ⅩⅩ
-Kpaalbhʋzemʋ
Ⅰ *Zezii poꞌa wlu ꞌmnɛ ti a, ɔ ꞌpo-o ꞌꞌyi -lue ꞌbho lbhʋnʋmʋ ꞌꞌkpi ꞌle ɔ na: Lɛ -ke -Lagɔꞌɔ nyʋꞌa -kɔkɔɔ gʋgɔꞌɔ ꞌꞌyiti, ꞌɩnnɛ ꞌka-a: -Kpaayowli -lue ꞌda-oꞌo zɔwɔnyi, ɔ ꞌye lbhʋnʋmʋ tibɔnamʋ mu, ʋn ꞌke ꞌɔ -lololɩ ꞌzɔti ꞌbhɩsɛ.
Ⅱ Ɔ ꞌye ꞌʋ a, ɔ -ke ʋn bhagaꞌo zɔ -lue ꞌzɔꞌɔ mɔni ꞌꞌkpi. Wlu ꞌbhɛɛꞌɛ ꞌmʋ ꞌle ɔ ꞌye ʋ ꞌle lbhʋ ꞌꞌyi kpa.
Ⅲ -Drumayrʋvlaan ꞌmʋ ɔ -ka mu ꞌbho lbhʋtibɔmʋꞌa ꞌꞌlrugbʋʋnamʋ, nyʋ -lrʋʋ -nɩꞌe-e ꞌbho, ʋn se lɛ nʋnamʋ -nɩ.
Ⅳ Ɔ na: A mu a ꞌke ꞌle ꞌan -kpaa ꞌmʋ lbhʋ nʋ ꞌle ꞌɩn ꞌke amʋ -ka -zɛgɛka ꞌꞌpɛle, ꞌle ʋn ꞌye mu.
Ⅴ ꞌYrʋ nyniꞌa ꞌꞌduu ꞌmʋ -kpaayowli ꞌmnɔ ꞌda-aꞌo ɔ ꞌye -kaa nʋ -lrɛɛ. ꞌLe ꞌꞌjiazɔyrʋklagba ꞌmʋ ɔ ꞌnʋ-o -kaa -lrɛɛ.
Ⅵ ꞌꞌJiazɔyrʋ muꞌa ꞌꞌyitiꞌtepo mʋ, ꞌka-a ɔ nʋꞌo -lrɛɛ, ɔ ꞌye gbɔmʋbhɔɔmʋ -yɛ. Ɔ dede ꞌnʋ-ʋ ti: Leedɩ a -see lbhʋ nʋ ꞌle glu-u gwɛꞌɛ?
Ⅶ ꞌLe ʋn na: Nyɔ -see -amʋ lbhʋ ꞌꞌnyɩꞌa dɩ moꞌo. ꞌLe ɔ na: A mu ꞌle ꞌan -kpaa ꞌmʋ a ꞌke lbhʋ nʋ.
Ⅷ ꞌꞌJiazɔyrʋꞌa -gbɔtʋ -cɛꞌɛ ꞌbho, -kpaayowli ꞌmnɔ ꞌla-a ꞌɔ ꞌꞌbɔgʋyiboyi -ɔ ꞌꞌpɛleꞌa nyʋ-ʋ nʋꞌa lbhʋ, ɔ na: ꞌLa lbhʋzemʋ ꞌle -ɩn ꞌke ʋ ꞌꞌpɛle. Nyʋ-ʋ ꞌbhɔɔꞌɔ gbɔ ꞌmʋ, ꞌnyaa nʋ ꞌmʋ, ꞌle, -yʋ ꞌnyaaꞌa ꞌbho, -ɩn ꞌke ʋ ꞌꞌkpi ꞌꞌyi-gwɛ -nɩ.
Ⅸ ꞌꞌJiazɔyrʋ ꞌtepoꞌa ꞌꞌyiti, nyʋ-ʋ yiꞌa ꞌye-e ꞌwa zɔ -lue ꞌmʋ mɔni.
Ⅹ Nyʋ -yʋ yiꞌa lbhʋ ꞌmʋ see ꞌyeꞌa nyʋ ꞌmnʋ li, ʋbʋ na ʋn-ʋ ꞌye ꞌko-o ꞌꞌyidiemɔni ꞌye -mʋ. Ʋn muꞌa ꞌle -gbʋ mʋ, -ka -lue ꞌmnɔ ꞌka-a ʋn ꞌyeꞌo -lrɛɛ.
Ⅺ ꞌBho mɔni ꞌmnɩꞌa kpʋnnamʋ nyʋ-ʋ -gwɛꞌɛ glu ꞌkpa-a -kpaayowli dɩ ꞌꞌyi, na:
Ⅻ -A-bʋ sɩaꞌa ꞌyrʋwɔn ꞌmʋ, leedɩ -a -ke nyʋ-ʋ yiꞌa ꞌtraamʋ ꞌbhɛɛꞌɛ mɔni ꞌmʋꞌa?
ⅩⅢ ꞌLe -kpaayowli ꞌye -kaa ꞌwa -lue ꞌꞌyiꞌlɛ: ꞌƖn bha, ꞌɩn -see -ɩnmʋ ꞌꞌyrabha ꞌli -po. -Ɩn ꞌka lbhʋ ꞌꞌyi kpa, mɔni -aꞌa ꞌꞌbhuo ꞌwɔɔnꞌɔ ꞌꞌyi, ꞌɩnnɛ ꞌɩn ꞌꞌnyɩꞌe -ɩnmʋ, ꞌkla -ko?
ⅩⅣ ꞌꞌLuo -aꞌa mɔni ꞌmʋ, -ɩn ꞌke mu. Nyɔ -yɔ yiꞌa -laa -lreeka a, -ka -ɩn ꞌyeꞌa, ꞌka-a ɔ ꞌke ꞌye.
ⅩⅤ ꞌAn ꞌꞌbhuoꞌa ꞌꞌyiglɛmɔni, -ka ꞌɩn ꞌbɔꞌɔ ti, ꞌka-a ꞌɩn ꞌke ɛ nʋ -ko? ꞌAn dɩꞌa ꞌꞌyrilinmɔɛꞌɛ ꞌꞌmʋnynɩ -a nʋꞌa?
ⅩⅥ ꞌLe Zezii na: A -gblee, -ka ɛ ziꞌa ꞌbho nyʋ ꞌmnʋꞌa ꞌꞌkpi, -ka -lue ꞌmnɔ, ꞌbho -Lagɔꞌɔ damʋ, ꞌka-a ɛ ꞌye ꞌmʋ-nɩ mʋ. -Klagba -ke -toope -see -nɩ yi. Ɛ -se ꞌbho ꞌwa lbhʋꞌa ꞌꞌyigwlekamʋ, -zɛgɛ -Lagɔ ꞌkʋ ʋ ꞌꞌlrulinʋ, ɛ ꞌke ꞌꞌyiꞌbhɛ ꞌle ɛ ꞌke gbɔmʋbhɔɔmʋꞌa nɛ ꞌmʋ-zi -ko, ꞌle ɛ -se ꞌwa gbɔmʋbhɔɔkamʋ ɔ ꞌke ꞌwa -zɛgɛ ꞌꞌyiꞌꞌpli -ko -lrɛɛ.
*Zeziiꞌa ꞌmɛmɛɛ -ke ꞌɔ glusɔɛꞌɛ dɩꞌa ꞌmʋzɛɛꞌɛ kpɛ tannɛ ꞌka-a
(Maakɩ 10:32-34; Luukɩ 18:31-34)
ⅩⅦ Ɩ ziꞌa -kaa a, *Zezii -ke *ꞌɔ -namʋ ꞌkpa-a -jeyi, ʋn-ʋ ꞌmu-o Zelizalɛɛmʋ. Ʋn -nɩ munamʋ, ɔ -ke ꞌɔ -namʋ -cɛꞌɛ li. Ʋn -nɩ -nanamʋ ꞌle ɔ-ɔ ꞌtmʋʋ nʋꞌo:
ⅩⅧ A -gblee, ꞌle Zelizalɛɛmʋ ꞌnɔɔ -a -nɩꞌa munamʋ, ꞌɩnmɔ *Nyunyɔꞌɔ ꞌꞌYu, ꞌle ꞌmnɔ ꞌle-e ʋn-ʋ ꞌye ꞌɩnmʋ nyʋ -jeyi ꞌꞌnyɩ -nɩ mʋ, *-Lagɔꞌɔ ꞌsragazamʋklɩgbɩ -ke *ꞌɔ gbaꞌa yibomʋ ꞌꞌwe ʋn-ʋ ꞌye ꞌɩnmʋ -jeyi ꞌꞌnyɩ mʋ. Ʋn-ʋ ꞌye-e ꞌɩnmʋ dɩ ꞌꞌkpi ꞌꞌduu -mʋ ꞌle ʋn ꞌke -kaa ꞌlɛ: Ɔ ꞌke ꞌmɛ moꞌo!
ⅩⅨ ꞌLɩkpʋ -ʋ -nɩꞌa Zelizalɛɛmʋ, -ʋ seꞌa -Lagɔ yibo, ꞌɩnnʋ ʋn-ʋ ꞌye ꞌɩnmʋ -jeyi ꞌꞌnyɩ mʋ. Ʋbʋ ꞌmnʋ-ʋ ꞌye-e ꞌɩnmʋ ꞌcɩsɛ -mʋ, ʋn-ʋ ꞌye-e ꞌɩnmʋ ꞌꞌsɛɛn -mʋ, ꞌle, tu -ke ꞌꞌyri ʋn-ʋ ꞌlbha nɩꞌa ꞌꞌku, ʋn ꞌke ꞌɩnmʋ ꞌbho kɔ ꞌle ꞌɩn ꞌke ꞌmɛ. -Bho ꞌɩn ꞌmɛ, -bho ʋn nmaze ꞌɩnmʋ ti, ꞌan ꞌmɛwɩ tanꞌa zɔ -Lagɔ ꞌke ꞌɩnmʋ glu -za, ꞌɩn ꞌke ti-nɩ -lrɛɛ. ꞌKa-a Zezii ꞌlʋ ꞌʋ ꞌꞌyi.
Zaakɩ -ke *ꞌZaanꞌa ꞌlotʋꞌa bhadewlu
(Maakɩ 10:35-45)
ⅩⅩ ꞌBho ꞌmnɔ ɔ, Zebedeeꞌa ꞌꞌyreetɩ, Zaakɩ -ke *ꞌZaan -ke ꞌwa ꞌlotʋ ꞌnyni-e *Zezii li, ʋn ꞌyi-e ꞌzɔ ꞌbho ꞌɔ wɔnyi ꞌle ꞌwa ꞌlotʋ ꞌke ɔ lɛ ꞌybhaa.
ⅩⅪ Ɔ na: Leelɛ a ꞌybhaꞌa? ꞌLe ʋn na: -Bho -aꞌa nyʋꞌa -kɔkɔɔnɔɔ nyni a, ꞌwɔn ꞌan ꞌꞌyreetɩ ꞌsɔn -nʋʋ, ꞌbho -aꞌa ꞌzɔnyʋklɩgbɩ -ʋ ꞌka -ɩnmʋ ꞌꞌyi kɔ ɔ, ʋn ꞌke ʋ ꞌꞌdu ꞌle ʋn -ke -ɩn ꞌke nyʋ -kɔ.
ⅩⅫ ꞌLe ɔ na: Lɛ a-a ꞌybhaꞌa, a yibo ꞌɛ ꞌzɔ ꞌnɩ? ꞌLe ɔ ꞌye ꞌwa ꞌꞌyreetɩ gbo ꞌꞌbhiti, ɔ na: ꞌƖn-ɩ dede-e amʋ ti, -ka ꞌɩn-ɩ ꞌyeꞌa ꞌkleyeɛɛ ꞌmʋ -zi -nɩ mʋ ꞌle ꞌɩn ꞌke ꞌmɛ, a ꞌbhɛɛ nɛ ꞌnɩ? Ʋn -nɩ ꞌsɔn na: -A ꞌbhɛɛ nɛ-oꞌo!
ⅩⅩⅢ ꞌLe ɔ na: -Ka ꞌɩn ꞌka ꞌkleyeɛɛ ꞌmʋ -zi -nɩ ꞌle ꞌɩn ꞌke ꞌmɛ, ꞌka-a a ꞌke ɛ ꞌmʋ -zi -nɩ ꞌle a ꞌke ꞌmɛ. Ɛ -nɩꞌa -kaa ꞌmʋ a, ꞌbho lɛ -yɛ a ꞌybhaꞌa -laaꞌa damʋ, ꞌɩn se ꞌbho ꞌɛ ꞌꞌkpi wlu ꞌbhle, -bho ɛ -se -Lagɔ -nɩ -lue ꞌtɩn. ꞌAn ꞌzɔꞌɔ nyʋklɩgbɩ -ʋ ꞌka ꞌɩnmʋ ꞌꞌyi kɔ ɔ, ꞌle ꞌɩn -ke ʋn ꞌke nyʋ -kɔ ɔ, ɔ -zʋ ꞌʋ-ʋ ꞌbho see.
ⅩⅩⅣ *Zeziiꞌa -namʋ -bue -yʋ -sieꞌa ꞌbho ꞌwɔnꞌɔ wlu ꞌmnɛ ꞌbɔ ɔ, ʋn -poꞌo-o ʋ-bʋ ꞌlotʋꞌa ꞌꞌnynuu ꞌsɔn ꞌmnʋ ꞌcɛ -kwa,
ⅩⅩⅤ ꞌle ɔ ꞌye ꞌwa ꞌwee ꞌla ɔ ꞌke ʋ ꞌtmʋʋ ꞌle ɔ na: A yiboꞌo-o ꞌbhlɩkpɩꞌa -yowli ꞌꞌwe ꞌbhle-e nyʋ ꞌwa wɔnzika ꞌle ꞌwa nyʋklɩgbɩ-ɩ nʋ nɩꞌe ꞌbho nyʋ ꞌꞌkpi wɔnkuɛ.
ⅩⅩⅥ A-bʋ -yʋʋ, ꞌle aꞌba ꞌꞌklumʋ ꞌɛ lɛtuꞌa -nʋ-ɛ -le! ꞌLe aꞌba ꞌꞌklumʋ nyɔ -yɔ ꞌbɔꞌɔ ti ɔ ꞌke aꞌba -klagba ꞌꞌdu, ɔ ꞌꞌdu ꞌbho aꞌba klɛ kplokplo ꞌle ɔ ꞌke aꞌba ꞌzɔꞌɔ lbhʋnʋyi ꞌꞌdu.
ⅩⅩⅦ -Yɔ ꞌbɔꞌɔ ti ꞌle aꞌba ꞌꞌklumʋ -lrɛɛ ɔ ꞌke amʋ -kɔ ɔ, ɔ -ya ꞌɔ ꞌꞌbhuo ꞌzɔ ɔ ꞌke aꞌba klɛꞌɛ ꞌgeyikpaan ꞌꞌdu.
ⅩⅩⅧ ꞌƖnmɔ *Nyunyɔꞌɔ ꞌꞌYu, ꞌka-a ꞌɩn -nɩꞌo -lrɛɛ. Ɛ -se nyʋ ꞌke ꞌɩnmʋ lbhʋ -bodɩ nʋ, ꞌɛ dɩ ꞌɩn yi ꞌnɔɔ ꞌkmʋ ꞌmʋ -ko; ꞌɩn yi-oꞌo ꞌɩn ꞌke nyʋ lbhʋ -bodɩ nʋ ꞌle ꞌɩn ꞌke nyʋ ꞌꞌweꞌa -zɛgɛꞌɛ dɩ ꞌmɛ. -Bho ꞌɩn ꞌmɛ ɛ, ꞌbho -Lagɔꞌɔ ꞌꞌyigbeyi ꞌꞌnyinynidɩ kpʋn ꞌʋ ꞌgeyiɛ ꞌmʋ, ꞌɩn ꞌke ʋ ꞌle ɩ ꞌmʋ zetie. ꞌƐ dɩ ꞌɩn yiꞌe ꞌnɔɔ ꞌkmʋ ꞌmʋ.
*Zezii ꞌpʋʋnꞌo-o ꞌꞌlɔmʋ ꞌsɔn
(Maakɩ 10:46-52; Luukɩ 18:35-43)
ⅩⅩⅨ A -gblee, *Zezii -ke *ꞌɔ -namʋ -nɩ -gwlɔ ʋn-ʋ ꞌlaꞌa Zelikoo ꞌmʋcɛnamʋ ꞌle nyʋꞌa -dadudu-u na ꞌnɔ kli. Ʋn muꞌa gwlɔ ti-gwɛ mʋ,
ⅩⅩⅩ ꞌꞌlɔmʋ ꞌsɔn -deꞌe-e ꞌbho -jolʋwɔnli ti. Ʋn ꞌwɔnꞌɔ ꞌbɔ Zezii -nɩꞌe zinamʋ, ʋn -nɩ ꞌsɔn ꞌꞌwɔ -nɩꞌe-e -dalue ꞌle ʋn na: -Aꞌba -Kɔyi Zeziiꞌɔ! ꞌBhlʋkpayowli *Daviidɩꞌa ꞌꞌnayuꞌɔ! ꞌYe -aꞌba ngaze ɔɔ!
ⅩⅩⅪ ꞌLe nyʋ -ʋ -dieꞌa -kaa ꞌmʋ -ʋ -nɩꞌa ꞌbho -nanamʋ-ʋ ꞌkaa ꞌnʋ ꞌmʋ: -Ɔɔ! A ꞌbhɔ zrɛ ke! ꞌLe ʋn ꞌye ꞌbho ꞌkpa -lrɛɛ ʋn ꞌye ꞌꞌwɔ tenyɩ: -Aꞌba -Kɔyi Zeziiꞌɔ! ꞌBhlʋkpayowli *Daviidɩꞌa ꞌꞌnayuꞌɔ! -Alele! ꞌYe -aꞌba ngaze ɔɔ!
ⅩⅩⅫ Zezii ꞌwɔnꞌɔ ꞌwa wlu ꞌbɔ ɔ, ɔ -nynaꞌa-a ti ꞌle ɔ ꞌye ʋ ꞌla: A yi! Ʋn yiꞌa a, ꞌle ɔ ꞌye ʋ tidede: Leelɛ a ꞌybhaꞌa ꞌɩn ꞌke amʋ -bodɩ nʋꞌa?
ⅩⅩⅩⅢ ꞌꞌLɔmʋ ꞌsɔn ꞌmnʋ na: -Aꞌba -Kɔyi, -a ꞌybha-oꞌo -aꞌba ꞌꞌyri ꞌke kati.
ⅩⅩⅩⅣ Ɔ -gbʋ ꞌnʋ ya, ngaze ꞌlbhɔ -ɔꞌo tenyɩ ꞌle ɔ ꞌye ꞌwa ꞌꞌyri liꞌtʋ ʋn ꞌke tiꞌye. ꞌBho -gbaa -lue ꞌmʋ nyʋ ꞌsɔn ꞌmnʋ ꞌpʋn-oꞌo ꞌle ʋn ꞌye ꞌbho ꞌkpa ʋn-ʋ na ꞌnɔ kli.