2
Maunauna rerihoni iainaa runa Anahatana sapan
1 Mataanoe, uaisosimo oanamana osi Anahatana. Oainisi osi sio pusiso. Oainisi osi ruamo. Oainisi iake arihoni Anahatana.
2 Oainisi na Anahatana iakahai sio aiau runa sio pusiso wason no kawasa tau omi. Oainisi na iamahaita iamaturuta. Iamahaita iuna sae waron Anahatana ne suka man runa iamuiraso.
3 Iainisi osi sio pusiso, areimo iake. Iuna san rei Anahatana Ia Waini Iapuheuta anoi iake.
4 Tau sae, Anahatana inina iapuheu sio pusiso na oamahaiso rotu-tu ria supan. Ia nanie na sio pusiso oanei sae waron titue.
5 Tau sae, hasae Anahatana sahoro ia Anahatana titue. Waini ia osa iuna mansiau tau Anahatana ne netau. Ia reimo ia Kristus Yesus. Ia ruai, ia tumata oi.
6 Irui ruai na imatai na isenu sio pusiso no rosau. Reiso erelai nene umetene, Anahatana iatuhete ata ia nanie iapuheu sio pusiso na oamahaiso rotu-tu ria supan.
7 Reiso au mo, Anahatana ihitiku na uaunau sio wason sio Yahudiu tewa. Ihitiku tau Yesus ne maisosie osiso na uatuheteso na oparisaa titue. Au we anamanaya raimo pusire, waron titue. Uakarota tewa.
8 Reiso unina na sui supan-supan man, sio hanaia oanamana osi Anahatana. Oainisi osopa hanao osi Anahatana. Sio hanaia reimo, kahurae sio manisata onata. Oanamana osiki anoo rarue, otuntana runa umau tewa.
9 Au we maue na sio pinau pene onina na sio hanaia onooso iaka pusu no apia. Oausahu apia lahae. Oausahu apia waron muiran. Pene oaunupa no huau. Pene opake hunahane te wenua hunonia mainaya. Pene oausahu sae waron nene hunonia mainaya, na pene sio onooso iake pusu no apia.
10 Ne unina na sio pinau ouna atata waron iaka. Atata waron iaka osi sio pinau wason oasau ata oainaa runa Anahatana. Ouna iake na sio onooso iake pusu no atata.
11 Tau omi wani oparisaa oamanoumo oainisi, kahurae ia pina iatinu tanso iamaturui kahurae ikanahata ihahue.
12 Utapi ata ia pina iatuhete ia hanaie tewa. Utapi ata ia pina ne kawasa tau ia hanaie tewa. Kahurae sio pinau oamaturuso.
13 Tau sae, Anahatana ihaye tau Adam naone samatoro ihaye tau Hawa tau muie.
14 Ia aia sakahatene iakarota Adam tewa. Ne iakarota ia pina, oyo ia pina rei ipalalosa, iuna sae wani Anahatana isopo.
15 Reiso Anahatana iapasana sio pinau na sio ikina oamrae sio pinau tiao reun. Masike tiao reun rotu-tu reini, Anahatana iapuheu sio pinau na oamahaiso hainekei rotu-tu ria supan. Iapasanaso ro-rotu-tu ria supan tewa. Hete sae, oparisaa tau maunau titue sirinia. Anoo runa sio mansiau pusiso sirinia. Omi mo, omi manisata onata sirinia. Oapamese ruao sirinia.