18
Pene arihon ainisi
1 Taue isa Yesus iruni matieue isa osi ne mampusua na iatuheteso ata kahurae oainisi sui osa pene anoo rasama-samaso.
2 Yesus iasau iahata, “Noi niane isa, ia isa wain saka iarinii parakanau mo, ikaitau Anahatana tewa. Anoi na mansia tewa oi.
3 Ia pina uhanu isa waimo niane rei oi. Ia mo, saka ieu-ieui noi ia wain saka iarinii parakanau rei. Oyo iahata, ‘Upuku! Akahaiku runa we parakana reini ee! Asau ata au sahoro au manisate na unesi kua we nisa rei.’
4 Ia rei iatinu sani rei, ne ipenei iakahai ia pina rei. Ne tau muie, iasau pani anoi, iahata, ‘Masike au reini mo, ukaitau Anahatana tewa na anoku na mansia tewa oi,
5 ne noso ia pina uhanu rei iakaremaku sui osa, reiso nene iake mo, uakahaiki runa ne parakana rei. Tea mo, mka ihokai mai tanuku sui osa na iuna putaku man.’ ”
6 Oyo Upuri Yesus iasau honu. Iahata, “Masi anomo rapeka runa sae waron ia wani saka iarinii parakanau iasau rei. Masike ia mo, ne hali kahatene!
7 Reiso Anahatana mo, mka iakahai sio wasoni iromaso tea! Mka iakahai sio wason oainisi onone ranie tea! Mka iunaso onapa potuina tewa.
8 Nanie uasau osimo! Anahatana mka iakahaiso. Mka iasau ata no parakana rei pusiki nea. Mka no parakanau pusire manisate sansana man. Ne Au Tumata Reini mo, Anahatana Ihitiku, mka uhokaku honu mai tuniai reini mo, mka usupu sio wason oparisaa tanuku te tewa?”
Matieue rerihoni iainisi na pene ihati ruari
9 Yesus iruni runa matieue isa na iatuhete sio wasoni onoo ruao ata sio mo, sio manisate mainae renesi sio pusiso reiso onoo sio pusiso sio ikina honua.
10 Yesus iahata, “Taue isa sio ua oeu roe Anahatana ne numa mainisie nanie oainisi. Ia isa mo, ia onate arihoni akama Yahudiu. Ia isa honu mo, ia mainisi peau.
11 Ia onate arihoni akama Yahudiu rei ihitio iainisi iahata, ‘Upu, uainisi iake arihonia tau au mo, nooku sani sio tamena tewa. Ukimanaka tewa, uakarota mansia tewa. Usahu-sahu sahaku tewa. Nooku sani ia mainisi peau reini tewa.
12 Minku unue mo, uamaon nai ua pusu Musa ne maunaune. Sae man usupure, usamare tau pahakian hutusa oyo urui pahakian osa osi Anahatana.’
13 Ne ia mainisi peau rei mo, hasae iooi hainau arihon sio wason noi Anahatana ne numa mainisie rei. Iarinaa na roe nante tewa oi. Hasae iroho unui matae na iatuhete ata ia mo, iatamisi ne rosau. Iasau iahata, ‘Upu, au reini mo, upalalosa. Anom runaku na asiru heu we rosau.’
14 Uasau osimo. Ia mainisi peau reini sahoro inuniki poe ne numa, Anahatana isiru heu ne rosau nea. Ne ia onate arihon akama Yahudiu mo, Anahatana iatinu ne mainisie tewa. Tea mo, ia sia man waini irati ruai areimo, Anahatana mka iapusaai. Ne ia wain iapusaa ruai mo, Anahatana mka iratiki.”
Sio wason anoo tau Anahatana nooso sani sio ikina wason anoo tau no mansia mainaya sahoro opusu tau Anahatana irime ne mansiau
15 Taue isa sio panesi oeuso noi Yesus. Sio umau ohoka orori no sio ikina oi na nanie Yesus hanai tanso na iainisi na Anahatana irui iake osiso. Taa Yesus ne mampusua onoo sani rei oyo, oakapuku tau sio wasoni orori no sio ikina rei.
16 Ne Yesus ioi sio ikina rei na oeuso mai tanui. Iahata, “Tapi sio ikina rei na oeuso mai tanuku! Pene soposo! Sio wason oparisaa resun tewa sani sio ikina reini mo, sio wason mka opusu tau Anahatana irime ne mansiau.
17 Atinu mai ia-ia nanie uasau osimo. Ia sia wain itapi Anahatana irimei tewa noo sani sio ikina reini, mka ipusu tewa sani Anahatana irime ne mansiau.”
Resun tau sio kupan otapi Anahatana irimeso
18 Taue isa ia mainae isa iasei tau Yesus. Iahata, “Matuhetene wani me iake! Kahurae una sae na uamahaiku ukata Anahatana rotu-tu ria supan?”
19 Yesus iasau, iahata, “Hasae Anahatana man sahoro ne iake! Ia isa ne iake sani Ia tewa! Reiso ano nanie asau ata Au we iake tau sae?
20 Ano anei ata tau Musa ne maunauna mo, Anahatana iasau ata, ‘Pene osahu-sahu mo pina hanai. Pene ohunu mansia. Pene okimanaka. Pene oruni mansia inamatane. Oamuira mo mansia mainaya.’ ”
21 Ia onate rei iasau ata, “Upuku! Sae warumo ano asaure reimo, au una pusire oni au ikine asi.”
22 Yesus iatinu san rei oyo iasau honu. Iahata, “Munata san rei mo, ano mo, kahurae auna isa honu. Ano mo, kahurae eua na ahen me numa hutae pusiki. Pusi oyo, eua asama kepen waron asupure rei osi sio mosokinia. Sani auna san rei nea, mka asupu me numa hutae roe noiyaha. Pusi oyo, aeu mai na aeu apusu Au.”
23 Ne ia onate rei iatinu Yesus iasau san rei oyo, ieui runa anoi kasiane nai osa. Areimo, ia mo, ne kupan kaya mainae nai osa.
24 Yesus ianei ata ia onate rei mo, anoi mtinte nai osa reiso inooi oyo iasau, “Anahatana irime ne mansiau ne resun osi sio kupan kaya opusui.
25 Masi oatinu. Areimo noo sani makapana wani nanae unta wani mainae nai osa. Makapana rei resun mkane renusui pusu sisunue matae. Ne sio kupan kaya mo, opusu Anahatana irime ne mansiau mo, resun nai osa.”
26 Sio wasoni oatinu Yesus iasau rei oasei. Oahata, “Munata san rei mo, mka Anahatana iapuheu ia isa tewa oi tea! Iapuheuso na pene iapasanaso tewa tea!”
27 Ne Yesus iasau osiso iahata, “Anahatana imaha iuna sae man wan mansia ounai kua tewa. Reiso, Anahatana imaha iapuheu ia sia man.”
28 Oyo Petrus iasau ata, “Ama! Ami mo, aeu arihoni ma sae man nea na apusu Ano!”
29 Oyo Yesus iasau ata, “Atinu mai ia-ia nanie uasau osimo. Ia sia wain ieu iarihoni ne numa, pina hanai, kaka wan, mansia mainaya, te ne hehuka noso nanie isima ata Anahatana nanie irime ne mansiau nea,
30 mka tau wain iamahaiki mai tuniai reini isupu panesi arihoni sae waron iarihonre rei. Na sani imatai nea, mka iamahaiki honu ikata Anahatana rotu-tu ria supan.”
Yesus isima na mka imatai
31 Yesus ioi ne mampusua hutusa rahana ua na sio ruao man oyo iasau osiso. Iahata, “Nanie ieuta roe kota Yerusalem. Mka pusire waron Anahatana ne sio mamsima runa ne maunauna okanu rerihoni Au Tumata Reini Anahatana Ihitiku, mka pusire raeu roe rei.
32 Sio Yahudiu mka oruiku osi sio wason sio Yahudiu tewa na oaumaniku, okumateneku, na ohutoku.
33 Osapuku tau awane oyo ohunuku. Ne nene poua san rei, uamahaiku honu.”
34 Ne, ne mampusua oanei sae wani Yesus iasaui osiso rei tewa. Areimo tau Anahatana iunaso na pene oaneiki.
Yesus isuisene ia mata putie
35 Yesus sio wason haineke ohokaso pani kota Yeriko. Pan rei mo, ia mata putie isa waimo iruei noi arena nusue. Waimo iruei iai-iainisi ai totue.
36 Ia mata putie rei iatinu sio hutue oniku, reiso iasei iahata, “Sae rei?”
37 Sio oasau osiki ata, “Yesus, ia kota Nasaret rei, wain inikui.”
38 Ia mata putie rei iatinu san rei oyo iakapona. Iahata, “Yesus! Ano aia Daud upui momoi! Anom runaku mkane ee!”
39 Sio wasoni pani uae oakapuku tanui. Oahata, “Amaturua!” Ne ia rei iakapona sui osa sirinia. Iahata, “Daud upui momoi ee! Anom runaku mai mkane ee!”
40 Yesus iatinu san rei, oyo iaraoo. Iahata, “Orori ia mata putie rei mai tanuku.”
Ia rei ihoka noi Yesus, oyo Yesus iasei tanui. Iahata,
41 “Anina nanie una sae osia?”
Ia rei iahata, “Upu! Nanie unoo.”
42 Yesus iahata, “Anoo mosa! Aparisaa tanuku, reiso wani usuisenea.”
43 Sira tau ia mata putie rei inoo mosa. Ieu ipusu Yesus iainaa runa Anahatana. Iahata, “Upuku Anahatana. Uainisi iake arihonia. Unoo mosa nea.”
Sio panesi wasoni onoo rei, pusiso oainaa runa Anahatana oi.