꞌba ꞌlimʋ -nmɔꞌɔ-ɔ wɔn. *-Lagɔꞌɔ Lisaazuzu -nɩꞌe-e -amʋ ꞌmʋ. -A -kmaꞌa-a -a -bonyunyuꞌa dɩ -ka -zɛgɛka.
Ⅶ -Lagɔꞌɔ wlu-u ꞌma-a -ziadɩ, ꞌɩnnɩ -a zaꞌa nyʋ -bodɩ ꞌmʋ. -Lagɔꞌɔ ꞌꞌbhuo ꞌꞌnyɩ-e -amʋ ꞌɔ wɔnkuɛ. Ɩ-bɩ ꞌꞌyisrɛɛkpli nyʋ-ʋ ꞌyeꞌa -amʋ ꞌmʋ li, ꞌle, -ka -a ꞌꞌduꞌa ꞌɔ lbhʋnʋmʋzɩgɩ, ʋn-ʋ yibo nɩꞌa a, ꞌɩnnɩ ꞌka-a! Ɛ-bɛ ꞌjɛ -Lagɔ nʋꞌa -amʋ ꞌꞌlruli ꞌle ꞌꞌnyinynidɩꞌa tiyayi *Sataan -kaa -amʋ tʋ wɔn ꞌmʋ lu, -a -de ꞌnɛ-ɛ ꞌli ti -ka -zɛgɛka. Ɩ-bɩ ꞌꞌyisrɛɛkpli ꞌmnɩꞌa dɩ -Lagɔ-ɔ ꞌꞌduꞌo -amʋ ꞌꞌyrili ꞌle ꞌya dɩ -lrɛɛ -a ꞌbhɛɛꞌo -a -ke -aꞌba ꞌꞌyidedeyi ꞌmnɔ ꞌke ꞌꞌyigege ꞌle -a ꞌke ɔ wɔn-zi.
Ⅷ -Ɛkedɩmaa, nyʋtɔlʋ-ʋ ꞌꞌduꞌo ꞌbho -amʋ-ɛ ꞌle -lrʋʋꞌa ꞌlaꞌa -amʋ lɛ. Nyʋtɔlʋ-ʋ ꞌza-a -aꞌba ꞌꞌdɩzɩgɩ ꞌle -lrʋʋ-ʋ zaꞌa -aꞌba ꞌꞌnyinynidɩ. -Bho nyʋ -gbʋ -amʋ ya, ʋn na, nyʋꞌa ꞌꞌyrabhamʋlbhamʋ -a ꞌꞌduꞌo. -Bho nyɔ ꞌcrɩ ɩ ꞌmʋti, -a ꞌmo-o -ziadɩꞌa ꞌmʋzamʋ.
Ⅸ -Bho ʋn -gbʋ -amʋ ya, ʋn-ʋ popo-o ꞌgwlʋti na, bhubhuyitiꞌa nyʋ -a ꞌꞌduꞌo, nyɔ se -amʋ yibo. -Bho nyɔ ꞌꞌbhlu ɩ ꞌmʋti, -a yibo-ɛꞌo. -Bho nyʋ -gbʋ -amʋ ya, ʋn-ʋ popo-o ꞌgwlʋti na, -a -see ꞌmʋ-gwle yi. A -gblee, ʋn-ʋ popo-o -kaa ꞌgwlʋti ꞌle -abʋ -nɩꞌe -bhla ti ꞌꞌkɔmʋ! Sɩasɩaalɩꞌa -dadudu ꞌbhla-a -amʋ ꞌꞌkpi. Ɛ -nɩꞌa -kaa ꞌmʋ a, ɩ -see -amʋ ꞌlbha -a -see ꞌmɛ.
Ⅹ Lɛ ʋn ꞌka -amʋ ꞌꞌlrulinʋ ꞌle ꞌgwlʋ ꞌke -amʋ li-nyni, ꞌɩnnɛ ʋn-ʋ nʋꞌo. Ɛ -nɩꞌa -kaa ꞌmʋ a, -aꞌba ꞌbhɔ ꞌbʋbʋaꞌa lilidɩ. -Bho nyʋ -de ti, ʋn-ʋ popo-o ꞌgwlʋti na, ꞌꞌpʋanlbhamʋ -a ꞌꞌduꞌo. -Bho nyɔ ꞌꞌbhlu ɩ ꞌmʋti, lɩ-ɩ ꞌbhleꞌa ꞌnynɩ ꞌbho -Lagɔꞌɔ ꞌꞌyigbeyi, -a-bʋ ꞌmo-o ꞌya -kɔmʋ. -Bho nyʋ -gbʋ -amʋ ya, ʋn na, -a se lɛ ꞌbhle. -Bho nyɔ ꞌꞌbhlu ɩ ꞌmʋti, -a-bʋ -kɔꞌɔ lɛꞌꞌo lɛ.
Ⅺ A-bʋ ꞌan dɩkmalotʋꞌa ꞌꞌnynuu -nɩꞌa ꞌbho Kɔlɛɛtɩgwlɔ ꞌmʋ, a ꞌye li-ɔ, -a -zaꞌa-a amʋ lɛꞌꞌo lɛ -bodɩ ꞌmʋ gbaa! -A -see lɛ flʋ ꞌꞌyisie. ꞌLe -abʋ -bodɩ, -aꞌba -pɔlʋ ꞌkpʋn-o amʋ ti tenyɩ.
Ⅻ -A -kmaꞌa-a aꞌba dɩ -ziaka. A-bee se -aꞌba dɩ -kma -ka -zɛgɛka.
ⅩⅢ A -gblee, -ka -tɩta-a ꞌꞌduꞌa ꞌꞌyu ꞌꞌdɩ ꞌmʋ, ꞌka-a ꞌɩn-ɩ ꞌtmʋʋꞌo amʋ. ꞌƖn na: -Ka -aꞌba -pɔlʋ kpʋnꞌa amʋ ti tenyɩ, a-bee -mnʋʋꞌa nɛ kpʋn -kaa -amʋ ti tenyɩ -lrɛɛ!
Nyʋ-ʋ seꞌa *Zezii ꞌꞌgwlide, aꞌba -ke ꞌwa -plɛ -pɔlʋ -ke kpli ꞌmʋ -le!
ⅩⅣ ꞌLotʋꞌa ꞌꞌnynuu-a, nyʋ-ʋ seꞌa *Zezii ꞌꞌgwlide, aꞌba -ke ꞌwa -plɛ -pɔlʋ -ke kpli ꞌmʋ -le! A -gblee, nyɔ -ke kpli-i ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, koo -yɔ -ke -nɩ -nyniꞌa ꞌꞌyrili ꞌbho ꞌɔ ꞌꞌyigbeyi ꞌke -dalue ti-deꞌa? A ꞌye li-ɔ, zɔ -ke -kuyre -nɩ ꞌsɔn, ɩ ꞌbhɛɛ ɩ ꞌke ꞌmʋꞌwʋwla, ꞌle ɩ ꞌke lɛ -lue ꞌꞌdu ꞌnɩ?
ⅩⅤ Zezii *Kliisɩ -ke *Sataan -nɩ ꞌsɔn, ʋn ꞌbhɛɛ ʋn ꞌke -ybhɛ ꞌnɩ? Nyɔ-ɔ deꞌa Zezii ꞌꞌgwli -ke nyɔ-ɔ se ꞌɔ ꞌꞌgwlide, ʋn -nɩ ꞌsɔn -lrɛɛ, ʋn ꞌbhɛɛ ʋn ꞌke -pɔlʋ ꞌmʋ-plɛ ꞌnɩ?
ⅩⅥ -Lagɔ ꞌbhleꞌa nyɔꞌꞌo nyɔꞌɔ tinɩɛ, nyɔ ꞌbhɛɛ ɔ ꞌke *ꞌɔ bʋbɔbhlegbo kɔkui tide ꞌnɩ? A -gblee, -a-bʋ ꞌmo-o ꞌɔ -denazɛgɛ. ꞌKa-a ɩ ꞌcnɩ-ɛꞌo ꞌle ꞌɔ ꞌꞌbɔgʋ ꞌli na:
Ɔ na: ꞌƖn -ke ꞌan nyʋ-ʋ ꞌye-e -na -mʋ ꞌꞌkɔmʋ. ꞌWa -kɔyi ꞌɩnmɔ -Lagɔ-ɔ ꞌye ꞌꞌdu mʋ ꞌle ʋn ꞌke ꞌan nyʋ ꞌꞌdu.
ⅩⅦ ꞌƐ kamʋ, ɔ ꞌtmʋʋꞌo -kaa ꞌɔ nyʋ ꞌmnʋ ꞌle ɔ na:
Nyʋ-ʋ ꞌma-a ꞌꞌnyinynidɩꞌa nʋmʋ, a ꞌwlʋ ꞌle ꞌwa ꞌꞌklumʋ, a ꞌke kpɔ cɛ. Lɩ-ɩ ꞌka amʋ ꞌꞌnyinynidɩꞌa nʋmʋ po ꞌbho ꞌan ꞌꞌyigbeyi, aꞌba nʋ ɩ -le, ꞌle ꞌɩn ꞌke amʋ -kʋtɩ ꞌsɔn -kpʋn -nɩ.
ⅩⅧ -Bho ɛ -nɩ -kaa ꞌmʋ a, ꞌꞌlemnɩɩ ꞌɩn-ɩ ꞌꞌdu-o aꞌba -tɩta ꞌle a ꞌke ꞌan ꞌꞌyreetɩnynʋkpakpɩ -ke ꞌan ꞌꞌyreetɩnyukpasi ꞌꞌdu. ꞌƖnmɔ -Lagɔ -kɔꞌɔ lɛꞌꞌo lɛ, ꞌɩnmɔ ꞌlɛꞌɛ -kaa!