15
Matieue rerihoni rompa anae wani tihoniki
1 Taue isa, sio mainisi peau runa sio palalosaya umau oeuso noi Yesus nanie oatinui iruni.
2 Ne sio onata arihoni akama Yahudi runa sio matuhete Musa ne maunauna umau oamum ananaso. Oahata, “Ikata sio palalosaya. Orue oaiso okata umau.”
3 Yesus iatinu sani rei oyo iruni matieue isa. Matieue rei mo, atinui sani rei.
4 “Sani ia isa arihoni omi reini mo, ne rompau hata utun. Oyo hatae isa tihoniki. Mka iuna sae? Mka irori rompa hata hutu sia rahana sia rai noi pesete oyo ieu inina rompa osa wani tihoniki rei rotu-tu isupui tea!
5 Oyo sani isupu ne rompa hatae wani tihoniki rei mo, anoi mirike rotu-tu iasaoai roe manai.
6 Ihokai poe numa oyo ioi ne netau runa ne mansiau sui ne numa nusue. Oyo iahata, ‘Mai na pusita anori mirika. Tea mo, usupu we rompa hatae wani tihoniki rei nea!’
7 Uasau osimo. Roe noiyaha mo, mka sani rei oi. Sani ia isa wain saka ipalalosa oyo iarihoni ne rosau nea, mka sio wason roe noiyaha anoo mirika. Sio mo, anoo mirika nai osa sani ia isa waini saka ipalalosa rei iarihoni ne rosau renesi sio hutu sia rahana sia wasoni oata kani opalalosa tewa rotu-tu kahurae oarihoni no rosau.”
Matieue rerihoni ai totue inate wani tihoniki
8 Yesus iruni runa matieue isa. Atinui san rei, “Ia pina isa ne ai totu perak inata hutusa waron nene hunonia mainaya. Sani ne ai totue inate isa tihoniki mo, mka iuna sae? Mka inai kamane, inana kasanate, oyo ikopa numa anoe rei sui osa rotu-tu isupui, tea!
9 Oyo sani isupui, oyo ioi ne netau runa ne mansiau sui ne numa nusue. Oyo iahata, ‘Mai na pusita anori mirika. Tea mo, usupu we ai totue inate wani tihoniki rei nea!’
10 Uasau osimo. Anahatana ne maisosia roe noiyaha iae wason sani rei oi. Anoo mirika sani ia isa waini saka ipalalosa iarihoni ne rosau rai.”
Matieue rerihoni Anahatana iapusaa sio wason oarihoni no rosau
11 Yesus iruni matieue na iatuheteso ata sani ia isa iarihoni ne rosau, Anahatana isiru heu ne rosau rai. Iahata, “Ia onate isa ne hehuka hanaia sio ua.
12 Taue isa ia iki muie ituruhaka iakakapa iasau osi amai. Iahata, ‘Ama, sama we pahakian arihoni me rusun nea.’ Amai iatinu sani rei, oyo isama ne pahakian arihoni ne rusun osi ne hehuka hanaia uaso.
13 Potuina tewa oi, ia iki muie ieu iahen pusi ne pahakian rai oyo ieui noi nia hainau isa. Noi rei iaisei ipesi-ipesi ne ai totua rai tau ruai ne sanan mani.
14 Taa ne ai totua rai pusire, sira tau otoe rei omata muaine. Ia ikine rei iae, imata muaine oi.
15 Reiso ieui noi ia isa noi otoe rei na iainisi na ipakarian osiki. Oyo ia rei iunai ipakarian noi tanui. Iaisosiki ieui ipana ne hahu noi ne nisi.
16 Ipana hahu oyo iahana imakaneai nai osa. Reiso nanie iai hahu nene muaia. Ne ia isa man tewa oi, irui muaine osiki na iai.
17 Taa san rei mato ianei ruai oyo iasau pani anoi, ‘Amaku ne sio pakarian osupu muaina panesi tau oaiso rotu-tu no muaina nesia. Ne au wan umata muaine.
18 Reiso nanie ununiku poe amaku na uanamana runai. Mka uasau osiki ata, “Ama. Usopa ukoku roua ne pene anom resaa tanuku! Tea mo, upalalosa tau Anahatana na una sana tanua oi.
19 Reiso aoiku tau anam mo, iake tewa. Ne uainisi arihonia na aunaku upakarian osia man ukata me makahaia.” ’
20 Ianamana pani anoi pusi, oyo ieu iarihoni rei na inuniki poe amai.
On pan hainau asi, amai inooi, oyo anoi runai. Reiso amai irumai noi, iatipuniki na imukiki.
21 Oyo ia ikine hanaie muie rei iasau osi amai. Iahata, ‘Ama. Usopa ukoku roua ne pene anom resaa tanuku! Tea mo, upalalosa tau Anahatana na una sana tanua oi. Reiso aoiku tau anam mo, iake tewa.’
22 Ne amai iasau osi ne makahaia, iahata, ‘Eu rapu! Nana we papi naue wani iake nai osa na ausahui osiki. Ausahu sapauu tau hanai nakata na sandaliu tau ain atua.
23 Pusi oyo, nana koropou anae wani kopotuene oyo rehiki. Iuna karisaa mainae na pusita iai kata umau.
24 Areimo tau anaku reini mo, nooi sani imatai nea. Ne wain iamahaiki honu. Nooi sani tihoniki, ne isupui honu.’ Reiso ouna karisaa mainae.
25 Tau rei, ia iki hanai manonte waira ipakarian ria nisi. Inuniki, waini haineke numa, iatinu tihana tinunua. Iatinuso oakahuaso na omaraso.
26 Reiso ioi ia makahaie isa waini ipakarian noi numa rei oyo iasei, iahata, ‘Wasoni oakahuaso, omaraso mai numa reini tau sae?’
27 Ia makahaie rei iasau ata, ‘Wanim inuniki nea. Reiso amam iaisosima ahunu koropou ana pokotuene na una karisaa. Tea mo, wanim inuniki runa ne patane maka-makae.’
28 Ia ikine manonte iatinu sani rei, oyo anoi resaa mainae rotu-tu ipenei inusu pani numa anoe rei nea. Reiso amai ieu pusui pani manahane. Iapamanui na inusui pani numa anoe.
29 Ne ia ikine manonte iasau osi amai, ‘Atinu ama! Potuina reini upakarian sani me maniane osia. Uatinu tanua na upusu me maue sui osa. Ne auna sae osiku? Arui une-une anae hatae isa man osiku man tewa oi. Aruiki osiku na una karisaa na uai kata we netau man tewa oi!
30 Ne noo! Anam hanaie ieu ipesi sai-sai ne ai totua waron isupure arihoni ne rusun pahakian waroni asamare osima rei. Ipesi sai-saire na sio pina numa naua! Waini inuniki mai tanua, oyo ano ahunu koropou anae wani pokotuene osiki!’
31 Ne amai iasau, ‘Anaku, ano mo, akataku sui osa. We sae man, araimo osi ano oi.
32 Ne wanim reini mo, nooi sani imatai nea. Ne wain iamahaiki honu. Nooi sani tihoniki, ne isupui honu. Reiso ita mo, kahurae anori mirika na iuna karisaa iai ikata umau.’ ”