Dos Iko-oruwon Sulat ni
PEDRO
Unna nod Bosan
Inis iko-oruwon sulat ni Pedro, id popiyod din atag to langun nod pompomakoy. Dos dontulon to kodsulat din ka-ay, amoy od pomonduwan din iddos od pompomakoy no konna ran od ikuu taddot od nonaw to konna bonnaa, ko konna, od ponayun dan amoy'd kotimulan pe-en kos koovottan dan moka-atag ki Disas Krays (3:18). Id pomonduwan sikandan ni Pedro, oyyos iddon timpu, duwon mgo minuvu no id ponnonaw to konna bonnaa (2:1-22).
Sokkad taddot id nonaw ran, konnad kun od livod si Disas Krays, su nouhoy ran man idda, piru taman ko-ungkay, waa ron man sikandin id livod (3:4). Na, id ikahi ni Pedro, no od tumanon en to Monama iddos tandu rin no od livod si Disas Krays. Dos unayan no waa ron sikandin id livod, pomon to mowwet kos posinsya to Monama taddot mgo mosaasaa. Id kopi-i rin nod boggayan sikandan to timpu no od sondit woy'd tanan to mgo saa ran amoy konna ran od silutan, ko konna, od kotobbus (3:9).
Inin sulat, duwon dakkoon koru-anon atag keta, oyyos od pokomosalig ini to ko-immanan ta no od livod en si Disas Krays. Id posivonnaa mandad ini, no iddos Nosulat no Kahit Monama, waa id pomon diyot poomdom to minuvu, ko konna, id pomon en to Monama. Su iddos Uhis no Ispiritu kos id potuntuu to mgo propeta, woy taddot dumon id posulat to Monama to kandin no mgo kahi (1:20-21; 3:15-16).
Dos mgo Nokota-aw:
Kodpokilaa (1:1-2)
Dos moppiyon kodbovotasan no ko-ilangan id timuu riyot kopomakoy (1:3-11)
Dos po-unsaran to mooggot no kopomakoy (1:12-21)
Dos od ponnonaw to konna bonnaa (2:1-22)
Dos kodlivod tod Longaggon (3:1-18)
1
Kodpokilaa
1 Siyak si Simon Pedro no uripon ni Disas Krays, woy sokkad a mandad taddot mgo apostoles din. Id sulat ku ini atag koniyu no nokotanggap to kopomakoy no dakkoo kos koru-anon iling to konamin kopomakoy ukit to kotoongngan ni Disas Krays no Monama woy Tohodtobbus ta.
2 Muopa nod kotimulan pe-en kos kopiyannoy woy kosunayan diyot koniyu pomon to nosodsorollan dowd iddos Monama, woy si Disas Krays nod Longaggon ta.
Dos Moppiyon Kodbovotasan no Ko-ilangan id Timuu riyot Kopomakoy
3 Na ukit to kotuusan to Monama, id boggayan ki nikandin to langun no ko-ilonganon ta amoy od oubpa ki nod ikuu to id kopi-it Monama. Od kopuungan ta ini, pomon to nosodsorollan ta en sikandin no id aam keta ukit to kandin no bantug woy kopiyannoy.
4 Woy ukit to kandin no kotuusan, id boggoy rin keta iddos mgo tandu rin no oray'n dakkoo kos koru-anon. Ukit ka-ay, od pokoporiyu ki mandad taddot morat no mgo ingowollon ka-ay to ampow't ingod, woy od poko-ikuu ki taddot botasanon to Monama.
5 De-en nokkaanokkaa kow amoy iddos koniyun kopomakoy, od kotimulan pe-en taddot moppiyon kodbovotasan. Na riyot moppiyon kodbovotasan, id timuu row iddos koovottan moka-atag to Monama.
6 Na riyot koniyun koovottan, id timuu row iddos kodtohoo to ko-ugolingun, woy riyot kodtohoo to ko-ugolingun, id timuu row iddos kodti-is to kosupittan. Woy riyot kodti-is to kosupittan, id timuu row iddos botasanon to Monama.
7 Woy riyot botasanon to Monama, id timuu row iddos kodginawa riyot mgo suwod to kopomakoy, ahad mandad diyot konnod pompomakoy.
8 Su otik inaayun dow ini od puungan, moppiya en kos od undahon to langun nod puungan dow, woy od kosodsorollan dowd si Disas Krays nod Longaggon ta.
9 Piru ko duwon od pompomakoy no waa riyot kandan inin mgo kodbovotasan, noko-iling sikandan to butud no diid pokokita ko ondan kos diyot ko-unnan, woy id lingawan dan no iddos id lihad no mgo saa ran, id posinsyan don to Monama.
10 Purisu mgo suwod, konna kow od popoomdom to iling tadda, ko konna, nokkaanokkaa kow no moppiya kos kodbovotasan dow amoy'd koposivonnalan no id aam kow en to Monama, woy tapoy rin don ini id puhawang. Su otik ungketen kos od puungan dow, konna kow en od pokorellos diyot koniyun kopomakoy.
11 Na ukit ka-ay, duwon en dakkoon kahaan ni Disas Krays nod Longaggon woy Tohodtobbus ta no od tanggap koniyu riyot waad tomanon no kodhari rin.
Dos Po-unsaran to Mooggot no Kopomakoy
12 De-en ahad nokosaddoo kowd tapoy tadda, woy nokodoralig don kos koniyun kodpomakoy taddot bonnaan nonaw no notanggap dow, ponayun a nod posampot koniyu moka-atag tadda.
13 Su atag koddi, moppiya en no id posampot ku ini koniyu laggun to no-uyag a pa.
14 Oyyos nokosaddoo a, no konna ad od kouhoy ka-ay to ampow't ingod, su ini en kos id posaddoo koddi taddot od Longaggon ta no si Disas Krays.
15 Purisu od noonokkalan ku no ahad ponunggeleng, wora ad ka-ay to ampow't ingod, od kosompottan dow inaayun inis id nonaw ku koniyu.
16 Iddos id ponudtuu roy koniyu moka-atag taddot kotuusan ni Disas Krays nod Longaggon ta woy dos kodlivod din, waa idda id bobbovallan no mgo itulon, su matamata roy ron en moho tid kita taddot se-aa to kotuusan din.
17-18 Oyya su id duma koy en kandin diyot uhis no buvungan iddot id posivontuhan sikandin to Monamon Amoy, woy id pokita rin iddos se-aa to kotuusan din. Tolinga roy ron en moho tid dinog taddot bawos to Monamon Motuus no id pomon diyot datas to langit no mid ungketen to, “Ini en kos anak ku no id dokollan ku to ginawa, woy oraroy ku sikandin id kahaa-i.”
19 Na, idda en kos unayan no oggot pe-en kos kodsalig doy taddot id ikahi to mgo propeta. De-en ollog nod pominoggon dow iddos id ikahi ran, oyyos noko-iling idda to suu no od pokoma-awang diyot mosukirom. Ponayun kow nod pomakoy tadda, taman tod loppow iddos bitu-on to sollom diyot od ka-allow ron, no iddos kohulugan, idda en so allow to kodlivod ni Disas Krays no od pokoma-awang to koniyun poomdom.
20 Purisu ko-ilangan nod koovottan dow, no waa en id poponudtuu to Monama taddot mgo propeta riyot Nosulat no Kahi rin no id pomon diyot kandan no koovottan.
21 Oyya su iddos id poponudtuu kandan, waa id pomon diyot kodpopoomdom to minuvu, ko konna, id pomon en diyot Monama ukit to kodpotuntuu kandan to Uhis no Ispiritu.