16
Yesus iamahaiki honu
1 Ranie hatae wan sio Yahudiu oamuira Anahatana renikui nea, oyo Salome, Maria (arihon nia Magdalena) na Maria (Yakobis inai) tonso oeuso ohane mina hau rihue nanie osonai roe Yesus tinain.
2 Tau omnano tunne, ranie hatae mataanoe arihon minku unue rei, oeuso poe hatu nohue tau ranie resaa nea.
3 Oasei tau umau ata, “Ia seia mka iakahaita na ikamauni hatu wan renete hatu nohue nene mitanunue omi?”
4 Hoka poe oyo, onoo roe uae, samatoro onoo ata sio okamauni hatu rei arihon mitanunue nea. Hatu rei mainae nai osa.
5 Reiso onususo pan hatu nohue rei anoe, samatoro sira tau onoo ia nasonane isa iru-ruei mai hanao wanana. Ia wain iausahu papi naue wan putie. Onoo ia nasonane rei, reiso osira hun ruao.
6 Ia nasonane rei iasau osiso ata, “Pene osira. Onina Yesus arihon nia Nasaret. Ia wain sio opakui roe hini wan reniene. Ia mo, iamahaiki honu nea. Ia mo, wain rei tewa nea. Masi onoo, naniai wan oaunutui wapan rei.
7 Ne masi oeu orun osi Petrus na ne mampusua pusiso. Osima osiso ata, ‘Yesus wain ieu ianaone poe otoe Galilea nea. Poe rei, omi mka onooi sani naone iasau osimo rei.’ ”
8 Reiso ohokaso arihon hatu nohue rei, oyo orumaso. Tea mo, osira na okaitau. Oasau sae isa tewa osi ia seia man oi. Tea mo, okaitau hun ruao.
Yesus iatuhete ruai osi ne mampusua
9 Yesus iamahaiki honu tau omnano tunne tau ranie hatae mataanoe arihon minku unue rei. Mataanoe mo, iatuhete ruai osi Maria, ia pina Magdalena. Ia mo, naone Yesus inei sakahatena itu arihoniki.
10 Reiso Maria, ia pina Magdalena rei, ieu isima ata inoo Yesus wain iamahaiki honu. Isima osi sio wason naone okata Yesus. Sio rei wason orani oasanoata.
11 Ne oatinu ata Yesus wain iamahaiki honu. Oatinu ata Maria inooi nea, ne oparisaa tewa.
12 Oyo Yesus iatuhete ruai osi ne mampusua ua. Uaso onooi tamene. Onooi pannuhu wason oeuso mai nisiu.
13 Reiso onunso, oyo orun osi no netau. Oahata, “Ira oe! Ami anoo Yesus wain iamahaiki honu!”
Ne no netau rei oparisaa tewa sinia.
14 Tau muie, Yesus iatuhete ruai osi ne mampusua hutusa rahana osa pannuhu wason oaiso. Iasau nioi mainae. Tea mo, sio opisa unuo tewa na unuo onata reiso oparisaa tau sio wason orun-run rei tewa. Orun ata onoo Yesus wain iamahaiki honu nea.
15 Oyo Yesus iasau osiso ata, “Oeu ohori niana-niana pusire mai tuniai reini. Osima na Sou Iake rerihoni Au. Osima osi sio pusiso mai tuniai reini.
16 Ia seia wain iparisaa, oyo osohui na mansiau oanei ata iarihon ne rosau nea, Anahatana iapuheui na pene iapasanai. Ne ia seia iparisaa tewa, mka Anahatana iapasanai.
17 Sio wason oparisaa, mka ouna sima-simana waron ratuhete ata no kawasa arihon Anahatana. Ouna sima-simana sani onei sakahatena tau Au we kawasa, oanamana tau sou waron ruao oaneire tewa.
18 Munata orime tekene te oninu minne, sio rei okupu tewa, omata tewa. Munata oahusie sio kupua tau hanao, mka sio kupua rei iake. Okupu tewa nea.”
19 Upuri Yesus iaunauso pusi, oyo Anahatana iapusaai na roe noiyaha. Roe rei, Yesus isupu kawasa reiso iruei mai Anahatana hanai wanane.
20 Reiso ne mampusua oeu osima na Sou Iake rerihoni Anahatana sui niana-niana mai tuniai reini pusiki. Upuri iakahaiso oi na ouna sima-simana waron ratuhete ata no kawasa arihon Anahatana. Tau rei, sio pusiso oanei ata no anamanaya manisata.