Ⅵ
*-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛgbuda, ɔ ꞌꞌdu-o ꞌꞌbɔgʋꞌa ꞌꞌyikatiɛ wɔn.
Ⅰ Ʋ-bʋ nyʋ ꞌmnʋ gwɛꞌɛ ꞌwa bʋbɔɛ ꞌꞌyi, ꞌle ꞌɩn ꞌye ꞌle popo -lrɛɛ. ꞌƖn nʋꞌa -kaa, ɔ-bɔ *-Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ *ꞌsragamʋzabhlabhlɛgbuda, ꞌɩn ꞌye -ɔ li. ꞌꞌBɔgʋ ʋn -ka -nɩꞌa lɩ -mɛɛsɔn wɔnyi, ɔ ꞌkpa-a ꞌbho ɔ ꞌke ɛ wɔnyi kati. Ɩ-bɩ lɩ -mɛɛsɔn ꞌmnɩ, ɔ nʋꞌa -kaa, ɔ -zaꞌa ꞌbho-o ꞌya -lue. Ɔ -zɛ ꞌɛ ꞌbho a, ꞌle, ɩ-bɩ lɩ nyiɛ-ɛ -nɩꞌa ꞌbho, ꞌɩn ꞌye ꞌya -lueꞌa wlu ꞌbʋꞌwɔn ꞌle ɛ na: ꞌDa, -ɩn ꞌke yi! ꞌƆ wlu ꞌmnɛ kɔɔꞌɔ-ɔ ꞌꞌni-i ꞌꞌgbu.
Ⅱ ꞌƖn -ka ꞌle-e gbʋ, -siekoplu ꞌdaꞌo. Nyɔ -lue-e -deꞌe ꞌbho ꞌɛ ꞌꞌkpi ti. Ɔ-bɔ nyɔ ꞌmnɔ ꞌbhle-e plʋ -kwa. Nyɔ-ɔ luꞌa tʋ, -kwloo ʋn-ʋ ꞌꞌnyɩ ꞌɔ ɔ, ꞌɩnnɛ ʋn ꞌꞌnyɩ ɔꞌo, ɔ deꞌe ꞌꞌlru. Ɔ-ɔ mu-oꞌo ɔ ꞌke tʋꞌa -dadudu vɔ ꞌle ɔ ꞌke ɩ ꞌꞌkpi ꞌya -lrɛɛ.
Ⅲ Ɔ-bɔ nyɔ ꞌmnɔ ꞌwlʋꞌa ꞌbho -jeyi a, ꞌle ɔ-bɔ -Lagɔꞌɔ ꞌBhozayi ꞌmnɔ ꞌye ꞌbho ꞌkpa -lrɛɛ, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya ꞌsɔnnɛ -za. Ɩ-bɩ lɩ nyiɛ ꞌmnɩ ꞌle ꞌɩn ꞌye ꞌya -lue -lrɛɛꞌɛ wlu ꞌbʋꞌwɔn ꞌle ɛ na: ꞌDa -ɩn ꞌke yi!
Ⅳ -Sieko -lrɛɛ nʋꞌa -kaa, ɛ ꞌda-aꞌo. ꞌƐ ku -nɩꞌe-e zoo -ka nymɔ. Nyɔ-ɔ -de ꞌnɛ ꞌꞌkpi ti, ʋn ꞌꞌnyɩ -ɔ ꞌꞌyiflɔɛ ɔ ꞌke tʋ ꞌꞌyiglu-za ꞌnɔɔ ꞌkmʋ ꞌmʋ ꞌle nyʋ ꞌke ꞌlɩlbha, ʋn ꞌke ꞌmɛ. ꞌƐ kamʋ ʋn ꞌꞌnyɩ ꞌɔ -blajrɛɛ.
Ⅴ ꞌLe, ɔ-bɔ kɔɔꞌɔ ꞌsragamʋzabhlabhlɛgbuda, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya tannɛ ꞌbho -za, ꞌle ɩ-bɩ lɩ nyiɛꞌɛ -lue -lrɛɛ na: ꞌDa -ɩn ꞌke yi! -Sieko -nɩꞌa -ka -blibli nʋꞌa -kaa, ꞌꞌbɔyɩ! ɛ ꞌda-aꞌo. Nyɔ -lue-e -deꞌe ꞌbho ꞌɛ ꞌꞌkpi ti. Ɔ-bɔ nyɔ ꞌmnɔ ꞌbhle-e kilo -kwa.
Ⅵ Ɩ-bɩ lɩ nyiɛ ꞌmnɩꞌa ꞌꞌklumʋ ꞌle ꞌɩn ꞌye lɛ -lue ꞌbʋꞌwɔn. Ɛ kɔɔꞌɔ-ɔ nyunyɔꞌɔ wlu, ꞌle ɛ na nyɔ-ɔ -nɩꞌa ꞌbho -sieko ꞌꞌkpi -bodɩ: Zɔ -lue ꞌliꞌa mɔni lbhʋnʋyi-i ꞌyeꞌa, ꞌɩnnɛ ꞌke ꞌꞌcɩmnɩselɛꞌɛ kilo -lue ꞌtɩn de, ꞌle, -bho ɛ ꞌꞌdu -pʋsa, ꞌɛ kilo tan ꞌtɩn ɛ ꞌke de. ꞌBho nmɔ -ke ꞌcnaꞌa damʋ, -aꞌa po ꞌya mɔni ꞌꞌkpi -le!
Ⅶ -Lagɔꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛgbuda, ɔ nʋꞌa -kaa -lrɛɛ, ɩ-bɩ lɩ -mɛɛsɔn ꞌmnɩ, ɔ -zaꞌa ꞌbho-o ꞌya nyiɛnɛ. ꞌLe ɩ-bɩ lɩ nyiɛ-ɛ -nɩꞌa ꞌbhoꞌa -lue -lrɛɛ ꞌye -wlu ꞌle ɛ na: ꞌDa, -ɩn ꞌke yi!
Ⅷ ꞌƖn -ka ꞌle-e gbʋ, -sieko -ke ku-u ꞌꞌpluꞌa ꞌmʋti -ka ꞌꞌlrubhatiyi, ꞌɩnnɛ ꞌdaꞌo. Nyɔ-ɔ -nɩ ꞌnɛ ꞌꞌkpi, ʋn-ʋ ꞌlɔ -ɔ ꞌMɛmɛɛ. Nyɔ -lrɔɔ nʋꞌa -kaa, ɔ ꞌbhla-a ꞌbho ꞌɔ lemʋ. ꞌƆ ꞌnynɩ ꞌmo-o ꞌMɛmʋꞌa -nɩnamʋ. A -gblee, nyunyu ꞌwee -nɩꞌa ꞌnɔɔ ꞌbhlʋkpa ꞌꞌkpi, -bho nyɔ de ꞌwa ꞌdigbi nyiɛ ti, ʋ-bʋ nyʋ ꞌsɔn ꞌmnʋ, -Lagɔ ꞌꞌnyɩ -ʋ wɔnkuɛ ꞌle ʋn ꞌke tʋ-e, ꞌmʋ-e, ꞌꞌlrubhatiɛ -ke ꞌmnamʋnyninmi ꞌmʋ -zi -nɩ ꞌle ʋn ꞌke ꞌya -lueꞌa nyʋ ꞌlbha ʋn ꞌke ꞌmɛ.
Ⅸ Ɔ-bɔ *nyʋꞌa ꞌpʋʋnyi ꞌmnɔ nʋꞌa -kaa -lrɛɛ, ɩ-bɩ lɩ -mɛɛsɔn ꞌmnɩ, ɔ -zaꞌa ꞌbho-o ꞌya -muunɛ. -Gbagbʋ -ke ꞌꞌkpi ʋn-ʋ za nɩꞌa -Lagɔꞌɔ *ꞌsraga, ꞌɩn popoꞌa ꞌle ꞌɛ ꞌzɔ, nyʋ-ʋ ꞌwɔɔnꞌɔ -Lagɔwlu, -ʋ ꞌꞌdu ꞌɛ ꞌbho -ka -zɛgɛka, ꞌle ʋn ꞌye ɩ ꞌmʋ-za gbaa, ꞌle ꞌɛ kamʋ, nyʋ ꞌye ꞌʋ ꞌlbha, ʋn ꞌyeꞌa ꞌmɛ, ꞌɩn ꞌye -ʋ li,
Ⅹ ꞌle ʋn-ʋ ꞌꞌwɔꞌɔ, ʋn-ʋ nʋꞌo: -Aꞌba -Kɔyiklagba, -ɩn ꞌmo-o -ziadɩꞌa ꞌmʋzayi. Nyʋ-ʋ -nɩꞌa ꞌle ꞌkmʋ ꞌmʋ, -ʋ ꞌlbhaꞌa -amʋ, -a ꞌyeꞌa ꞌmɛ, -bhlaaka -ɩn ꞌke ʋ dɩ -kpʋnꞌa? -Bhlaaka -ɩn ꞌke ʋ ꞌkleyeɛɛ ꞌꞌkpi -yaꞌa?
Ⅺ Ʋn ꞌlɛꞌɛ -kaa a, ꞌle, -banɩpli -nɩꞌa ꞌꞌbuu, ʋn ꞌye ɩ ꞌle -za, ʋn ꞌye ɩ ʋ ꞌꞌnyɩ -lue -lue, ꞌle ʋn na: A -fɔ -bhla ꞌbho ꞌꞌyi -toope! A -gblee, aꞌba -bonyunyu -nɩꞌa -Lagɔꞌɔ lbhʋ nʋnamʋ, -ka ʋn ꞌlbhaꞌa amʋ, -bho ʋn ꞌlbhʋ ʋ -kaa -lrɛɛ, -ka -Lagɔꞌɔ ꞌꞌbhuo ꞌlɛꞌɛ, -bho ɛ zi -kaa a, ꞌꞌlemnɩɩ ɔ-ɔ kpʋn ꞌnʋ-ʋ dɩ.
Ⅻ Ɩ-bɩ lɩ -yɩɩ ꞌwlʋꞌa ꞌbho -jeyi, ꞌle, -Lagɔꞌɔ ꞌBhozayi kɔɔꞌɔ ꞌsragamʋzabhlabhlɛgbuda, ɩ-bɩ lɩ -mɛɛsɔn ꞌmnɩ, ɔ ꞌye ꞌbho ꞌya -mɛɛlonɛ ꞌbho -za. ꞌBhlʋkpa nʋꞌa -kaa, ɛ -trɛꞌo tenyɩ. -Ka ꞌzʋɩnyriɛ -nɩꞌa -blibli, ꞌka-a ꞌyrʋ -nɩꞌo. ꞌBho ꞌcʋ -mnɛɛꞌɛ damʋ ɛ -ke nymɔ -plɛꞌɛ-ɛ zaanzaan ꞌmʋ.
ⅩⅢ -Bho sakɔ -ka -bada-a za ꞌle -pʋpɔɔ ꞌke yi, -ka ɛ-ɛ ꞌwlaꞌa ꞌꞌbhi ꞌzɔ, ꞌka-a ꞌcʋdrɩ ꞌgaꞌa ti.
ⅩⅣ -Ka nyɔ-ɔ ꞌfɩanꞌa -cakpa, ꞌka-a yaku nʋꞌo ꞌle ɛ ꞌye ꞌꞌma ꞌle yayi. Trɩ -ke likpe ꞌꞌwe nʋꞌa -kaa, ɩ -sɔꞌɔ-ɔ -denɩ ꞌmʋ.
ⅩⅤ A -gblee, ꞌle nyɔꞌꞌo nyɔ-ɔ -nɩꞌa ꞌnɔɔ ꞌbhlʋkpa ꞌꞌkpi, -ɔ -seeꞌa -Lagɔwlu ꞌwɔɔn, -bho ɔ ꞌꞌdu ꞌbhlʋkpayowli o, -bho ɔ ꞌꞌdu nyɔklagba o, -bho ɔ ꞌꞌdu ꞌꞌsrojayiklagba o, -bho ɔ ꞌꞌdu ꞌgagayi o, -bho ɔ ꞌꞌdu wɔnkuyi o, -bho ɔ ꞌꞌdu ꞌgeyikpaan o, -bho ɔ se ɔ ꞌꞌdu o, ɔ ꞌye ꞌle trɩꞌa ꞌꞌbhi ꞌli -ke ꞌya ꞌnynɩmʋ ꞌꞌzize.
ⅩⅥ ꞌLe ʋn-ʋ ꞌlɩ ɩꞌo, ʋn-ʋ nʋꞌo: A ꞌwla -amʋ ꞌꞌkpi ti, a ꞌke -amʋ ꞌꞌyi-ka, ꞌle, -Lagɔ -kɔꞌɔ lɩ ꞌwee, ɔ -kaa -amʋ liꞌye, ꞌle, ꞌɔ ꞌBhozayi -ɔ ꞌpʋʋnꞌa nyʋ, -ɔ kɔɔꞌɔ ꞌsragamʋzabhlabhlɛ, ɔ -kaa -amʋ dɩ -kpʋn.
ⅩⅦ -Ɛkedɩmaa, -da ʋn ꞌꞌduꞌa ꞌle ʋn ꞌke nyʋ dɩ -kpʋn, ꞌbho nyni-oꞌo. -Aꞌba nyɔ -lue ꞌtɩn -see ꞌwa ꞌcɛkʋta wɔn ꞌmʋ -cɛ yi ɛ-bɛ -nɔɔ ꞌmnɛ ꞌli.