Ⅷ
ꞌPɔlʋ-ʋ ꞌpo-o Kɔlɛɛtɩkɔmʋ ꞌꞌbɔgʋ -jeyi, ʋn ꞌke mɔni ꞌꞌdu ꞌle ʋn ꞌke ʋn *-Bozeziiꞌa nyʋ -kpa
Ⅰ ꞌLotʋꞌa ꞌꞌnynuu-a, ꞌtraamʋ ꞌtɔ ɔ, *Zeziiꞌa -glɩgbɩ-ɩ -nɩꞌa ꞌnɔɔ Masedʋanɩbhlʋkpa ꞌꞌkpi, -zɛgɛ ʋn-ʋ nʋꞌa a, ꞌɩnnɛ -a ꞌbɔꞌɔ ti -a ꞌke amʋ ꞌtmʋʋ. -Lagɔꞌɔ ꞌꞌbhuo-o nʋꞌo ꞌɛ lɛtu ꞌle ꞌɔ ꞌlimʋꞌa wɔnnmɔɛ ꞌmʋ.
Ⅱ Sɩasɩaalɩꞌa -dadudu ꞌbhlʋ -ʋ ꞌꞌkpi, ꞌle ꞌꞌpʋan-a ꞌlbhʋ ʋꞌo. Ɛ -nɩꞌa -kaa ꞌmʋ a, ꞌbʋbʋa-a ꞌlbhʋ -ʋꞌo ꞌꞌkɔmʋ, ꞌle ʋn-ʋ ꞌꞌduꞌo mɔniꞌa -dadudu -Lagɔꞌɔ lbhʋꞌa dɩ.
Ⅲ-Ⅳ Ɩ-bɩ mɔni ꞌmnɩ, -ka ʋn ꞌkɩ ɩ ꞌꞌdu, -a -see ɩ ʋ -bodɩ ꞌmʋ-za. ꞌWa ꞌꞌbhi-i yiꞌo, ʋn ꞌye -amʋ libhade, -a ꞌke ʋ wɔn ꞌꞌkpiticɛ, ʋn -ke ʋn -Bozeziiꞌa nyʋ -lrʋʋ ꞌke gbobhete, ꞌle, Zeziiꞌa nyʋ-ʋ -nɩꞌa Zideebhlʋkpa ꞌꞌkpi, ʋn ꞌke ʋ -kpa. ꞌƐ dɩ ꞌɩn-ɩ ꞌtmʋʋꞌo amʋ na, -ka ʋn ꞌbhleꞌa, ꞌka-a ʋn-ʋ yaꞌo. Mɔni -a de ꞌka ꞌꞌgwli ʋn ꞌke ꞌꞌdu, -yɩ ʋn -yaꞌa a, ɩ ziꞌe ꞌbho-o li.
Ⅴ -Ziadɩ moꞌo. -Ka -a popoꞌa ꞌbho ꞌwa ꞌꞌkpi ꞌgwlʋti, -yɩ ʋn nʋꞌa a, ɩ -zi ꞌnɩ-ɩ wɔn ꞌmʋti. A -gblee, dɩ -a -zʋ ꞌʋ -bodɩ ꞌmʋ ʋn ꞌkɩ ɩ nʋ, ʋn ꞌwɔɔn nɩ-oꞌo. Ʋn ꞌkɩ ɩ nʋ a, ʋn ꞌꞌnyɩ-e -antanyɩ ꞌwa ꞌꞌbhi -aꞌba -Kɔyi Zezii -jeyi. -Lagɔꞌɔ ꞌꞌbhuoꞌa ꞌgwlʋdɩ moꞌo.
Ⅵ ꞌBho a-bee -mnʋʋꞌa damʋ, ꞌɛ kamʋ -a ꞌtmʋʋꞌo Tiitɩ ɔ ꞌke ꞌle amʋ gbo le yi, ꞌle, lbhʋzɛgɛ a -ke ɔ ꞌꞌduꞌa wɔn, a ꞌke ɛ ꞌꞌyigwɛ.
Ⅶ -Lagɔ -wʋnnaꞌa-a amʋ ꞌꞌniti tenyɩ. *ꞌƆ Lisaazuzu ꞌꞌnyɩ-e aꞌba tɔlʋ ꞌꞌgwlideɛꞌɛ ꞌkpɩ ꞌle -Lagɔ ꞌmnɔ-ɔ zi nɩ ꞌnɩ ꞌmʋ, ʋn-ʋ nʋꞌo *wɔnkulɩ. Ɔ-bɔ Lisaazuzu ꞌmnɔ, lɩ aꞌba -lrʋʋ-ʋ seꞌa yibo, ɔ-ɔ ꞌꞌnyɩ -ʋ ꞌya yiboɛ. Ɔ-bɔ -zuzu ꞌmnɔ, ɔ-ɔ ꞌꞌnyɩ-e -lrʋʋ ꞌkpɩ, ꞌle, wlu -Lagɔꞌɔ ꞌꞌbhuo-o po ꞌʋ wɔn ꞌmʋ, ʋn-ʋ zɩ ꞌɩ ꞌmʋ. A ꞌꞌnyɩ-e aꞌba ꞌꞌbhi -Lagɔ -jeyi ꞌꞌfɩa ꞌwee. A -kmaꞌa-a -aꞌba dɩ tenyɩ. ꞌKa-a ɛ -nɩꞌe ꞌmʋꞌa dɩ, ɩ-bɩ mɔni ꞌmnɩ, a ꞌꞌdu ɩ aꞌba -pɔlʋꞌa klɛ ti ꞌle ɩ ꞌke a -Bozeziiꞌa nyʋ -lrʋʋꞌa nɩ ꞌmʋ-zi!
Ⅷ A ꞌye li-ɔ, dɩ ꞌɩn-ɩ zaꞌa -laa amʋ -bodɩ ꞌmʋ, ɛ -se -glaka ꞌɩn kpʋn amʋ ꞌnɩ -ko. Kplizɩgɩ a -bonyunyu nʋꞌa, a ꞌka ya-gbʋ, ꞌya dɩ ꞌɩn-ɩ zaꞌa amʋ -bodɩ ꞌmʋ, ꞌle, -ka a ꞌbhleꞌa nyʋ -lrʋʋꞌa dɩkmɛɛ ꞌmʋ, a ꞌke ɩ ꞌꞌyrili-gwɛ.
Ⅸ A -gblee, -ka -aꞌba -Kɔyi Zezii *Kliisɩ -kmaꞌa aꞌba dɩ, aꞌba ꞌꞌbhi yiboꞌo-o -kaa: -Lagɔ -ke ꞌnynɩ-ɩ ꞌbhɛꞌɛ ꞌꞌyi, ꞌbho ꞌɔ ꞌꞌtroli ɔ ꞌwlʋꞌo ꞌle yaku ꞌli, ꞌle ɔ ꞌye nyunyɔku ꞌmʋꞌꞌluo, ɔ ꞌye ꞌnɔɔ ꞌkmʋ ꞌmʋ yi ꞌle nyʋ ꞌye ɔ ꞌlbha, ɔ ꞌye ꞌmɛ aꞌba dɩ. Ɔ ꞌwɔɔnꞌo ʋn ꞌye ɔ kpli ꞌmnɩ ꞌꞌlrulinʋ, ꞌle a -ke ɔ ꞌke ꞌnynɩꞌa ꞌꞌyibhɛɛɛ ꞌmʋ-plɛ.
Ⅹ ꞌBho ɩ-bɩ mɔni ꞌmnɩ ꞌꞌkpi, lɛ ꞌɩn-ɩ popoꞌa ꞌgwlʋti a, ꞌɩnnɛ ꞌmo-o, -zʋn ziꞌa -laa, a-bʋ ꞌwɔnꞌo -antanyɩ mɔni ꞌmnɩ ꞌke ꞌꞌdu-ɛ ꞌle a ꞌye ꞌya ꞌꞌdudua wɔnꞌꞌdu.
Ⅺ ꞌTraamʋ ꞌtɔ ɔ, ɛ -nmɔꞌɔ-ɔ ꞌꞌyrili a ꞌke lbhʋ ꞌmnɛ ꞌꞌyigwɛ. ꞌBho ꞌɛ ꞌnyaanamʋ, ꞌkpɩ a po ꞌka ꞌle, a po ɩ -kaa ꞌle ꞌꞌkɔmʋ ꞌle a ꞌke ɛ -nynia. -Ka a ꞌbhleꞌa, a -ya -kaa!
Ⅻ A -gblee, -ka a ꞌbhleꞌa, -bho aꞌba -pɔlʋ -wa ti ꞌle a ꞌke -kaa a -Bozeziiꞌa nyʋ ꞌꞌnyɩ, ɛ-ɛ ꞌnʋ-o -Lagɔ ꞌtʋ. Lɛ a ꞌbhleꞌa, ꞌɩnnɛ ɔ ꞌbɔꞌɔ ti a ꞌke a -bonyunyu ꞌꞌnyɩ. Lɛ a seꞌa ꞌbhle, ɔ -see, a ꞌꞌnyɩ ɛ a -bonyunyu, nʋ, katii!
ⅩⅢ Kɩn, -ziadɩ moꞌo. ꞌƖn -see tiꞌbɔ nyɔ ꞌke ɔ -bonyunyɔꞌɔ -kpakpadɩ ꞌꞌdu ꞌle ɔ ꞌke sɩasɩaa wɔnꞌkpa! ꞌƖn ꞌbɔ-ɔ ti, a -nɩ ꞌwee, a ꞌke ꞌmʋꞌbhɛɛ!
ⅩⅣ ꞌTraamʋ a, a ꞌbhle-e lɩꞌa -dadudu. Nyʋ-ʋ se ꞌɩ ꞌbhle, ɛ -nmɔꞌɔ-ɔ ꞌꞌyrili a ꞌke ʋ -kpa. -Nɔɔ -lrɛɛ ti, -bho a-bee -mnʋʋ -bɔ lɛ ꞌmʋ, ꞌle ʋbʋ ꞌke lɩ ꞌbhle -gblokoo, ꞌle ʋn ꞌke amʋ -kpa. -Bho ɛ -nɩ -kaa ꞌmʋ, ꞌꞌlemnɩɩ a-a ꞌbhɛɛꞌɛ ꞌmʋ-ɛ.
ⅩⅤ ꞌƐ ꞌꞌyitigʋgɔwlu ꞌcnɩ-ɛꞌɛ ꞌle -Lagɔꞌɔ ꞌꞌbɔgʋ ꞌli, na:
Lililɩ -Lagɔ poꞌa ꞌzɔ, nyʋ-ʋ ꞌtɛꞌɛ ꞌya -dadudu ti, ʋn li ꞌɩ a, lɛ se ꞌbho -sie. Nyʋ-ʋ ꞌtɛꞌɛ -toope ti, ʋn li ꞌɩ a, ʋn lbho-oꞌo tenyɩ.
-A ꞌlbho-o Tiitɩ -ke nyʋ ꞌsɔn ꞌle amʋ gbo
ⅩⅥ A -gblee, ꞌlotʋꞌa ꞌꞌnynuu-a, -ka ꞌɩn ꞌbɔꞌɔ ti ꞌɩn ꞌke amʋ -kpa, ꞌka-a Tiitɩ ꞌybhaꞌo -lrɛɛ ɔ ꞌke amʋ -kpa. -Lagɔꞌɔ ꞌꞌbhuo-o ꞌꞌnyɩ ꞌɔ ꞌꞌyrilinmɔpɔlʋ ꞌmnɛꞌɛ kamʋ, ꞌɩn-ɩ po ꞌɔ ꞌɛ dɩ ꞌsɛɛ.
ⅩⅦ Ɔ-bɔ Tiitɩ ꞌmnɔ, ꞌɩn ꞌtmʋʋ nɔ-oꞌo ɔ ꞌke ꞌle amʋ gbo le yi. ꞌƖn ꞌlɔ ꞌɔ -kaa ꞌꞌyi, ɔ ꞌwɔɔnꞌo, ɔ -see ꞌbho wlu ꞌꞌdu. ꞌƖn -see ꞌɔ -bhla ꞌtmʋʋ ke, ꞌɔ ꞌꞌbhuo ꞌbɔ-ɔ ti see ꞌɔ -pɔlʋꞌa klɛ ti, ɔ ꞌke ꞌle amʋ gbo yi ꞌle ɔ ꞌke amʋ -kpa.
ⅩⅧ ꞌNɔɔ Zeziiꞌa -glɩgbɩ ꞌweeꞌa wɔnyi, -aꞌba ꞌlotʋꞌa ꞌꞌyu -lue ꞌꞌyri kpʋnꞌa ti ꞌbho -Lagɔjeyi, ꞌɩnnɔ -ke ɔ-ɔ ꞌye ꞌle -yi mʋ. ꞌꞌYri ꞌkpʋn -ɔ ti, -ɛkedɩmaa, ɔ-ɔ ꞌza-a *Zeziiꞌa ꞌꞌdɩzɩgɩ nyʋ -bodɩ ꞌmʋ -ka -zɛgɛka.
ⅩⅨ Ɛ -se ꞌɛ ꞌꞌsɛꞌɛ dɩ ɔ-ɔ ꞌye ꞌle amʋ gbo -yi mʋ ꞌnɩ -ko. Zeziiꞌa -glɩgbɩwɔnyiꞌa nyʋ-ʋ -nɩꞌa ꞌnɔɔ, ꞌɩnnʋ -zɔ ꞌɔ ꞌbho ꞌle -a -ke ɔ ꞌke -na, ꞌle, mɔni -a ꞌyeꞌa -za mʋ, -a -ke ɔ ꞌke ɩ ꞌꞌyriliꞌꞌdu. ꞌƐ lɛtu-u ꞌye-e -aꞌba -Kɔyi Zeziiꞌa ꞌnynɩ ꞌꞌyiꞌbhɛɛ -mʋ, ꞌle, -ka -a ꞌbɔꞌɔ ti -a ꞌke -a -bonyunyu -kpa, ɛ ꞌke ꞌna nyʋ -tɔ.
ⅩⅩ Ɩ-bɩ mɔni-i ꞌꞌdu-ɛꞌɛ ɛ, ɩ -dieꞌe-e ꞌꞌyi. ꞌƐ dɩ -a ꞌꞌduꞌo -aꞌba ꞌꞌbhiꞌa dɩ gba ꞌmʋ ꞌle nyʋ -kaa -aꞌba da ꞌꞌdu.
ⅩⅪ Lɛ-ɛ ꞌma-a -zɛgɛ, -a ꞌbɔ-ɔ ti -a ꞌke ɛ nʋ, ꞌle -a -see tiꞌbɔ -a ꞌke ɛ ꞌbho -Lagɔꞌɔ ꞌꞌsɛꞌɛ ꞌꞌyigbeyi nʋ. -A ꞌbɔ-ɔ ti -a ꞌke ɛ nʋ ꞌbho nyunyuꞌa ꞌꞌyigbeyi -lrɛɛ.
ⅩⅫ A -gblee, ꞌlotʋꞌa ꞌꞌnynuu-a, ʋ-bʋ nyʋ ꞌsɔn-ɔ ꞌyeꞌa ꞌle -yi mʋ, -a ꞌgbaa ꞌnʋ-ʋ -aꞌba ꞌlotʋꞌa ꞌꞌyu -lue -lrɔɔ. Ɔ-bɔ ꞌlotʋꞌa ꞌꞌyu ꞌmnɔ, -a ꞌcrɔ -ɔ ꞌmʋti tenyɩ, ꞌle, -ka ɔ ꞌbɔꞌɔ ti ɔ ꞌke ɔ -Bozeziiꞌa nyʋ -kpa -ka -zɛgɛka, -a ꞌye ɩ yibo. ꞌTraamʋ ꞌtɔ ɔ, ɔ ꞌde-e amʋ ꞌꞌgwli tenyɩꞌa dɩ, ꞌɔ ꞌkpɩ ɔ ꞌbhleꞌa ꞌmʋ, ɩ-ɩ ꞌkpaꞌa ꞌꞌkpi.
ⅩⅩⅢ Tiitɩ -mnɔɔ ɔ, ɔ-ɔ ꞌmo-o ꞌan -nayi ꞌle ɔ ꞌꞌsiꞌe ꞌbho, ꞌɩn -ke ɔ -plɛꞌɛ -Lagɔꞌɔ lbhʋ -lue ꞌmʋ, ꞌle -a ꞌke amʋ -kpa. Nyʋ ꞌsɔn -ke ɔ -nɩꞌa ꞌle yinamʋ, Zeziiꞌa -glɩgbɩwɔnyiꞌa nyʋ-ʋ lbho ꞌʋ ꞌle amʋ gbo. ꞌWa lbhʋ ʋn-ʋ nʋꞌa, -bho nyʋ ꞌye ɛ li, ʋn-ʋ ꞌbhɛɛ-ɛ -aꞌba -Kɔyi Zeziiꞌa ꞌnynɩ ꞌꞌyi.
ⅩⅩⅣ ꞌƐ dɩ, -bho ʋn yi ꞌle amʋ gbo, -ka a -kmaꞌa ꞌwa dɩ -ka -zɛgɛka, a -tɔ nɛ ʋ ꞌꞌyi! ꞌLe, nyʋ-ʋ lbho ꞌʋ, -bho ʋn ꞌwɩn ɩ ꞌbɔ, ʋn ꞌke yibo na, -a ꞌbhle-e ꞌgɩ, -a ꞌke ꞌꞌplin, -a ꞌke amʋ ꞌmʋ po.