46
Yakup ieui poe otoe Mesir ikata ne numa hutae
1 Yakup iautotu ne numa samatoro ieui ikata ne numa hutae. Ieu rotu-tu ihokai poe otoe Bersyeba oyo iainisi iainaa runa Anahatana. Anahatana wain amai Isak iainisi iainaa runai oi. Iainaa runai irehi makapana osiki.
2 Irehi makapana oyo nene pumono rei, Yakup inekei iamnii. Ineke iamnii Anahatana ianamana osiki san rei, “Yakup, Yakup.”
Yakup on poe isana, “Oe, Upu. Upuku anamana roe. Au wani uatinu.”
3 Iahata, “Au Anahatana wain amam iainaa runaku. Pene akaitau. Ne aeua poe otoe Mesir. Au mka una mea momou mea upu sio panesi poe Mesir.
4 Mka ukataya rotu-tu ahokaya poe Mesir. Mka ununi rori mea momou mea upu mai otoe reini honu. Mka amataya mo, Yusup iruei mai nusumu na irohi matam usena.”
5 Reiso nene hanu omnanoe san rei oyo Yakup ieui iarihoni Bersyeba. Ne hehuka oapusaai roe kareta runa no pina hehuka. Pusiso osaa karetau waron ia ona aia Mesir iauwature osiso rei.
6 Orori makapanau runa no apia waron osupure pan Kanaan rei oi. Oyo ororire poe Mesir. Yakup on pan ieu ikata ne numa matae pusiki.
7 Areimo ne hehuka, nea momou, nea upu.
Yakup ne hehuka, nea momou, nea upu
8-15 Areini mo Yakup ne hehuka wason noa ina tau sahai Lea. Pusiso oeuso okata Yakup poe otoe Mesir.
Anai hanaie manaonete nanai Ruben.
Ruben ne hehuka hanaia wason nanao:
Henokh, Palu, Hesron, runa Karmi.
Simeon ne hehuka hanaia wason nanao:
Yemuel, Yamin, Ohad, Yakhin, Sohar, runa Saul. (Saul inai mo, Yakup sahai arihoni otoe Kanaan.)
Lewi ne hehuka hanaia wason nanao:
Gerson, Kehat, runa Merari.
Yehuda ne hehuka hanaia wason nanao:
Er, Onan, Syela, Peres, runa Serah. (Ne Er runa Onan omataso pan Kanaan nea, on amai ieui poe Mesir tewasi.)
Peres ne hehuka hanaia wason nanao:
Hesron runa Hamul.
Isakhar ne hehuka hanaia wason nanao:
Tola, Pua, Ayub, runa Simron.
Sebulon ne hehuka hanaia wason nanao:
Sered, Elon, runa Yahleel.
Yakup ne hehuka reini mo oamraeso pan otoe Mesopotamia runa noa hota, Dina. Pusiso sio hutu tonu rahana tonu.
16-18 Areini mo Yakup ne hehuka hanaia wason noa ina tau Silpa. Silpa mo ia wain iuna ia makahaie tau Laban anai pina Lea. Laban iruiki osi anai pina, Lea.
Gad ne hehuka hanaia wason nanao:
Sifyon, Hagi, Syuni, Esbon, Eri, Arodi, runa Areli.
Asyer ne hehuka hanaia wason nanao:
Yimna, Yiswa, Yiswi, runa Beria. Runa noa hota Serah.
Beria ne hehuka hanaia wason nanao:
Heber runa Malkiel.
Sio reini mo, sio hutusa rahana nome.
19-22 Areini mo Yakup ne hehuka hanaia wason noa ina tau sahai Rahel.
Yusup ne hehuka hanaia wason nanao:
Manasye runa Efraim. Uaso oamrae poe Mesir. Noa ina tau Asnat, Potifera anai pina. Potifera wain isaka ianori runa sio Mesir no anahatana ranie wani titue tewa poe Heliopolis.
Benyamin ne hehuka hanaia wason nanao:
Bela, Bekher, Asybel, Gera, Naaman, Ehi, Ros, Mupim, Hupim, runa Ared.
Sio reini mo, sio hutusa rahana ate.
23-25 Areini mo Yakup ne hehuka hanaia wason noa ina tau Bilha. Bilha mo ia wain iuna ia makahaie tau Laban anai pina Rahel. Laban iruiki osi anai pina Rahel.
Dan ne hehuke hanaie wain nanai:
Husim.
Naftali ne hehuka hanaia wason nanao:
Yahseel, Guni, Yeser, runa Syilem.
Sio reini mo, sio itu.
26 Yakup nea hehuka, nea momou, nea upu wason oeuso poe Mesir rei, sio hutu nome rahana nome. Ne mananua reken tanso tewa.
27 Yusup runa ne hehuka ua wason oamrae poe Mesir runa Yakup ne hehuka wason oeu okatai poe Mesir, pusiso sio hutu itu.
Yakup runa ne numa hutae ohokaso poe Mesir
28 Yakup sio ohokaso mai otoe Gosyen nea. Reiso iaisosi Yehuda ieu ianaonei nanie ioi Yusup na ieui mai amai mai Gosyen.
29 Yusup isaa kareta wani naitanane erenesai na ieui mai amai. Tau osupu umau oyo Yusup iatipuni amai oyo irani rotu-tu potuina.
30 Yakup iasau osi Yusup iahata, “Masike umataku iae iake, hete nanie unooa amahaia asi rei.”
31 Oyo Yusup on poe iasau osi nea kakau runa wanin muie runa no pina hehuka. Iahata, “Au nanie ueuku poe na usima osi ia ona aia runa amaku, wea kakau runa waniku, runa no pina hehuka wason ohokaso on pan otoe Kanaan nea.
32 Mka uasau ata omi mo, omi mamsaka rompau runa koropou. Makapanau rai mo waron orori pusire mai rei nea runa mo apia pusire.
33 Munata ia ona aia ioimo na iasei tanumo, iahata, ‘Mo pakarian sae?’
34 Oahata, ‘Ami mo asaka makapanau on ami ikina asi. Sani mania upu oi.’ Oasau san rei mo, mka iaisosimo oruemo mai otoe Gosyen reini.”
Yusup iasau san rei tau sio Mesir oahana omasikiki tau sio mamsaka rompau.