25
Abraham iausahai honu
Abraham iausahai honu. Sahai honue reimo nanai Ketura. Isusu ne hehuka hanaia wason nanao: Simran, Yoksan, Medan, Midian, Isybak runa Suah. Yoksan isusu ne hehuka wason nanao Syeba runa Dedan. Dedan nea upu sahoro muie reini oaoiso tau sio Asyur, sio Letus runa sio Leum. Midia ne hehuka tau: Efa, Efer, Henokh, Abida runa Eldaa. Sio rei pusiso noa upu tau Ketura.
Masike Abraham irui Isak ne kawasa tau numa anoe rusun aikuna tau wain ikarihuru iamahai asi iae, isaka iru-rui apia runa muaina osi Isak nea waniu rei oi. Oyo iaisosiso orue hainau arihoni Isak. Orue ria otoe Kanaan on ria hae.
Abraham imatai
7-8 Abraham ikore-korei iamtuai nea oyo imatai. Imatai tau ne musum utuni hutu itu rahana nima. 9-10 Imatai oyo Isak runa Ishmael uaso oautotui, oaunutui pan hatu nohue wani nanae Makhpela. Hatu nohue wani haineke nia Mamre on ria hae. Wani mai nisi anoe wani Abraham ihane arihoni Efrom. Efrom mo, Sohar anai, ia Het rei. Abraham ihanei na iaunutu sahai Sara tanui. Reiso oeu oaunutu Abraham tanui na ikata sahai oi. 11 Abraham imatai, oyo Anahatana irui iake osi Isak. Tau rei Isak iruei haineke parike wani nanae Lahai-Roi asi. Lahai-Roi nene manariti “Ia inoo au sui osa”.
Ismael nea upu nea momou
12 Ismael mo, Abraham anai. Inai tau Hagar, ia pina Mesir rei. Sara ne makahaie. 13 Ismael ne hehuka wason nanao:
Nebayot, ia manaonete,
samatoro Kedar,
samatoro Adbeel,
samatoro Mibsam,
14 samatoro Misyma,
samatoro Duma,
samatoro Masa,
15 samatoro Hadad,
samatoro Tema,
samatoro Yetur,
samatoro Nafis,
samatoro Kedma ia iki muie tune rei.
16 Sio hutusa rahana ua sahoro ouna numa upua tau ipana hutusa rahana ua. No niana mo, ohetere pusu nanao. 17 Ismael ne musum utuni hutu tonu rahana itu oyo imatai. 18 Nea upu momou orueso sui otoa on poe Syur rotu-tu ohoka pan Hawila. Syur mo, wapo Mesir on ria hae, ria arena wani nanie ereeui ria Asyur. Orueso hainau arihoni Abraham nea upu momou umau honu.
Esau runa Yakup oamrae
19 Areini sou monae rerihoni Isak. Isak mo, amai tau Abraham. 20 Isak ne musum hutu ate samatoro inana Ribka. Ribka mo, Laban hotai. Noa ama tau Betuel. Betuel mo, upui tau Aram. Sio mo, arihoni otoe Mesopotamia.
21 Onana umau potuina nea ne Ribka isusu tewasi. Isusu tewasi reiso Isak iainisi osi sahai arihoni Upuri Anahatana. Oyo Upuri Anahatana irui sae wani Isak iainisiki rei. Reiso sira tau Ribka tinain taua. 22 Ribka iahana sani sio ikina ua nisu-nisuo pan tiai anoe reiso iasau pan anoi, “Ira oe! Sapan na sio ikina ua reini nisu-nisuo oakarema umau pan tiaku anoe reini omi?” Reiso iainisi tau Upuri Anahatana san rei, “Upuku Anahatana. Sapan na sio ikina ua reini nisu-nisuo na oakarema umau mai tiaku anoe reini?”
23 Reiso Upuri Anahatana isima osiki iahata,
“Niana ua waromo tiamu anoe reino tea!
Ano mka arue runa niana ua waron mka oahita runa umau.
Ia isa mka iamkona erenesi ia isa.
Ia manaonete mka ianori runa ia muie.”
24 Taa ne hunana mtuaya oyo, iruei runa sio iki alalekau. Sio ikina ua rei, sio iki hanaia. 25 Ia wain iheta manahane ianaone mo, ia msinae, samatoro ne hunua noo sani papite wani nene hunua panesi rei. Reiso ohete nanai tau Esau. Esau mo, nene manariti, “Hunua.” 26 Ita ia muie honu. Ne hanai atue wanane rekahuu kakai toui. Reiso ohete nanai tau Yakup. (Yakup nene manariti iakahuu toui. Iakahuu toui, areimo rekakina ata ia mo, mka iakarota.) Uaso oamrae pannuhu Isak ne musum hutu nome nea.
Esau iahen ne kawasa manaonete
27 Esau runa Yakup sio mainaya nea. Esau ianei iakaohu. Reiso ia ne suka ieu inekei noi wesie. Ne Yakup mo, ia menene. Ia ne suka iruei mai numa man. No numa wani onanai arihoni makapana unte. 28 Reiso Isak anoi runa Esau. Tea mo, ia ne suka iai peniu waron Esau ihunure. Ne Ribka mo, anoi runa Yakup.
29 Tau ranie hatae isa Yakup wain irie sanau kihue msinae. Waini irie sanaute oyo sira tau Esau ihokai on ria wesie. Imata muaine. 30 Reiso Esau iasau osi Yakup san rei, “Rui we sanau kihue msinae reino mkane mai. Tea mo, wani umata muaine nea reini!” Reiso ohete nanai tau Edom. (Edom atinui sani “Msinae” tau sou Ibrani.)
31 Yakup iahata, “Iake. Mka urui osia sirinia. Hete sae arui me kawasa manaonete rei na urime numa hutae, ipane taue pusiki.”
32 Iahata, “Iake. Nanie umata muaine nea reini! Umataku mka una sae runa we kawasa rei?”
33 Iahata, “Reiso asopa osiku ee. Samatoro mka urui sanaute reini osia.”
Oyo Esau isopa mai Yakup uai anoe. Iahata, “Iake. Urui we kawasa manaonete osia nea. Hete sae uai sanau kihue msinae reino.”
Reiso iahen ne kawasa manaonete rei osi wanin Yakup.
34 Oyo Yakup irui poroti runa sanau kihue msinae osi Esau. Esau iaiki rotu-tu tiai pokone samatoro ihitioi ieui. Tau san rei Esau ipenei tau ne kawasa manaonete rei.