Ⅱ
ꞌPɔlʋꞌa ꞌꞌyinynialbhʋ ɔ nʋꞌa ꞌle Tesalonikɩ
Ⅰ ꞌBho ꞌɛ lemʋ a, ꞌlotʋꞌa ꞌꞌnynuu-a, aꞌba ꞌꞌbhi yiboꞌo-o ɛ -se bhubhuyiti -a yi ꞌbho a ꞌꞌbhli -zɔtɩzɔ -ko.
Ⅱ *Zeziiꞌa ꞌꞌdɩzɩgɩ-ɩ ꞌwlʋꞌa ꞌle -Lagɔ gbo -a -yaꞌa amʋꞌa dɩ, -ka nyʋ ꞌꞌjreeꞌa -amʋ ꞌle ʋn ꞌyeꞌa -amʋ nyanɩ ꞌmʋ kla ꞌgagwloka ꞌbho Filiipʋgwlɔ ꞌmʋ, a yiboꞌo-o ꞌna. Ɩ -nɩꞌa -kaa ꞌmʋ a, -Lagɔ ꞌꞌnyɩ-e -amʋ ꞌkpɩ, ꞌle, -aꞌba ꞌmʋnyɛmʋ ꞌmnʋꞌa -dadudu-u ꞌkaaꞌa -amʋ ꞌmʋ, -a ꞌye ʋ ꞌmʋ cɛ; ꞌle, Zeziiꞌa ꞌꞌdɩzɩgɩ-ɩ ꞌwlʋꞌa ɔ-bɔ -Lagɔ gbo, -a ꞌye ɩ amʋ -bodɩ ꞌmʋ-za.
Ⅲ A -gblee, ɛ -se bhebhe -a ꞌla nyʋ ꞌbho -Lagɔꞌɔ ꞌꞌyisrɛɛjolʋ ꞌꞌyi -ko. ꞌLe -pɔlʋꞌa ꞌꞌyisrɛɛɛ ꞌmʋ -a nʋ nɩꞌe ꞌɛ lbhʋtu.
Ⅳ A ꞌye li-ɔ, -Lagɔꞌɔ ꞌꞌbhuo ꞌcrɛ-ɛ -amʋ ꞌmʋti, ꞌle ɔ ꞌye -amʋ ꞌꞌkpi-gwɛ ꞌɔ lbhʋ -nɛɛꞌɛ damʋ, ꞌle ɔ ꞌye -amʋ ꞌɔ ꞌꞌyuꞌa ꞌꞌdɩzɩgɩꞌa nyʋbodɩmʋzalbhʋ ꞌꞌnyɩ ꞌle -a nʋ ɛꞌo. Ɛ -se nyunyuꞌa ꞌtʋnʋdɩ -a za ꞌmʋ -ko. -Lagɔꞌɔ -nɛ -abʋ-ʋ zaꞌa ꞌmʋ. Ɔbɔ, lɛ-ɛ -nɩꞌa ꞌle nyɔꞌɔ -pɔlʋ ꞌꞌkpi, ꞌɩnnɔ ꞌye ꞌɛ li.
Ⅴ ꞌKa-a ɩ -nɩꞌe ꞌmʋꞌa dɩ a, aꞌba ꞌꞌbhi yiboꞌo, dɩ -a -zaꞌa ꞌmʋ, ɩ se -mɩɛsrɛ gbɔꞌbhle. ꞌLe ɛ -se a ꞌke -amʋ lɛ ꞌꞌnyɩꞌa kamʋ -a -zɩ ɩ ꞌmʋ -ko. Lɩ ꞌɩn-ɩ ꞌcnɩꞌa -laa, -ka ɩ ꞌꞌduꞌa -ziadɩ, -Lagɔ yibo nɩ-oꞌo.
Ⅵ ꞌLe ꞌꞌbhalrɛɛke a, -bho a-bee -mnʋʋ popo ꞌgwlʋti ꞌle, a ꞌke -aꞌba ꞌꞌdɩ -za, ꞌɩnnɛ -a ꞌbɔꞌɔ tiꞌa? -Ale nyʋ -lrʋʋꞌa -nɛ? -Gba! -A -see ɛ tiꞌbɔ. Leelɛ -a ꞌke nyʋꞌa ꞌnynɩkpipoɛ -nʋ?
Ⅶ Ɩ -nɩꞌa -kaa ꞌmʋ a, *Zezii *Kliisɩꞌa -dalbhomʋ -a ꞌꞌduꞌa dɩ a, -a ꞌbhɛɛ ꞌkoꞌo -a ꞌke amʋ -klagbakpli ꞌꞌlrulinʋ ꞌle -abʋ -see ꞌɛ lɛtu nʋ. -Da -a -nɩꞌa ꞌbho a ꞌꞌbhli, -ka ꞌlotʋ ꞌbhleꞌa ꞌwa ꞌlimʋzayreetɩ, ꞌka-a -a ꞌyɔɔ -nɩꞌe amʋ kwa.
Ⅷ A -gblee, lɛ -ke dɩ -a -kmaꞌa aꞌba dɩ tenyɩ, ꞌɩnnɛ ꞌmo-o, Zeziiꞌa ꞌꞌdɩzɩgɩ-ɩ ꞌwlʋꞌa ꞌle -Lagɔ gbo, -a -zɩ ꞌɩ-ɩ amʋ -bodɩ ꞌmʋ: ɛ -se ꞌɛ ꞌꞌsɛꞌɛ dɩ -ko ꞌnɩ, aꞌba ꞌtʋ -nɩꞌe-e -amʋ ꞌmʋ tenyɩꞌa dɩ -abʋ sanꞌa ꞌꞌyi -a ꞌke -aꞌba tinɩɛ ꞌꞌyitiꞌꞌtayi ꞌle -a ꞌke ꞌbho aꞌba ꞌbɩ ꞌmʋ ꞌmɛ -nɩ!
Ⅸ ꞌBho ꞌɛ lemʋ a, ꞌlotʋꞌa ꞌꞌnynuu-a, -abʋ yiboꞌo-o, ꞌꞌyikmulbhʋ -a nʋꞌa ꞌbho a ꞌꞌbhli, a -see ꞌɛ dɩ ꞌmate. ꞌLe zɔ ꞌmʋ -a ꞌnʋ-o lbhʋ ꞌle glu-u gwɛꞌɛ -amʋ ꞌle -a -kaa amʋ -taniɛ bhʋ ꞌmʋ ꞌꞌdu ꞌle lɩ -lrɩɩ ꞌmʋꞌa dɩ, ꞌle, Zeziiꞌa ꞌꞌdɩzɩgɩ-ɩ ꞌwlʋꞌa ꞌle -Lagɔ gbo, -a ꞌye ɩ gboꞌꞌdudu, -a ꞌye ɩ amʋ -bodɩ ꞌmʋ-za.
Ⅹ Lɛ -a nʋꞌa ꞌbho, aꞌba ꞌꞌbhi yibo nɛ-oꞌo ꞌle -Lagɔ yibo nɛꞌo -lrɛɛ. A-bʋ ꞌma-a Zeziiꞌa ꞌꞌgwlidemʋ, kpli -a -nɩꞌa ti ꞌbho aꞌba ꞌꞌyigbeyi, ɩ -nmɔꞌɔ-ɔ ꞌꞌyrili. Lɛ-ɛ ꞌka ꞌle ꞌya ꞌꞌklumʋ ꞌꞌyrili-nyni, ɛ se -nɩ. ꞌƐ dɩ, nyɔ -see ꞌbho -aꞌba da ꞌꞌdu.
Ⅺ ꞌLe aꞌba ꞌwee -bodɩ, -ka -a nʋꞌa amʋ -zɩgɩ ꞌꞌlruli, a yiboꞌo-o ꞌna. Ɛ kɔɔꞌɔ-ɔ -ka ꞌꞌyreetɩꞌa -tɩta ꞌbhleꞌa ka ꞌɔ ꞌꞌyreetɩ.
Ⅻ -A ꞌpo-o amʋ ꞌkpa ꞌꞌyi, ꞌle, -Lagɔ ꞌlaꞌa amʋ, a ꞌyeꞌa ꞌle ꞌɔ -kɔmʋꞌa ꞌꞌklumʋ ꞌkpa ꞌle a -ke ɔ ꞌke ꞌɔ nyʋꞌa -kɔkɔɔꞌɔ ꞌnynɩꞌa ꞌꞌyibhɛɛɛ ꞌli -plɛ, aꞌba -nanabhʋ ꞌke ɔ ꞌtʋ nʋ.
ⅩⅢ -A ꞌpo-o aꞌba dɩ -Lagɔ ꞌsɛɛ -wlɛɛwlɛɛ, Zeziiꞌa ꞌꞌdɩzɩgɩ-ɩ ꞌwlʋꞌa ꞌle -Lagɔ gbo -a -zaꞌa amʋ -bodɩ ꞌmʋ, a ꞌwɩn ꞌɩ ꞌbɔ ɔ, a ꞌwɔɔn nɩ-oꞌo. ꞌƐ dɩ a deꞌe ꞌꞌgwli ꞌꞌdɩzɩgɩ ꞌmnɩ ꞌwlʋ-o -Lagɔ gbo -ziaka ꞌle a -see ɛ nyunyuꞌa wlu ꞌꞌyi-zrɛ -nɩ. ꞌƐ wɔnkuɛ -ke ɛ -naꞌa a, ɛ-ɛ ꞌnʋ-o a-bʋ Zeziiꞌa ꞌꞌgwlidemʋ lbhʋ ꞌmʋ.
ⅩⅣ A -gblee, ꞌlotʋꞌa ꞌꞌnynuu-a, a-bʋ -nɩꞌa Tesalonikɩ, Zezii Kliisɩꞌa -glɩgbawɔnyiꞌa nyʋ -Lagɔ -kɔꞌɔ -ʋ -nɩꞌa Zidee, lɛ-ɛ zi ꞌʋ -bodɩ, ꞌɩnnɛ ziꞌe amʋ -bodɩ -lrɛɛ. ꞌWa *-Bozuifʋ-ʋ ꞌklʋ -ʋ nyanɩ ꞌmʋ. -Ka -lue ꞌmnɔ, ꞌka-a aꞌba ꞌꞌbhiꞌa -gwlɔkɔmʋ nʋꞌo amʋ -lrɛɛ.
ⅩⅤ Ʋ-bʋ ꞌZuifʋ ꞌmnʋꞌa tɔlʋ ꞌlbha-a -Lagɔꞌɔ wluꞌa ꞌmʋtizamʋ -bɛnyɩ ʋn ꞌye ꞌmɛ, ꞌle -lrʋʋ ꞌye -aꞌba -Kɔyi Zezii ꞌlbha ɔ ꞌye ꞌmɛ -lrɛɛ, ꞌle -abʋ-aꞌa -nɔɔ ꞌꞌyiꞌa ꞌZuifʋtɔlʋ ꞌye -amʋ nyanɩ ꞌmʋ kla. Lɩ ʋn-ʋ nʋꞌa ꞌbho, ꞌya -lue komuꞌa nʋ -Lagɔ ꞌtʋ. Ʋn-ʋ ꞌmo-o nyʋ ꞌweeꞌa jɛkamʋ.
ⅩⅥ A ꞌye li-ɔ, ʋn-ʋ kɩka-a -amʋ ꞌꞌyiti, ꞌle, nyʋ-ʋ -seꞌa-a ꞌZuifʋ, -a -kʋʋ ʋ Zeziiꞌa ꞌꞌdɩzɩgɩ -bodɩ ꞌmʋ-za ꞌle ʋn ꞌke ꞌpʋn ꞌbho -Lagɔꞌɔ ꞌꞌyigbeyi, ꞌle ʋn se ɛ wɔnyiꞌbhɛɛ. ꞌTraamʋ ꞌtɔ ɔ, ꞌꞌnyinynidɩ ʋn nʋꞌa ꞌbho -Lagɔꞌɔ ꞌꞌyigbeyi, ɩ ꞌpɩple ꞌnʋ-ʋ ꞌꞌkpi. ꞌLe, -Lagɔꞌɔ ꞌcɛ ɔ -po ꞌnʋ kwa, ʋn -see ꞌɛ ꞌzɔ sɔkɔ yi.
ꞌPɔlʋꞌa -pɔlʋ ꞌwla-a Tesalonikɩkɔmʋ ꞌꞌyi ti ɔ ꞌke ʋ ꞌye
ⅩⅦ A -gblee, ꞌlotʋꞌa ꞌꞌnynuu-a, -a tɩtɛꞌɛ-ɛ gbo moꞌo -nɔɔtoope ti: ꞌan -pɔlʋ ꞌwla-a ꞌle a gbo ti. ꞌƐ dɩ aꞌba ꞌtʋ ꞌlbhaꞌa -amʋ tenyɩ ꞌle -a ꞌbɔꞌɔ ti -a ꞌke ꞌle le yi -a -ke a ꞌke ꞌyɩye.
ⅩⅧ ꞌMna-aꞌa ꞌꞌbhuo ꞌke ꞌle a gbo yi, ꞌɩn ꞌbhle-e ꞌɛ dɩ wɔnyi. ꞌƖn ꞌdɩn-e ꞌle a gboꞌa yiyia ti kpɛꞌɛ -dadudu ꞌle ꞌꞌnyinynidɩꞌa tiyayi *Sataanꞌa ꞌwɔn ꞌɩnmʋ -bodɩ.
ⅩⅨ ꞌLe ɛ ꞌmʋ a, ꞌlotʋꞌa ꞌꞌnynuu-a, -a ꞌbɔ-ɔ ti -a ꞌke amʋ ꞌꞌyidede, -ɛkedɩmaa, a-bee ꞌmo-o -aꞌba ꞌgwlʋꞌa ꞌꞌyikumʋ ꞌle a ꞌke ꞌle -Lagɔꞌɔ wlu ꞌli bhɩ glu po -ka -zɛgɛka, ꞌle, ꞌbho ꞌɛ ꞌꞌkpi a, aꞌba dɩ ꞌbʋbʋa-a ꞌlbhaꞌa -amʋ. ꞌLe, ꞌbho ꞌɛ ꞌꞌkpi -lrɛɛ, lbhʋ -a nʋꞌa ꞌle a -ke Zezii ꞌyeꞌa -na -ka -zɛgɛka, ɛ -nmɔꞌɔ-ɔ ꞌꞌyriliꞌa dɩ, -a ꞌye ꞌnynɩ ꞌwlʋ mʋ aꞌba dɩ. Ɛ -se ꞌꞌsesinyʋꞌa ꞌꞌsɛꞌɛ dɩ -ko. Aꞌba ꞌꞌbhiꞌa dɩ moꞌo -lrɛɛ. Zɔ -ke ti, -aꞌba -Kɔyi *Zezii *Kliisɩ-ɩ ꞌyeꞌa ꞌnɔɔ ꞌkmʋ ꞌmʋ le -yi mʋ ꞌbho ꞌɔ ꞌꞌyigbeyi, ꞌbho-o ꞌɛ lɛtu ꞌke -nʋ-ɛ -nɩ ꞌle -gasɩ ꞌke -amʋ li-sɔ aꞌba dɩ.
ⅩⅩ -Ziadɩ moꞌo, aꞌba dɩ -gasɩ -sɔꞌɔ -amʋ li ꞌle ꞌbʋbʋa-a ꞌlbhaꞌa -amʋ.