Dos Iko-oruwon Sulat ni Pablo Atag to mgo Toho
TESALONICA
Unna nod Bosan
Notanggap taddot od pompomakoy no id lolivuung diyot Tesalonica iddos unnon sulat ni Pablo. Piru duwon poron kulang to kodlabbot dan moka-atag to kodlivod ni Disas Krays, oyyos nopiyod sikandan taddot osengan to duma no id livod don kun sikandin. Duwon mandad duma no id soro ron nid puung, su kunan dan ko asow ron iddos kodlivod ni Disas Krays.
De-en id popiyod ni Pablo inis iko-oruwon sulat din, amoy od inniyat kandan no konnod ka-antog kos kopomakoy ran. Id posaddoo rin mandad no unna pa od loppow iddos od supak to langun no suhu to Monama sasang to od ayas kos saa to mgo minuvu, idda pa od livod si Disas Krays. Id nonaw mandad ni Pablo kandan no ko-ilangan od ponayun dan nod pomakoy woy'd puung to moppiya, ahad id posupittan sikandan pomon to kopomakoy. Woy id pomandu rin mandad kandan no konna ran od popopogguu, ko konna, od oiluggat nod puung iling ongki Pablo.
Dos mgo Nokota-aw:
Kodpokilaa (1:1-2)
Dos kodposolamat woy koddasaa onni Pablo (1:3-12)
Dos kodloppow taddot od supak to langun no suhu to Monama (2:1-12)
Dos kod-inniyat no od mosalig diyot kopomakoy (2:13-17)
Dos buyuwon ni Pablo no od dosalan sikandin (3:1-5)
Dos pomandu atag to mgo poggulon (3:6-15)
Kodpongumusta (3:16-18)
1
Kodpokilaa
1 Siyak si Pablo kos mid sulat ka-ay duma ki Silas woy ki Timoteo. Na, id sulat doy ini atag koniyu no id lolivuung nod pompomakoy ruwot Tesalonica no nosokkad diyon to Monamon Amoy ta woy riyon tod Longaggon no si Disas Krays.
2 Muopa nod kotanggap dow kos kopiyannoy woy kosunayan no id pomon diyot Monamon Amoy ta woy tod Longaggon no si Disas Krays.
Dos Kodposolamat woy Koddasaa onni Pablo
3 Mgo suwod, inaayun koy od posolamat to Monama atag koniyu woy ollog en nod puungan doy ini, oyya su id mosalig pe-en kos koniyun kopomakoy woy id monit pe-en kos kodpohinowannoy row.
4 De-en id pobporoong doy sikiyu riyon tod lolivuung nod pompomakoy to Monama. Id pobporoong doy iddos kodti-is dow woy mosalig no kopomakoy, ahad diyot langun no kodposuppit woy koosayan dow.
5 Ini langun, od posivonnaa no motallong en kos kodhukum to Monama. Oyya su amoy ukit to mgo kosupittan no id ti-is dow, od kokita no ollog kow en nod lonug to kodhari rin.
6 Motallong kos kodhukum to Monama, su iddos od posuppit koniyu, od posupittan din mandad.
7 Woy sikiyu no id posupittan, od po-imaayyon kow nikandin ahad mandad sikami. Od puungan din idda init od kokita iddos kodlivod tod Longaggon no si Disas Krays duma to motuus no mgo ponolihan din,
8 woy od kolingkus sikandin to apuy. Od silutan din iddos waad pomakoy to Monama, woy dos waa id tanggap to Moppiyon Dinoggan moka-atag ki Disas nod Longaggon ta.
9 Od oilasoy sikandan to silut no waad tomanon woy od po-owan diyot isowwan tod Longaggon, woy dii ran en od kokita iddos se-aa to kotuusan din.
10 Od kotuman ini langun diyot kodlivod tod Longaggon, su amoy iddos mgo minuvu to Monama, od doong woy'd posivantug kandin. Od kolonug kow mandad to koddoong kandin, oyya su id pomakoy kow man taddot id posivonnaa roy moka-atag kandin.
11 Ini en kos unayan no inaayun koy id dasaa atag koniyu, no od tovangan kow to Monama ta, no iddos pinuungan dow, od loppa taddot kod-aam din koniyu. Id dasaa koy mandad no ukit to kotuusan din, od kotuman kos langun no moppiyon puhawang woy pinuungan dow pomon to koniyun kopomakoy.
12 Ini en kos dosalon doy, su amoy od koposivontuhan iddos od Longaggon no si Disas Krays ukit koniyu, woy od kovantug kow mandad ukit kandin. Od kotuman ini langun pomon to kopiyannoy to Monama ta woy taddot od Longaggon no si Disas Krays.