29
Yakup ihokai pan Laban ne numa
1 Yakup ieui honu rotu-tu ihokai pan otoe wani ranie eresaa.
2-3 Ihokai pan oyo isira tau inoo parike pan otoe huie rei runa sio mamsaka rompau tonu. No rompau waron ranekeso sui parike nusue. Tonuso wason onapa-napa no netau umau honu nanie oruru hatu arihoni parike hahae rei. Nanie ouna no rompau rai raninu. Raninu pusi oruru hatu rei roe, ererohi parike hahae honu. Hatu reimo, hatu mainae.
4 Yakup iasei tanso. Iahata, “Wea amau. Omi reini, omi on supa?”
Oahata, “Ami on pan nia Haran.”
5 Iahata, “Oationa Laban, Nahor momoi rei?”
Oahata, “E-e.”
6 Ita iasei honu, “Waipan sapan? Ne patane miri-mirike?”
Oahata, “E-e. Waipan ne patane mirike, tea. Io, noo pan, anai pina ia rei pan. Waini on pan irori amai ne rompau. Anai pina rei, nanai Rahel.”
7 Iahata, “Omi muna na orui mo rompau raninu tewa rei? Oruire na raninu oyo ororire ria monota na raaiso. Tewa mo, ranie waro mainae asi rei. Mka ramakaneaso. Munata onusure pan koka anoe nea, mka ramakaneaso.”
8 Oahata, “Rotu-tu pusima amanouma samatoro aruru hatu reini arihoni parike hahae. Arurui na arui mani rompau raninu.”
9 Wasoni oanamanaso asi, sira tau Rahel ihokai, irori amai ne rompau. Rahel, ia mamsaka rompau oi.
10 Taa Yakup inoo hotai Rahel ihoka runa ne rompau oyo iruru hatu rei arihoni parike hahae rei. Irurui samatoro irui Rahel ne rompau raninu.
11 Irui ne rompau raninu oyo iatipuniki oyo irani.
12 Iahata, “Hota. Au inaku mo, amam hotai.”
Taa Rahel iatinu san rei oyo irumai pan no numa nanie isima osi amai. Hoka pan oyo iahata, “Ama. Hotaku wain ihokai on poe otoe Kanaan.”
13 Taa Laban iatinu ata etei wain ihokai reiso irumai poe tanui. Hoka poe oyo iatipuniki imukiki. Oyo ieui ikatai pan ne numa. Ihokai pan numa oyo Yakup isima osi etei iahata, “Inaku runa amaku wasopo ia-iake. Oaisosiku mai na nanie unina we ia pina isa mai rei.”
14 Etei Laban iahata, “Titue. Ita mo, kaka wani.”
Oyo Yakup iruei mai etei ne numa hunane katemae.
Yakup iausahai inana Lea runa Rahel
15 Taue isa Laban iasau osi Yakup. Iahata, “Ete. Masike ioi umau tau kaka wani iae pene pakarian osiku san rei man. Kahurae asupu me pakarian rei nene hunonie. Ainisi ina arihoniku?”
16-17 Ne Laban ne hehuka pinau ua. Ia manaonete nanai Lea. Matai kania hele. Ne anai pina muie reimo nanai Rahel. Ia mo, ia iake tunne.
18 Yakup iaunutu anoi tau Rahel nea. Reiso iahata, “Ete. Au pakarian osia rotu-tu musum itu hete nanie unana Rahel anamu pina muie rei.”
19 Iahata, “Nene iake ano ruam nanai. Na pene uruiki osi sio tamena nea. Reiso aruea mai rei.”
20 Oyo Yakup ipakarian rotu-tu musum itu na nanie inana Rahel. Anoi erematai pusu ia pina hehuke rei reiso iahana musum itu rai, sani onona hataya tonusa te atesa man.
21 Ipakarian rotu-tu musum itu oyo Yakup iasau osi etei, “Ete. Musum itu raniku nea, reiso pusita iapamata sou na uama aisenema nea.”
22 Taa san rei oyo etei iasau runa onone wani etei runa anai pina uaso mka aiseneso. Reiso oanaha runa sio noi niane anoe rei pusiki mai tau no karisaa.
23 Onana karisaa, nene mono rei etei isaa iautunu Rahel tewa ne iautunu Lea osi etei. Oyo etei ineke runai.
24 Etei iae irui Lea ne ia pina makahaie isa nanai Silpa.
25 Nene hanu omnanoe Yakup mato ianei ata ia reimo Lea. Oyo ieui pan etei. Iahata, “Ama. Aunaku san rei nanie taa hae? Au upakarian rotu-tu musum itu rai mo, nanie unana Rahel. Ama, akarotaku tau sae?”
26 Iahata, “Mai niane reini mo nene monne san rei. Ia muie mo iausaha iniku kakai tewa.
27 Reiso anapa rotu-tu maisene onona itu rai raniku samatoro anana Rahel honu. Ne mka apakarian osiku musum itu honu.”
28 Yakup iamanaku. Taa maisene rei nene onona itu pusire oyo amai irui Rahel osiki.
29 Amai iae irui Rahel ne ia pina makahaie isa nanai Bilha.
30 Yakup iae ineke ikata Rahel oi. Ne Yakup anoi pusiki runa Rahel arihoni Lea. Ita ipakarian musum itu honu.
Yakup isupu ne hehuka
31 Taa Yakup iausahai pusi oyo Upuri Anahatana inoo ata Yakup anoi pusiki runa Lea tewa. Reiso Upuri Anahatana irui Lea isusu ne Rahel mo isusu tewa.
32 Lea tinain taua oyo iruei runa anai hanaie isa. Iahata, “Upuri Anahatana inoo we kasiane reini. Reiso mka sahaku anoi runaku oi.” Reiso ihete anai hanaie rei nanai tau Ruben. Nene manariti mo, Upuri inoo we kasiane.
33 Ita tinain taua honu. Oyo iruei runa ia iki hanaie isa honu. Iahata, “Upuri iatinu ata au mo sahaku anoi runaku tewa reiso irui ia ikine reini osiku oi.” Reiso ihete nanai tau Simeon. Simeon nene manariti mo, Upuri iatinu.
34 Ita tinain taua honu. Oyo iruei runa ia iki hanaie isa honu. Iahata, “Mka sahaku ikataku sui osa. Tau sae? Ususu sio iki hanaia tonu.” Reiso ihete ia ikine rei nanai tau Lewi. Nene manariti mo, sokohuu.
35 Ita tinain taua honu. Oyo iruei runa ia iki hanaie isa honu. Iahata, “Nene taue reini uainaa runa Upuri Anahatana.” Reiso ihete ia ikine rei nanai tau Yehuda. Nene manariti mo, ainaa runa Upuri Anahatana. Iruei runa Yehuda oyo isusu tewa nea.