Ⅳ
-Lagɔꞌɔ ꞌtʋnʋkpli
Ⅰ ꞌBho ꞌɛ lemʋ a, ꞌlotʋꞌa ꞌꞌnynuu-a, kpli a ꞌka ꞌmʋ-na -nɩ ꞌle ɩ ꞌka -Lagɔ ꞌtʋ nʋ, -a -tɔ ꞌnɩ amʋ-ɛ -zɔtɩzɔ. -Aꞌba -tɔtɔlɩ ꞌmnɩ, -a ꞌde-e ꞌꞌgwli a -de ꞌnɩ-ɩ ꞌmʋ ti -ziaka. ꞌTraamʋ ꞌtɔ ɔ, -aꞌba -Kɔyi *Zeziiꞌa ꞌnynɩ ꞌmʋ -a cɛꞌɛ amʋ ꞌgbɛ kwa ꞌmʋ, ɩ-bɩ kplizɩgɩ a-a nʋꞌa, a ꞌke ɩ ꞌꞌlru-mu ꞌle ɩ ꞌke ꞌꞌkpiꞌkpa.
Ⅱ Kpli a ꞌka ꞌmʋ-na -nɩ -a -tɔꞌɔ amʋ, a yibo nɩ-oꞌo. Ɩbɩ ꞌmnɩ, ꞌɩnnɩ -aꞌba -Kɔyi Zezii nʋꞌo nyʋ nʋ.
Ⅲ A -gblee, -Lagɔ ꞌbɔ-ɔ ti a ꞌke ꞌꞌyisrɛɛmʋ ꞌꞌdu ꞌbho ꞌɔ ꞌꞌyigbeyi ꞌle ɔ ꞌke aꞌba nyɔꞌꞌo nyɔ -kɔ ꞌꞌfɩa ꞌwee. ꞌƐ dɩ aꞌba ꞌla ꞌꞌbhɩ ꞌꞌbhlɛcɛ -le!
Ⅳ ꞌƖn-ɩ ꞌtmʋʋꞌo amʋ-ɛ, -bho aꞌba nyɔꞌꞌo nyɔ ꞌke ꞌnynɔ kpa a, ɔ -kpa nʋ ꞌle dɩlikpʋɛn ꞌmʋ ꞌle ɔ ꞌke ʋ ꞌꞌyi-kpʋn nyʋ -kaa ꞌbho aꞌba da ꞌꞌdu ꞌle ɛ ꞌke -Lagɔ ꞌtʋ nʋ.a ƆFa4 4 Nyɔ ꞌbhɛɛꞌo ɔ ꞌke -kaa ꞌlɛ -lrɛɛ: ꞌƖn-ɩ ꞌtmʋʋꞌo amʋ-ɛ, aꞌba nyɔꞌꞌo nyɔ ꞌbhɛɛ ꞌɔ ꞌꞌbhuo wɔnyi ꞌle ɔ ꞌke dɩ likpʋn ꞌle ɔ ꞌke ꞌbho ꞌɔ ꞌꞌbhuoꞌa ku ꞌbho ꞌꞌdu nyʋ -kaa ꞌbho ꞌɔ da ꞌꞌdu ꞌle ɛ ꞌke -Lagɔ ꞌtʋ nʋ.
Ⅴ Aꞌba ꞌꞌtayi aꞌba ꞌꞌbhi ꞌꞌyiti aꞌba ꞌwlaa ꞌꞌwɩlɩɛ wɔnti -le! Nyʋ-ʋ seꞌa -Lagɔ yibo a, ʋn-ʋ ꞌnʋ-o -kaa a, a-bee -mnʋʋ se ɛ nʋka -nɩ.
Ⅵ Nyɔꞌɔ nʋ ꞌɔ -bonyunyɔ ꞌꞌnyinynidɩ ꞌꞌlruli -le ꞌle ꞌnynʋkpakpɩꞌa bo ꞌli! Aꞌba -ke a -bonyunyɔꞌɔ ꞌnynɔꞌɔ ꞌꞌdu ꞌꞌbha -le! -A ꞌwɩ -ɩ amʋ ꞌꞌyiti see, -aꞌba -Kɔyi Zezii -see ꞌꞌnyinynidɩ tiꞌbɔ. Nyɔ-ɔ nʋ ꞌɩ a, ɔ-ɔ ꞌyɔ -ɔ ꞌkleyeɛɛ ꞌꞌkpi.
Ⅶ A -gblee, -Lagɔ -see -amʋ ꞌla ꞌɔ ꞌꞌyreetɩꞌa kamʋ ꞌle -a ꞌke ꞌꞌwɩlɩ. Ɔ ꞌlaꞌa -amʋ-ɛ ꞌle -a ꞌke ꞌꞌyisrɛɛmʋ ꞌꞌdu ꞌbho ꞌɔ ꞌꞌyigbeyi ꞌle ɔ ꞌke -aꞌba nyɔꞌꞌo nyɔ -kɔ ꞌꞌfɩa ꞌwee.
Ⅷ ꞌKa-a ɩ -nɩꞌe ꞌmʋꞌa dɩ, nyɔ -yɔ -seeꞌa wlu -nɩɩ -lokuipo, ɛ -se nyunyuꞌa wlu ɔ -see ꞌbho ꞌꞌdu -ko. -Lagɔ poꞌa -ɩnmʋ *ꞌɔ Lisaazuzu ꞌmʋ, ꞌɩnnɔ -ɩn ꞌkpɩkpɩaꞌa li.
Ⅸ A ꞌye li-ɔ, ꞌlotʋꞌa ꞌꞌnynuu-a, ꞌbho dɩkɩkmɛɛꞌɛ ꞌꞌkpi a, ꞌɩn se lɛ ꞌbhle ꞌɩn ꞌke amʋ -bodɩ ꞌmʋ-za -lrɛɛ, -ɛkedɩmaa, -Lagɔ -mnɔɔꞌɔ ꞌꞌbhuo-o -tɔꞌɔ amʋ ꞌɛ -jolʋ.
Ⅹ Zeziiꞌa nyʋ -ke a -plɛꞌɛ ꞌbho Masedʋanɩbhlʋkpa ꞌꞌkpi, a -kmaꞌa-a ꞌwa dɩ ꞌꞌfɩa ꞌwee -ziaka. ꞌBho ꞌɛ lemʋ a, -a ꞌpo-o amʋ ꞌkpa ꞌꞌyi: A kuku ꞌmʋti aꞌba dɩkɩkmɛɛ ꞌke ꞌꞌkpiꞌkpa.
Ⅺ-Ⅻ ꞌKla ꞌmnɔ, ꞌka-a -a -zɩ ꞌɩ amʋ -bodɩ ꞌmʋ see, a po aꞌba ꞌꞌbhi -zuzu ꞌmʋ ꞌle a -kaa nyʋ zɛ ꞌmʋ tiꞌbɔ! Aꞌba -bonyunyuꞌa dɩ-ɩ seꞌa amʋ ꞌꞌyiꞌꞌtuu, aꞌba zi ꞌya dɩ -le! Aꞌba ꞌꞌbhi nʋ lbhʋ, aꞌba ꞌpɛɛ aꞌba -bonyunyu ꞌmʋ, ꞌwa ꞌꞌnyɩ amʋ lilia -le! A -gblee, -bho a -ka -kaa-a nʋ a, nyʋ-ʋ -seꞌa-a Zeziiꞌa nyʋ, ʋn-ʋ ꞌꞌduꞌo ꞌbho amʋ-ɛ.
-Aꞌba -Kɔyi *Zeziiꞌa leyinɔɔ
ⅩⅢ ꞌBho ꞌɛ lemʋ a, ꞌlotʋꞌa ꞌꞌnynuu-a, -a ꞌbɔ-ɔ ti, *Zeziiꞌa nyʋ-ʋ ꞌmɛꞌɛ ɛ, a ꞌke ꞌwa ꞌꞌkpidɩ yibo, ꞌle, nyʋ-ʋ seꞌa Zezii yibo ꞌle -ʋ -see ꞌɔ ꞌgwlʋ ꞌꞌyi -ku, -bho ꞌwa nyɔ ꞌmɛ, kpli ʋn-ʋ nʋꞌa a, a -kaa -kaa nʋ.
ⅩⅣ -A ꞌde-e ꞌꞌgwli ꞌwee Zezii ꞌmɛ-ɛꞌo ꞌle ɔ ꞌye glu -sɔ ꞌle ɔ ꞌye ti-nɩ -lrɛɛ; -ka -lue ꞌmnɔꞌɔ dɩ a, nyʋ-ʋ de ꞌɔ ꞌꞌgwli, -ʋ ꞌmɛꞌɛ ɛ, a de ꞌꞌgwli -Lagɔ-ɔ ꞌye -ʋ Zezii ꞌgbaa -mʋ ꞌle ʋn ꞌke ti-nɩ -lrɛɛ!
ⅩⅤ A -gblee, zɔ -ke ti -aꞌba -Kɔyi Zezii-i ꞌyeꞌa ꞌnɔɔ ꞌkmʋ ꞌmʋ le -yi mʋ a, -a-bʋ -yʋ -seeꞌa ꞌmɛ ꞌbho ꞌɛ -nɔɔ ꞌꞌyi a, ɛ -se -a-bʋ ꞌke ꞌmɛmʋꞌa nya -kɔ -ko. Dɩ -ke dɩ -a waꞌa -laa amʋ ꞌꞌyiti, ꞌɩnnɩ -aꞌba -Kɔyi Zezii -tɔꞌɔ -amʋ.
ⅩⅥ -Bho ꞌɛ zɔtu nyni a, -bho -Lagɔ ꞌla ɔ gboꞌa -dalbhomʋ, nyʋ-ʋ -nɩꞌa ti-i ꞌye -ɩ ꞌbʋꞌwɔn -mʋ, ꞌwa -klagba-a ꞌꞌsri ꞌʋ ꞌꞌyi-i ꞌye-e wlu yayi -po -mʋ vevlele! ꞌle ʋn ꞌke -Lagɔꞌɔ lɛglɩ bhla, ꞌle -aꞌba -Kɔyi Zezii *Kliisɩꞌa ꞌꞌbhuo ꞌke ꞌle yaku ꞌli ꞌwlʋ. Nyʋ-ʋ de ꞌɔ ꞌꞌgwli -ʋ ꞌmɛꞌɛ ɛ, ꞌle ʋn ꞌke glusɔmʋꞌa nyamna ꞌꞌdu.
ⅩⅦ -A-bʋ -nɩꞌa ti-e nyʋ-ʋ ꞌmɛꞌɛ-e ꞌle -Lagɔ ꞌke -amʋ gbobhete ꞌle yakuꞌa -druku ꞌli. ꞌꞌLemnɩɩ -aꞌba ꞌwee-e ꞌmu-o -aꞌba -Kɔyi Zezii -jeyi ꞌle -a -ke ɔ ꞌke ꞌyɩye ꞌle yakutrubo. ꞌꞌLemnɩɩ ꞌtɔ ɔ, -da ɔ -nɩꞌa a, ꞌbho-o -aꞌba ꞌwee -ke ɔ-ɔ ꞌye -nɩ mʋ ꞌꞌkɔmʋ.
ⅩⅧ ꞌƖnnɩ ꞌbhleꞌe ꞌnynɩꞌa dɩ a, ꞌlotʋꞌa ꞌꞌnynuu-a, a kpʋkpa wlu ꞌmʋti ꞌle a ꞌke ꞌkpa ꞌꞌyipopo!