Ⅳ
Ⅰ -Gblee, Timotee, Zezii Kliisɩ -ɔ ꞌka le yi, ɔ ꞌke ꞌmɛmʋ -ke tinɩmʋ -zigle -tu ꞌle ɔ ꞌke ꞌɔ nyʋ -kɔ ɔ, ɔ -ke -Lagɔꞌɔ ꞌꞌyigbeyi ꞌɩn-ɩ ꞌtmʋʋ nɩꞌe -ɩnmʋ.
Ⅱ ꞌWla -pɔlʋ ti -ɩn ꞌke ꞌɔ ꞌꞌdɩzɩgɩ ꞌmʋ-za! -Bho -ɩn -kɩ ɩ ꞌmʋ-ʋza a, ꞌle zɔ ꞌke ꞌmʋ-nmɔ o, ꞌle ɛ ꞌke ꞌmʋ-nyni o, -aꞌa kpʋn ꞌɛ lbhʋtu -kebhlele -le! ꞌꞌDu nyʋ ꞌꞌdɩ ꞌmʋ! -Yʋ -nɩꞌa dɩyikpaka, kpʋ ʋ dɩ ꞌꞌyi, ꞌle, ꞌꞌnyinynidɩ -nɩꞌa ꞌle ꞌwa tinɩɛ ꞌmʋ, -tɔ nʋ ɩ ꞌle ʋn ꞌke ɩ ꞌꞌyiyibo ʋn ꞌke -Lagɔ gbo ꞌꞌbhiti, ꞌle -ɩn ꞌke nyʋ ꞌwee ꞌkpa ꞌꞌyi po! -Ku ꞌꞌgwli ꞌꞌkɔmʋ ꞌle -ɩn ꞌke ʋ-bʋ nyʋ ꞌwee -tɔ -ka -zɛgɛka!
Ⅲ -Ɩn ꞌye li-ɔ, -nɔɔ -lrɛɛ-ɛ ꞌye-e -nyni -mʋ ꞌle nyunyuꞌa -loku ꞌmʋ -ziadɩ ꞌke ꞌle bhlɛɛ, ꞌle, nyʋ-ʋ tɔꞌɔ ꞌya lɩtu, ʋn -see ʋ -lokui-po yi. -Tɔtɔlɩ -yɩ seꞌa ꞌkpʋ ꞌbhle, ꞌle ʋn ꞌke ɩ ꞌwɔɔn. -Gblee, ꞌwa -klaabotɔmʋ ꞌmnʋ-ʋ ꞌye-e ꞌkpna -mʋ ꞌle ʋn ꞌke ʋ ꞌwa ꞌtʋnʋdɩ -tɔ.
Ⅳ Ʋn -see ꞌtɔ -ziadɩꞌa -lue komu -lokui-po yi ꞌle ʋn ꞌke ꞌle bhebhelɩ gbo ꞌꞌbhiti.
Ⅴ ꞌLe -mnɔɔɔ gbo a, Timotee, kpʋn dɩ li ꞌle lɩ ꞌwee ꞌmʋ! -Ku ꞌꞌgwli, ꞌle, sɩasɩaalɩ yiꞌa -ɩnmʋ -bodɩ, -ɩn ꞌke ɩ wɔnyiꞌbhɛɛ! Lbhʋ -Lagɔ -tbhaꞌa -ɩnmʋ ꞌle -ɩn ꞌke ꞌɔ ꞌꞌdɩzɩgɩ kpa, kpʋn ɛ ti -ɩn ꞌke ɛ nʋ -ka -zɛgɛka ꞌꞌkɔmʋ!
Ⅵ -Gblee, ꞌle ꞌmna gbo a, ꞌɩn ꞌtmʋʋꞌo-o -ɩnmʋ ɩ-bɩ dɩ ꞌmnɩ, -ɛkedɩmaa, ꞌɩn-ɩ ꞌye-e ꞌmɛ -mʋ Zezii Kliisɩꞌa dɩ ꞌle ꞌɛ -nɔɔ ꞌꞌkɔɔꞌɔ gbo. Nmɔ nyɔ-ɔ ꞌwlaꞌa ꞌbho *ꞌsraganmiꞌa ꞌꞌkpi ti -tanyɩ ꞌle ɔ-ɔ zɛꞌɛ ɛ, ꞌɛ -ka ꞌɩn -nɩꞌo.
Ⅶ -Ɩn ꞌye li-ɔ, -ka pleyi -ke ꞌɔ -boplemʋ-ʋ mumuꞌa li ꞌle ɔ-ɔ kukuꞌa ꞌmʋti, ɔ-ɔ ꞌwlʋꞌa ꞌnynɩ a, ꞌka-a ꞌɩn -nɩꞌo. Lbhʋ -Lagɔ -tbhaꞌa ꞌɩnmʋ ꞌɩn ꞌke ɔ -bodɩ nʋ a, ꞌɩn nʋ -ɛꞌo kplokplokplo ꞌle -pɔlʋzɛgɛ ꞌmʋ, ꞌɩn ꞌgwɛ-ɛ ꞌꞌyi ꞌɩn ꞌye ꞌle ꞌɛ ꞌꞌlruti -ponamʋ nyni. ꞌƖn -nɩꞌa -kaa a, ꞌɩn -kpʋnꞌo-o ꞌɔ wlu ꞌꞌyi. ꞌAn ꞌꞌgwlideɛ -see -denɩ ꞌmʋ -sɔ.
Ⅷ ꞌTraamʋ ꞌtɔ ɔ, ꞌnynɩwlʋɛɛ ꞌbho -aꞌba -Kɔyi Zeziiꞌa ꞌꞌtroli, ɔ-ɔ ꞌyeꞌa ꞌɩnmʋ ꞌꞌnyɩ mʋ, ꞌɩnnɛ ɔ-ɔ fuo nɩꞌe ꞌɩnmʋ wɔn. Ɛ-bɛ ꞌnynɩwlʋɛɛ ꞌmnɛ, nyʋ-ʋ ꞌsrɛɛꞌɛ ꞌꞌyi ꞌbho -Lagɔꞌɔ ꞌꞌyigbeyi, ꞌɩnnʋ ɔ ꞌke ɛ ꞌꞌnyɩ. Ɔ-bɔ -aꞌba -Kɔyi ꞌmnɔ ɔ, -nɔɔ -ke ti ɔ-ɔ ꞌyeꞌa le -yi mʋ, ꞌbho-o ɔ-ɔ ꞌye ɛ ꞌɩnmʋ ꞌꞌnyɩ -nɩ mʋ, -ɛkedɩmaa, ꞌꞌyisrɛɛka ɔ ꞌke nyʋ -zigle -tu. Ɛ -se ꞌan ꞌꞌsɛ ɔ ꞌke ɛ ꞌꞌnyɩ -ko. Nyʋ ꞌwee -nɩꞌa ꞌɔ leyiɛ ꞌmnɛ wɔnfuonamʋ ꞌle ꞌbʋbʋa ꞌmʋ, ꞌɩnnʋ ɔ-ɔ ꞌye ɛ ꞌꞌnyɩ mʋ -lrɛɛ.
ꞌPɔlʋ ꞌbɔ-ɔ ti Timotee ꞌke ꞌbho ꞌɔ ꞌꞌtroli yi
Ⅸ -Gblee, Timotee, ꞌle ꞌan wlu ꞌke ꞌle -ɩn gbo nyni a, ꞌkpa ꞌbho -ɩn ꞌke yi -vuu!
Ⅹ ꞌƖn-ɩ ꞌtmʋʋꞌo -ɩnmʋ-ɛ, Demasɩ -nɩ ꞌka ꞌnɔɔ ɔ, ꞌnɔɔgbɛ ꞌkmʋ ꞌmʋꞌa tinɩɛ-ɛ ꞌnʋ -ɔ ꞌtʋ. Ɔ ꞌwlʋ-o ꞌɩnmʋ ꞌꞌyrili ɔ ꞌye Tesalonikɩ mu. -Yɔ ꞌma-a Klesaasɩ a, ɔbɔ ꞌmu-o lbhʋ ꞌꞌkpi ꞌle Galasiibhlʋkpa ꞌꞌkpi ꞌle Tiitɩ -mnɔɔ ꞌye Dalɩmasɩ mu lbhʋdamʋ -lrɛɛ.
Ⅺ Luukɩ -nɩ -lue, ꞌɔ ꞌꞌsɛ -ke ꞌɩn -sieꞌe ꞌnɔɔ. -Bho -ɩn -ka yi a, -ɩn -ke Maakɩ yi! Ɔbɔ ꞌbhɛɛꞌo ɔ ꞌke ꞌɩnmʋ -kpa.
Ⅻ Tisikɩ -mnɔɔ, ꞌɩn ꞌlbho -ɔ ꞌle Efɛɛzɩ ꞌꞌbhalrɛɛ.
ⅩⅢ -Bho -ɩn -ka yi a, Timotee, ꞌan -sɩnbana ꞌɩn sieꞌa ꞌbho Trʋasɩ Kapusɩ gbo a, -sie nɛ ꞌɩnmʋ! -Yɩ ꞌma-a ꞌan ꞌnynɩbhlebɔgʋɩ, -sie nɩ ꞌɩnmʋ -lrɛɛ, ɩ -ke ꞌan ꞌꞌbɔgʋɩ -lrɩɩ!
ⅩⅣ -Yɔ ꞌma-a nɛtɛbhlayi Alasaanɩ -mnɔɔ ɔ, ꞌɔ ꞌmʋzadɩ ꞌvɔ-ɔ ꞌɩnmʋ tʋ gbo. Lɩ ɔ nʋꞌa a, -aꞌba -Kɔyi-i ꞌye-e ꞌya ꞌꞌlru ꞌmʋ ꞌꞌpɛle -mʋ.
ⅩⅤ ꞌꞌDu -aꞌa ꞌꞌbhuo ꞌꞌyrili ꞌbho ꞌɔ ꞌꞌkpi! Ɔ ꞌbhɛɛꞌo ɔ ꞌke -ɩnmʋ tʋ gbo -ya -lrɛɛ, -ɛkedɩmaa, -aꞌba -tɔtɔlɩ ɔ ꞌwɔnꞌɔ ꞌbɔ, ɔ ꞌvɔ -ɩ tʋ gbo.
ⅩⅥ -Gblee, ꞌꞌyizazigle ʋn -tuꞌa ꞌɩnmʋ, nyɔ -see ꞌɩnmʋ -kpanamʋ yi. -Ka ʋn -dieꞌa ꞌmʋ, ʋn ꞌwlʋ-o ꞌɩnmʋ ꞌꞌyrili. -Lagɔꞌɔ kpʋ ʋ ꞌya dɩ ꞌꞌyi -le!
ⅩⅦ Ɩ -nɩꞌa -kaa ꞌmʋ, -aꞌba -Kɔyi *Zezii -mnɔɔ -bodɩ a, ɔ -see ꞌɩnmʋ kwa gbo -za, ɔ ꞌpo-o ꞌɩnmʋ ꞌkpa ꞌꞌyi ꞌle ꞌɩn ꞌye ꞌɔ ꞌꞌdɩzɩgɩ -za ꞌle nyʋꞌa -dadudu-u -seꞌa-a *ꞌZuifʋ ꞌye ɩ ꞌbʋꞌwɔn. ꞌBho-o ꞌɩn ꞌꞌtaflɛ nɩꞌe ꞌmɛmɛɛ.
ⅩⅧ ꞌꞌNyinynilɩ ꞌyeꞌa ꞌɩnmʋ ꞌꞌlruli-nʋ-ɛ mʋ a, ɔ-ɔ ꞌye-e ꞌle ꞌya ꞌmʋ ꞌɩnmʋ zetie -mʋ ꞌꞌkɔmʋ, ꞌle, nyʋ ɔ -kɔꞌɔ, -ʋ -nɩꞌa ꞌle yaku ꞌli, ꞌɩn ꞌke ꞌle ꞌwa ꞌꞌklumʋ ꞌbɩ ꞌye. Nyʋ ꞌbhɛɛ ꞌɔ ꞌnynɩ ꞌꞌyi ꞌꞌkɔmʋ -nɔɔꞌꞌo -nɔɔ ti! *Ɩ -nɩ -kaa ꞌmʋ!
-Lebhɔɔyewlu
ⅩⅨ ꞌƖnmɔ ꞌyeꞌe *Plisilɩ -ke *Akilaa! ꞌƖnmɔ ꞌyeꞌe Onezifɔɔꞌɔ ꞌꞌbhlegboꞌa nyʋ -lrɛɛ!
ⅩⅩ ꞌLotʋꞌa ꞌꞌnynuu ꞌsɔn -yʋ -sieꞌa ꞌbho, -ɛ -ke dɩ ʋn -seeꞌa -ɩnmʋ ꞌyewlu -jeyi po a, ꞌɩnnɛ ꞌmo-o ʋn se -laa -nɩ. Elaasɩ -mnɔɔ, ɔ -sieꞌe-e Kɔlɛɛtɩgwlɔ ꞌmʋ. -Yɔ ꞌma-a Trofimʋ a, ꞌɔ ꞌꞌlru-u ꞌbhatiꞌa dɩ ꞌɩn sie ꞌɔ ꞌle Mileegwlɔ ꞌmʋ.
ⅩⅪ Timotee, yi -susueyi ꞌle -ɩn ꞌke ꞌꞌguda le sie!
Ebulusɩ-e Pudɛɛn -ke Linusɩ, Klodia -ke ꞌlotʋꞌa ꞌꞌnynuu -lrʋʋ na ʋ-bʋ ꞌyeꞌe -ɩnmʋ!
ⅩⅫ ꞌAn ꞌꞌyu, Timotee, -aꞌba -Kɔyi -sie -ɩnmʋ gbo ꞌle ɔ ꞌke -ɩn -ke ꞌlotʋꞌa ꞌꞌnynuu ꞌwee ꞌꞌniti-wʋnna!