2
Iamuira ia seia man
1 Wea kakau waniu, hutu nohue. Pusimo oparisaa tau Upuri Yesus Kristus wain iamuirai. Pene oamuira sio mainaya man. Ne amuira ia seia man, hikine mainae.
2 Sani pusimo oamanoumo nanie oainaa runa Anahatana, oyo sira tau sana ua ohokaso mai tanumo. Ia isa mo, ia kaya. Iausahu ne sapauu hunahane. Iausahu ne api iaka. Ne ia isa honu mo, ia mosokinie. Iausahu ne api kiha-kihaya.
3 Ia kaya rei inusui runa ne api iaka oyo oamuirai. Oeu okatai roe uae oahata, “Mai upu. Mai na aruea mai rei.” Ne ia wain imosokiniki rei inusu oyo, oahata, “Ano mo, aooa pan rei.” Te oahata, “Aruea poe tuamane reipo.”
4 Oamuiraso pusu no kaya man, areimo opusu mo maue wani kahatane rei. Omi sani oarinii ia isa mo, ia mainae, ne ia isa mo, ia mainae tewa.
5 Wea kakau waniu, hutu nohue wani anoku runamo. Masi atinu. Anahatana iroma sio wason mosokinia, tea! Ne iromaso na oparisaa tau Yesus Kristus ia-ia. Sani oparisaa, mka onooso sani sio kaya. Tea mo, mka tau Anahatana irime ne mansiau mo, okatai. Itotoe ata sio wason anoo runa Anahatana, mka okatai.
6 Ne omi oamuira sio mosokinia tewa. Aikee sio kaya sahoro ouna mtinte tanumo. Sio kaya sahoro oapusaa parakanau na oapisara runamo. Reiso onesimo rei, tea!
7 Sio sahoro ouna sio umau oruni Yesus nanai iake tewa. Aikee nananake rei sahoro iamuirai. Ia wain nanai rei sahoro irimemo.
8 Anahatana ne maunaune wani mainae nai osa mo, wan san rei, “Anomo runa ia sia man sani anomo runa ruamo.” Maunaune reini wani tau ne anamanaya. Munata opusu Anahatana ne maunaune rei ia-ia, areimo ouna sae wani iake.
9 Ne sani oamuira sio kaya runa sio mainaya ia-ia, ne ouna sio mosokinia runa sio ikina ia-ia tewa, areimo opalalosa. Opalalosa tau opusu Anahatana ne maunauna rai tewa rei, tea!
10 Masike ia isa ipusu Anahatana ne maunaune isa man tewa oi iae, areimo ipalalosa noo sani ipusu ne maunauna pusire uture tewa oi.
11 Tea mo, Anahatana iahata, “Pene sahu-sahu saham.” Ia iae iahata, “Pene ohunu.” Reiso sani osahu-sahu saham tewa, ne ohunu, areimo opusu Anahatana ne maunauna tewa sirinia.
12 Reiso sani oanamana te ouna sae man, ainati! Tea mo, mka Anahatana iarinii ia sia wain titue na ia sia wain titue tewa. Mka iarinii ata kani opusu ne maunauna te tewa. Opusu ne maunauna, areimo opalalosa tewa nea.
13 Sani ia isa anoi runa mansia tewa oi, mka Anahatana anoi runai tewa oi tau iarinii ia sia wain titue na ia sia wain titue tewa. Ne sani anomo runa mansia mo, mka Anahatana anoi runamo oi tau iariniita.
Kahurae onoo pusu re atata ata iparisaa
14 Wea kakau waniu, hutu nohue. Sani ia isa iasau iahata, “Au uparisaa tau Yesus Kristus” ne ipusu ne maunauna tewa. Iakahai ia isa tewa oi. Mka isupu ne sae? Mka Anahatana iapuheui na ikatai rotu-tu ria supan?
15 Atieu rei sani mo kaka wani wain iparisaa tau Yesus Kristus ne ne apia runa ne muaina umau ralai-lai tewa na iai pena onone ranie.
16 Ne hasae oasau osiki, “Eu ia-ia. Ne au mka uainisi osia na Anahatana irui iake osia na aia tiam pokone. Ausahu me papi kapitorone na pene amahata.” Ne omi ruamo orui apia runa muaina osiki tewa. Oakahaiki tewa.
17 Sani rei iae runa ita wani iparisaa tau Yesus Kristus. Sani iasau iahata, “Uparisaa.” Ne kahurae sio onoo ata iparisaa pusu onoota iakahai ia seia man. Ne sani iparisaa man, areimo iparisaa titue tewa. Areimo sani ia wain imatai nea. Iakahai ia isa tewa oi.
18 Sani ia isa iasau ata, “Sio umau oparisaa, sio umau oakahai ia seia man.”
Au mka uasau sani ano akahai ia isa tewa oi, ano bisa atuhete osiku tewa ata aparisaa tau Yesus Kristus. Ne au mo, mka uatuhete ata uparisaa tanui pusu uakahai ia seia man.
19 Omi oparisaa ata Anahatana mo, Ia osa man. Areimo titue. Ne sakahatena iae oparisaa ata Anahatana Ia osa man. Reiso okaitau hunu ruao rotu-tu okana-kananunu!
20 Arirunea! Mai na uatuhetemo. Sani ia isa iasau ata iparisaa tau Yesus Kristus, ne iakahai mansiau tewa, mka Anahatana iapuheui na ikatai rotu-tu ria supan tewa.
21 Anahatana iasau ata moa upu moa momo Abraham ia manisate pusu ne atata. Tea mo, iaunutu anai Isak roe hatu waron oranere noore sani anau. Iaunutui roe hatu hahaya na nanie ikenui osi Anahatana.
22 Kahurae anei ata iparisaa man tewa. Ne ipusu ne maunauna oi. Ipusure reiso iparisaa pusi anoi.
23 Areimo manisate erepusu Anahatana ne anamanae reini, “Abraham iparisaa tau Anahatana reiso Anahatana iahata, ‘Abraham, ia mo, ia manisate.’ ” Anahatana ioi Abraham tau ne neta.
24 Reiso omi oanei nea ata Anahatana iasau ata ia isa ia manisate pusu ne atata oi. Iasau tewa pusu iparisaa man.
25 Isa honu. Rahab, ia pina numa naue rei. Iapusaa Yosua ne sio wason osaka onoo-noo no nisau. Iauhunso oyo iakahaiso na osihaso. Iaisosiso na onunso pusu arena tamene. Reiso Anahatana iasau ata Rahab mo, ia manisate pusu ne atata.
26 Reiso, sani ia isa watipusi nahai, areimo imatai nea rei, tea! Areimo sani iparisaa. Iparisaa ne iakahai ia isa tewa oi. Iparisaa titue tewa. Noo sani imatata nea rei, tea!