ⅩⅤ
-Lagɔ gboꞌa -dalbhomʋ -mɛɛsɔn -ke lɩ -mɛɛsɔn-ɔ -yaꞌa nyʋ ꞌkleyeɛɛ ꞌꞌkpi.
Ⅰ Ɩ ziꞌa -kaa, ꞌle ꞌɩn ꞌye yaku ꞌꞌyi popo -lrɛɛ. ꞌƖn nʋꞌa -kaa, *wɔnkulɛklagba -lue-e maꞌa nyɔ wɔnti, ꞌɩn ꞌye -ɛ li. Ɛ-ɛ ꞌmo-o -Lagɔ gboꞌa -dalbhomʋ -mɛɛsɔn-ɔ ꞌbhleꞌa nyʋꞌa ꞌklekpiyalɩ -mɛɛsɔn kwa. Nyʋ-ʋ seꞌa -Lagɔ yibo, ꞌcɛ ɔ -po ꞌnʋ kwa ꞌle ʋn ꞌke ꞌwa ꞌꞌnyinynidɩ ꞌꞌyiyibo, ʋn ꞌke ɔ gbo ꞌꞌbhiti, ꞌya gbɔmʋbhɔɔlɩ moꞌo.
Ⅱ A -gblee, ꞌɩn nʋꞌa -kaa, ꞌɩn ꞌye-e lɛ -lue li. Ɛ kɔɔꞌɔ-ɔ ꞌꞌniklagba ꞌle ɛ -nɩꞌe ꞌꞌwlelaa, -ka ꞌꞌyena, ꞌle nɛ -nɩꞌe ꞌle ɛ kɔ. A ꞌye li-ɔ, ꞌbho -antanyɩnmi-e, ꞌɛ gʋgɔbolɛ -ke ꞌɛ ꞌnynɩꞌa ꞌcnɩyriꞌa ꞌꞌyri ꞌꞌkpi nyʋ-ʋ kuꞌa ꞌkpa ꞌꞌyi, -ʋ nʋꞌa -Lagɔꞌɔ ꞌgwlʋdɩ, ꞌɩn ꞌye -ʋ li -lrɛɛ. Ɛ-bɛ ꞌꞌniklagba ꞌmnɛꞌɛ ꞌꞌyigbeyi ʋn -nynaꞌa ti, ꞌle, -dɔdɔ ʋn ꞌyeꞌa ʋn ꞌke -Lagɔꞌɔ ꞌnynɩ ꞌꞌyiꞌbhɛɛ -nɩ, ʋn ꞌbhle ꞌɩ kwa.
Ⅲ *Moyiizɩ ꞌma-a -Lagɔꞌɔ lbhʋnʋyi, ꞌlʋ ɔ -ke *Izrayɛɛlɩkɔmʋ ꞌbhleꞌa -bɛnyɩ -Lagɔꞌɔ ꞌnynɩꞌa ꞌꞌyibhɛɛɛꞌɛ kamʋ, ꞌle, *ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛ, ɛ-bɛ ꞌlʋ -lue ʋn ꞌbhleꞌa ꞌɔ dɩ -lrɛɛ, ʋn ꞌye ɛ ꞌbho ꞌꞌdu ꞌle ʋn-ʋ nʋꞌo:
-Aꞌba -Kɔyi -Lagɔ, -ɩnmɔ kuꞌa wɔn, -ɔ ziꞌa lɛꞌꞌo lɛ, -aꞌa nʋnʋdɩ-ɩ ꞌbhɛɛ-ɛ ꞌꞌyi ꞌle nyɔ se ɩ wɔnyiꞌbhɛɛ. -Ɩnmɔ -kɔꞌɔ ꞌbhlɩkpɩyowli ꞌwee, -aꞌa nʋnʋdɩ-ɩ ꞌmo-o -ziadɩ ꞌle ɩ ꞌsrɛɛꞌɛ ꞌꞌyi.
Ⅳ -Aꞌba -Kɔyi, nyɔ yɔɔ -see ꞌbho -ɩnmʋ ꞌꞌdu yiꞌa? Nyɔ yɔɔ -see ꞌwɔn yi, ɔ ꞌke -aꞌa ꞌnynɩ ꞌꞌyiꞌbhɛɛꞌɛ? -Ɩn -nɩ -lue ꞌtɩn, nyɔ se ꞌbhɛɛ ɔ ꞌke -ɩnmʋ linyni. Nyɔꞌꞌo nyɔ-ɔ -nɩꞌa ꞌbhlɩkpɩ ꞌꞌkpi, ɔ-ɔ ꞌye-e -yi -mʋ, ɔ ꞌke -ɩnmʋ ꞌkolri wɔnyi glu po, ɔ ꞌke -ɩnmʋ bʋbɔ, -ɛkedɩmaa, ɔ -gwɛꞌɛ-ɛ -aꞌa ꞌꞌyrilinmɔkpli ꞌꞌyrili.
Ⅴ Ʋn gwɛꞌɛ -kaa bhlebhlea ꞌꞌyi, ꞌle ꞌɩn ꞌye ꞌle popo -lrɛɛ. ꞌƖn -ka ꞌle-e gbʋ, *-Lagɔꞌɔ bʋbɔbhlegboꞌa lisaabudu katiꞌe-e wɔn ꞌle yaku ꞌli, ꞌle ꞌɩn ꞌye ɛ liꞌye. ꞌƖnnɛ nyʋ-ʋ ꞌlaꞌa -Lagɔꞌɔ -denaꞌa *gbedeti -lrɛɛ.
Ⅵ Ɛ katiꞌa -kaa wɔn ɔ, ꞌle, -Lagɔ gboꞌa -dalbhomʋ -mɛɛsɔn-ɔ ꞌbhleꞌa nyʋꞌa ꞌklekpiyalɩ -mɛɛsɔn kwa -lue -lue, ʋn ꞌye ꞌle ꞌɛ ꞌlimʋ ꞌda, ꞌɩn ꞌye ʋ liꞌye. -Banɩpli nʋꞌa ꞌꞌwleewle, ꞌɩnnɩ ʋn -paꞌa ꞌmʋ, ꞌle ʋn -bhlaꞌa ꞌbho ꞌya ꞌꞌkpi sanuꞌa ꞌꞌbɛtʋ.
Ⅶ ꞌLe, lɩ nyiɛ-ɛ -nɩꞌa ti, ꞌya -lue ꞌye sanuꞌa ꞌꞌkɔpɩ -mɛɛsɔn ꞌmʋꞌꞌluo, ɔ ꞌye ɩ -Lagɔ gboꞌa -dalbhomʋ -mɛɛsɔn ꞌmnʋ -jeyi ꞌꞌnyɩ. Ɩ-bɩ ꞌꞌkɔpɩ ꞌmnɩ, -aꞌba -Kɔyi ꞌꞌKɔgwlɛlagɔꞌɔ ꞌcɛ ɔ-ɔ ꞌyeꞌa nyʋ ꞌꞌkpi -ya mʋ, ꞌɩnnɩ ꞌꞌyiꞌe ꞌle ꞌya ꞌlimʋ -lue -lue.
Ⅷ Ɛ-bɛ -Lagɔꞌɔ bʋbɔbhlegboꞌa lisaabudu ꞌmnɛ nʋꞌa -kaa, ɛ ꞌꞌyi-e -dayrʋ. -Ka -Lagɔ kuꞌa wɔn, ꞌɔ ꞌnynɩ ꞌbhɛꞌɛ ꞌꞌyi ꞌle ɔ -nɩꞌa ꞌle, ɛ-bɛ -dayrʋ ꞌmnɛ, ꞌɩnnɛ -tɔ nɩꞌo, ꞌle nyʋꞌa ꞌklekpiyalɩ -mɛɛsɔn -Lagɔ gboꞌa -dalbhomʋ ꞌbhleꞌa kwa, -bho ɩ -see ꞌbho ti-gwɛ, nyɔ se ꞌbhɛɛ ɔ ꞌke ꞌle pa.