Ⅶ
-Aꞌa -tu -ɩn -bonyunyu -zigle -le!
(Luukɩ 6:37-38, 41-42)
Ⅰ A -gblee, *Zezii ꞌpo-o ꞌꞌyi ꞌle ɔ na: -Aꞌa -tu -ɩn -bonyunyɔ -zigle -le, ꞌle -Lagɔ -kaa -ɩnmʋ -zigle -tu!
Ⅱ -Ka ɛ -nɩꞌa, -gʋʋʋn ꞌye ɛ ꞌna, ꞌka-a ɛ -nɩꞌo ꞌle -dɩan ꞌwlɛ ꞌɛ ti.
Ⅲ -Bho aꞌba ꞌꞌbhi nʋ dɩklɩgbɩ, a-a po ꞌnɩ-ɩ ꞌꞌyriti. -Bho ɛ ꞌꞌdu a -bonyunyɔ nʋ dɩtoope, ꞌꞌlemnɩɩ a-a ꞌꞌtɩtra-a li a ꞌke ɔ -zigle -tu. ꞌKa se ꞌꞌyrili-nmɔ.
Ⅳ -Ɩnmɔ ꞌꞌyri ꞌꞌkanyɩ kpʋnꞌa tenyɩ a, -ɩnmɔ nʋꞌo -ɩn -bonyunyɔ -za ꞌꞌkanyɩ ꞌꞌyri ꞌmʋꞌa?
Ⅴ -Mɩɛ ꞌsɔnꞌɔ ꞌbhleyi, nmaze -aꞌa ꞌꞌbhuo -tanyɩ ꞌle -ɩn ꞌke -aꞌa -bonyunyɔꞌɔ nɩꞌa ꞌbɩ ꞌye.
Ⅵ Zezii ꞌpo-o ꞌꞌyi -lrɛɛ, ɔ na: Gbi se ꞌnynɩbhlelɛꞌɛ dɩ ꞌꞌyri yibo ꞌle -ɩn ꞌke ɩ ɛ ꞌꞌnyɩ. -Bho -ɩn nʋ, -ɩn ꞌke ɩ ɛ wɔn ꞌꞌyi -za a, ɩ ꞌbhɛɛꞌo ɩ ꞌke -ɩnmʋ nmu. -Ka -lue ꞌmnɔ ꞌka-a -gwlɔbhee se ꞌnynɩbhlelɛꞌɛ dɩ ꞌꞌyri yibo -lrɛɛ, ꞌle -ɩn ꞌke ɩ ɛ ꞌꞌnyɩ, ya-a na ꞌnɛ-ɛ ꞌꞌkpi. ꞌƐ ꞌzɔ-ɔ ꞌmo-o: ꞌBho lɛꞌꞌo lɛꞌɛ damʋ, ꞌbhle -naagɩ! Lɛ-ɛ ꞌma-a -aꞌa ꞌꞌyisrilɛzɛgɛ, -aꞌa -za ꞌɛ dɩ nyɔꞌꞌo nyɔ -bodɩ ꞌmʋ -le ꞌyrɛlɛɛ!
-Tɔtɔɔ ꞌbho *-Lagɔꞌɔ wɔngbopoɛ ꞌꞌkpi
(Luukɩ 11:9-13)
Ⅶ A -gblee, *Zezii na: -Bho -ɩn -ka *-Lagɔ wɔn gbo-o po, ꞌkpɩꞌa -wa -ɩnmʋ ꞌꞌyiti -le! -Ka, -bho -ɩn bhɔtɔ ꞌbho -buduwɔn ꞌꞌyi, ʋn-ʋ ꞌyeꞌa ꞌbho kati mʋ a, ꞌka-a, -bho -ɩn ꞌybhaa -Lagɔ lɛ ꞌle ɔ ꞌke ɛ -ɩnmʋ ꞌꞌnyɩ. -Bho -ɩn ꞌbɛ ɛ ti a, -a ꞌye -ɛꞌo.
Ⅷ A ꞌye li-ɔ, -bho nyɔ ꞌybha lɛ, ꞌle -Lagɔ-ɔ ꞌꞌnyɩ ɔ ɛꞌo. -Bho -ɩn ꞌbɛ ɛ ti, -a ꞌye -ɛꞌo.
Ⅸ ꞌLe aꞌba ꞌꞌklumʋ, yrɔɔ, -bho -ɔ -ke ꞌꞌyu ꞌybhaꞌa ꞌꞌflɔɔ ɔ, -ɔ zaꞌa ꞌle sʋkpʋ -ɔ ꞌꞌnyɩ ꞌɔ!
Ⅹ ꞌLe yrɔɔ -ke ꞌꞌyu, -bho -ɔ ꞌybhaa ꞌɔ -tɩta zmi, -ɔ zaꞌa ꞌle sɛn -ɔ ꞌꞌnyɩ ꞌɔ?
Ⅺ A-bʋ ꞌma-a ꞌlimʋꞌa wɔnnynimʋ, a-bʋ yiboꞌa lɩzɩgɩ a ꞌka aꞌba ꞌꞌyreetɩ ꞌꞌnyɩ a, ꞌle, -taaflɛ, aꞌba -tɩta -Lagɔ -nɩꞌa ꞌle yaku ꞌli, -bho a ꞌybhaa nɔ lɛ, ɔ -see amʋ -zɛgɛ ꞌꞌnyɩ yiꞌa?
Ⅻ ꞌƐ dɩ ꞌtɔ ɔ, lɛ a-a ꞌbɔꞌɔ ti nyʋ ꞌke amʋ ꞌꞌlrulinʋ, a nʋ ɛ a -bonyunyu -bodɩ. ꞌYa lɛtu *Moyiizɩ -ke -Lagɔwluꞌa ꞌmʋtizamʋ -lrʋʋ ꞌcnɩꞌo.
-Buduwɔn -nɩꞌa ꞌꞌsʋkʋpɩɩ
(Luukɩ 13:24)
ⅩⅢ *Zezii poꞌa wlu ꞌmnɛ ti a, nyunyuꞌa ꞌdigbiꞌa kpɛ ꞌsɔnꞌɔ ꞌꞌkpiꞌa ꞌꞌyi ɔ poꞌo: Nyʋ-ʋ ꞌmɛꞌɛ ꞌbho -Lagɔꞌɔ ꞌꞌyigbeyi -ke nyʋ-ʋ yiꞌa Zezii -bodɩ, -ʋ ꞌyeꞌa ꞌpʋnpʋan ꞌbho -Lagɔꞌɔ ꞌꞌyigbeyi. Ɔ na: -Buduwɔn ꞌbhɛꞌɛ ꞌmʋti, ꞌɛ -jolʋ-ʋ ꞌmu-o ꞌꞌmamagwlɔ ꞌmʋ, ꞌle nyʋꞌa -dadudu-u bhlu ɛꞌo. ꞌƐ dɩ a -pa -nɩ ꞌbho -buduwɔn -nɩꞌa ꞌꞌsʋkʋpɩɩ ꞌꞌyi,
ⅩⅣ -ɛkedɩmaa, ɛ-bɛ -yɛ -nɩꞌa ꞌꞌsʋkʋpɩɩ ꞌmo-o ꞌꞌyikmujolʋ -ɛ muꞌa ꞌle ꞌꞌkɔgwlɛtinɩɛꞌɛ gwlɔ ꞌmʋ. Nyʋ -yʋ ꞌyeꞌa -jolʋ ꞌmnɛ, ʋn se ꞌꞌyi-die.
Tu -ke ꞌɛ ꞌꞌbhuo
(Luukɩ 6:43-44)
ⅩⅤ -Kaa ꞌka-a *Zezii ꞌlɛꞌɛ -lrɛɛ: A ꞌꞌdu aꞌba ꞌꞌbhi ꞌꞌyrili ꞌbho nyʋ-ʋ -seꞌa-a -Lagɔꞌɔ wluꞌa ꞌmʋtizamʋzɩgɩꞌa damʋ. ꞌBho ꞌꞌkpi ti ʋn-ʋ yiꞌe -ɩnmʋ -bodɩ, -mnɔɔɔ na ʋn ꞌyɔɔꞌo *ꞌbhlabhlɛꞌɛ ka, ꞌle ꞌwa -pɔlʋꞌa glu kɔɔꞌɔ -blakpa ꞌmʋ-ʋ ꞌlbhaꞌa -ɛ ꞌbɔꞌɔ lililɛ ti.
ⅩⅥ ꞌLe ꞌwa nʋnʋkpli ꞌmʋ, ꞌle-e a ꞌke ʋ yibo -nɩ. Wlu ꞌmnɛꞌɛ ꞌꞌyitigʋgɔlɛ ꞌka-a: Nyɔ se ꞌbhɛɛ ɔ ꞌke ꞌle nnagbakuo ꞌmʋ -nyimiɛbhuo -za, ꞌle nyɔ se ꞌbhɛɛ ɔ ꞌke ꞌle -kikalɩ ya -vajibhuo -za.
ⅩⅦ A yiboꞌo-o na tuzɛgɛ-ɛ ꞌpo-o ꞌꞌbhizɩgɩ, ꞌle -kmakmatu-u poꞌo -kmakmabhi.
ⅩⅧ ꞌMɩɩmɩɩtu se ꞌbhɛɛ ɛ ꞌke -zɔtuꞌa ꞌꞌbhi -tro, ꞌle -zɔtuꞌa ꞌꞌbhuo se ꞌbhɛɛ ɛ ꞌke ꞌle -sratu ya -nɩ.
ⅩⅨ Tu -yɛꞌɛ poꞌa ꞌꞌbhizɩgɩ, ɛ-ɛ ꞌye-e -cɛ -mʋ ꞌle ɛ ꞌke ꞌꞌyri-po-ɛ.
ⅩⅩ ꞌKa ꞌmnɔ ꞌka-a, nyʋ-ʋ -seꞌa-a -Lagɔwluꞌa ꞌmʋtizamʋzɩgɩ, ꞌle ꞌwa nʋnʋkpli ꞌmʋ a-a ꞌye ʋ ꞌꞌyiyibo -nɩ mʋ.
*Zezii na: ꞌƖn se amʋ yibo
(Luukɩ 13:25-27)
ⅩⅪ A -gblee, ꞌan -tɩta -Lagɔ -nɩꞌa ꞌle yaku ꞌli, nyɔ-ɔ ꞌbɔꞌɔ ti, ꞌɔ nyʋ ɔ -kɔꞌɔ ꞌꞌklumʋ, ɔ ꞌke ꞌle ꞌbɩ ꞌye, -bho ɔ -ka: ꞌAn -Kɔyi! ꞌAn -Kɔyi! ꞌbho wɔnkpʋ ꞌꞌkpiꞌa ꞌꞌsɛ-ɛ nʋ a, ɔ -see ꞌɔ nyɔtu -kɔ yi. Nyɔ -yɔ nʋꞌa ꞌɔ ꞌgwlʋdɩ, ꞌɩnnɔ ɔ ꞌke -kɔ.
ⅩⅫ -Lagɔꞌɔ -zigleꞌa -nɔɔ ti a, nyʋꞌa -dadudu-u ꞌye-e na: -Aꞌba -Kɔyi, -aꞌa ꞌnynɩ ꞌmʋ -a -za -nɩꞌe -Lagɔꞌɔ wlu ꞌmʋti: -aꞌa ꞌnynɩ ꞌmʋ -a -nu -nɩꞌe nyʋ ꞌmʋ ꞌꞌnyinynidɩꞌa -zuzu ti, ꞌle -aꞌa ꞌnynɩ ꞌmʋ -a -nʋ -nɩꞌe *wɔnkulɩꞌa -dadudu.
ⅩⅩⅢ ꞌBho-o ꞌɩn-ɩ ꞌye -nʋ -nɩ mʋ: A-bʋ ꞌma-a ꞌꞌnyinynidɩꞌa nʋmʋ a, ꞌɩn se aꞌba -lue komu yibo! A po ꞌɩnmʋ le!
-Bidi ꞌsɔnꞌɔ ꞌꞌkpidɩ
(Luukɩ 6:47-49)
ⅩⅩⅣ *Zezii poꞌa wlu ꞌmnɛ ti a, ɔ ꞌpo-o -bidi ꞌꞌkpiꞌa ꞌꞌyi, ɔ na: ꞌAn wlu ꞌɩn -zaꞌa -laa ꞌmʋ, nyɔ -yɔ po ꞌɩ -lokui, -ɔ -de ꞌnɩ ꞌmʋ ti, -aꞌa nyɔtu kɔɔꞌɔ-ɔ -naagɩbhleyi -po -nɩꞌa ꞌɔ lasoobudu ꞌbho trɩ ꞌꞌkpi.
ⅩⅩⅤ -Bibie nʋꞌa -kaa, ɛ yi-oꞌo, ꞌꞌni-i lbha-aꞌo, ꞌꞌnisʋɩ ꞌꞌyi-oꞌo. Ɛ -see bhlu, -ɛkedɩmaa, ꞌɛ ꞌkpʋ -po-ɛꞌɛ-ɛ ꞌbho trɩ ꞌꞌkpi glu.
ⅩⅩⅥ Ɛ-bɛ wlu ꞌɩn -zaꞌa -laa ꞌmʋ, nyɔ -yɔ ꞌwɩn ꞌɩ ꞌbɔ ɔ, -ɔ -see ꞌɩ ꞌmʋ ti-de, ꞌɔ nyɔtu kɔɔꞌɔ-ɔ nyɔ-ɔ seꞌa -tɔɔ ꞌbhle, -ɔ -po -nɩꞌa ꞌbho -bɩsɩdudu ꞌmʋ -budu.
ⅩⅩⅦ -Bibie nʋꞌa -kaa, ɛ yi-oꞌo, ꞌꞌni-i lbha-aꞌo, ꞌꞌnisʋɩ ꞌꞌyi-oꞌo, ꞌle -bibie ꞌye ɛ -bhlua gbligbligbli!, ɛ ꞌye wɔn-nyni ꞌwee.
*Zeziiꞌa wɔnkuɛ
ⅩⅩⅧ A -gblee, -da *Zezii gwɛꞌɛ nyʋꞌa -tɔtɔɔ ꞌꞌyi, ꞌɔ -tɔtɔsʋ -maꞌa-a nyʋ ꞌwee wɔnti.
ⅩⅩⅨ ꞌƆ nɛ se *-Lagɔꞌɔ gbayibomʋꞌa -tɔtɔɔꞌɔ ka -nɩ. Ɔbɔ-ɔꞌɔ nɛ -ke wɔnkuɛ -naꞌo.