5
Yesus iroma ne mampusua wason mataanoe
1 Taue isa Yesus iooi nau Wae Galilea nusue. Sio panesi oo ohoriki nanie oatinu Yesus iaunau rerihoni Anahatana ne anamanaya.
2 Yesus inoo lepa-lepau ua nau waene rei nusue. Sio mapaparia wason no lepa-lepau rai osipuso nea na wason oseka tau no ueta.
3 Reiso isaai roe lepa-lepa isa. Lepa-lepa reimo, Simon ne lepa-lepa. Oyo iaisosi Simon iruru ne lepa-lepa rei hainau mkane arihoni kaimenne. Oyo iruei nau lepa-lepa rei na iaunau sio panesi rei.
4 Iaunauso pusi oyo, iasau osi Simon. Iahata, “Asai lepa-lepa reini hainau mkane, nau naue reinau, na pesi ueta na ranana ikaya.”
5 Iahata, “Upu. Ami apakarian resunima on monosi rotu-tu omnanoe repa na nanie asupu ikae. Ne asupu sae isa tewa oi! Ne ano aisosima reiso mka upesi ueta raini honu.”
6 Taa opesi no ueta rai, sira tau osupu ikaya panesi rotu-tu ueta rai nanie wakihare nea.
7 Reiso oauwae no netau umau wason tau lepa-lepa tamene na oeu mai oakahaiso. No netau rei ohoka oyo, pusiso oakahai umau tau ikaya rai. Oapataure tau lepa-lepa uare rotu-tu uare sina ramokoso.
8-10 Taa Simon, wain sio oiki tau Petrus oi, inoo san rei oyo isira. Irike tune iakapuni ain mai Yesus uai anoe iahata, “Upu. Au reini mo, upalalosa panesi. Reiso aeua arihoniku.”
Ne neta mapaparia osira oi. Sio ua arihoni sio reimo, Yakobis runa Yohanis. Sabedeus ne hehuka.
Oyo Yesus iasau osi Simon. Iahata, “Pene akaitau. On rahata reini mo, ano mka aeua anina ikae tewa nea. Ne mka aeua anina mansia na opusuku.”
11 Reiso oruru no lepa-lepa na ria kaimenne. Oyo oeu arihoni no lepa-lepa runa no ueta na no sae mani pusire na opusu Yesus.
Yesus isuisene ia wain ikupu unte wan iake tewa nai osa
12 Taue isa Yesus waipan kota isa. Isupu ia isa wain ikupu unte wan iake tewa nai osa. Ne patane mo, nooi iake tewa nai osa. Taa ia rei inooi, oyo irike tune iakapuni ain. Iahata, “Upu. Puruae me maue tau asuiseneku, areimo amaha suiseneku.”
13 Oyo Yesus iahusiei. Iahata, “Au we maue. Reiso ano iake rei nea.” Oyo ia rei iake nea.
14 Iasau osiki honu. Iahata, “Anom repeka. Pene aeua aruni osi ia seia oi rerihoni sapani na ano iake nea rein. Ne aeua roe ia imam na inooa. Inoo ata ano iake nea. Oyo arui manua osi Anahatana sani Musa iasau tau ne maunauna na ia imam iasau ata ano iake ia-ia nea. Reiso mka mansiau oanei ata iake nea.”
15 Ne sio panesi oatinu sirinia. Reiso ohoka oamanouso na oatinu ne maunauna na isuisene no kupua inaya oi.
16 Ne, Yesus isaka ieu noi tihu otoa waron meneta na iainisi.
Yesus isuisene ia wain italae
17 Taue isa Yesus wain iatuhete noi numa isa. Sio onata arihoni akama Yahudi umau runa sio matuhete Musa ne maunauna umau wason oru-rueso pan numa rei oi. Sio onata rei runa sio matuhetena rei pusiso ohokaso on pan niana pusire pan otoe Galilea, otoe Yudea, na on roe kota Yerusalem. Upuri irui kawasa osi Yesus na isuisene sio kupua.
18 Oyo sira tau sio umau ohoka ohana ia talae isa tau ne kinoe. Onina nanie onususo pan numa anoe rei na oautue ia rei noi Yesus uai anoe na isuisenei.
19 Ne okeka kua mansia hutue rei tewa reiso onusu iake tewa. Reiso osaaso pusu oane na roe numa rei nene hahae. Oyo ohuka nene ainataya. Ohukare oyo, oratiki tau ne kinoe mai Yesus uai anoe runa sio panesi rei.
20 Taa Yesus inoo sio orori ia rei mo, ianei ata oparisaa mainae. Reiso iahata, “Kakaku. Waniku. Me rosau, usiru heure nea.”
21 Sio onata arihoni akama Yahudi runa sio matuhete Musa ne maunauna oasau pan anoo. “Ia reini mo, ia seia? Ianamana sani ia mo, Anahatana rei! Na nanie isiru heu rosau. Anahatana ruai sahoro ne kawasa isiru heu rosa!”
22 Ne Yesus ianei anoo. Reiso iahata, “Nanie oarinii san rei tahae?
23 Sani uasau, ‘Me rosau, usiru heure nea.’ Ne sapani na oanei ata kani usiru heure te tewa? Ne sani uasau, ‘Ahitio na eu.’ Omi mka oanei ata au we kawasa usuisene!
24 Ne sani usuisene ia reini, mka oanei ata Au Tumata Reini mo, Anahatana Ihitiku, we kawasa mai tuniai reini na usiru heu rosau.”
Oyo Yesus iasau osi ia wain italae rei, iahata, “Hitio na siu me kinoe reino na anunia.”
25 Sira tau ia talae rei ihitioi noi mansia hutue rei uao anoa, oyo isiu ne kinoe na inuniki iai-ainaa runa Anahatana.
26 Mansia hutue rei pusiso osira hunu ruao. Osira reiso oainaa runa Anahatana. Oahata, “Ira oe! Rahata reini matoro ami anoo sima-simane wan mainae nai osa reini!”
Yesus ioi Lewi
27 Yesus isuisene ia italae oyo ihokai nanie ieui. Inoo ia mainisi peau isa. Ia mainisi peau rei mo, nanai Lewi. Waipo iruei poe ne numa mainisi peau. Yesus iasau osiki, “Mai, na apusu Au!”
28 Lewi iatinu san rei oyo, ihitioi iarihoni ne pakarian rei runa ne sae man na ipusu Yesus.
29 Taa san rei oyo, Lewi inana muaina na iuna nasae osi Yesus poe ne numa. Sio mainisi peau panesi runa sio umau oi orueso oaiso okataso oi.
30 Ne sio onata arihoni akama Yahudi runa sio matuhete Musa ne maunauna oakapuku tau ne mampusua. Oahata, “Nanie oaimo okata sio mainisi peau runa sio umau wason opalalosa oi tahae?”
31 Yesus iatinu san rei oyo iahata, “Sani ia isa ikupui tewa, inina ia mamsuisene tewa. Ne ia wain ikupui sahoro ininai. Au mo, nooku sani ia mamsuisene rei oi.
32 Uhokaku mai tuniai reini mo, nanie uoi sio wason opalalosa na oarihoni no rosau. Ne sio wason oata ruao oamanisa mo, uhoka na uoiso tewa.”
Yesus iatuhete rerihoni ia sia ipusu Anahatana ne maunau honue, pene tentenei na ipusu maunau monae
33 Sio onata arihoni akama Yahudi runa sio matuhete Musa ne maunauna oasau osi Yesus. Oahata, “Yohanis ia mamsohue ne mampusua oamaon na oainisi sui osa. Ami onata arihoni akama Yahudi ma mampusua iae ouna san rei oi. Oo, ano me mampusua mo, oai oninu sirinia tahae rei?”
34 Yesus nanie iatuheteso ata oni ikata ne mampusua asi, ne mampusua oamaon, anoo rapunokoso iake tewa. Reiso iahata “Rerihoni omi mo, sapan? Mka oaisosi sio wason ohokaso tau karisaa mausahaya oamaon oni ia hanaie wain ne karisaa mausahaya rei waimo ikataso asi? Tewa, tea!
35 Ne mka sio onana ia hanaie rei arihoniso, samatoro oamaon, anoo rapunokoso.”
36 Iruni runa matieue reini osiso na pene sio wasoni opusu Anahatana ne maunau honua mo, pene otentene na opusu maunau monaya sani iamaon. Iahata, “Ia sia mani iaturui papite wan monae tau nipa sinte wani honue tewa. Sani iuna san rei mo, mka papite wani honue wakihai, na nipa sinte wani honue mka pannuhu runa papite wani monae rei tewa.
37 Areimo nooi sani iaiinu tihu anggur wan honue tau tasi wani sio ounai arihoni une-une unte wan monae nea tewa. Tea mo, mka tihu anggur rei reuna tasi wan monae rei wakihai. Oyo tihu anggur rei ereohui sai-saiki na tasi iake tewa nea.
38 Ne tihu anggur wan honue mo, kahurae aiinui tau tasi wani honue oi, na uare iaka sirinia.
39 Sani ininu anggur monae nea, ipenei ininu tihu anggur wan honue nea. Tea mo, mka iahata, ‘Anggur wani monae mo, iake tunne nai osa.’ ”