1 Avoeto dago iji koso be ungota ke ingae ue teho iresora avo inono ae ua avoeto dago heriso da Athens ta mihie 2 ungotenau namei Timothy amo God ta pure ari embo Keriso ta ke javotoho hande eaguja avo ungota degi ikaro pambaja ke sirikihera 3 amo ungo osaga memenga ere kogova avoeto egikagova Timothy ungo oje kahihirou sovera humbuto God humota be ava ikehere pambuhija. 4 Eto ungo kogova amo dago ungote mihie ke ehere ingihava amo osaga te memenga te kiagora God na uje ere ua amo mane haekasuja te kesora ainge ijiera avoeto osaga ere kogova. 5 Avoeto na ungota duru ingae iji koso iresona avo inono ae avoeto ungo Satan ta sovera na engekeoi egikagove dagota pure avo ajaja eagora Timothy na ungota humota ari do aingere avo kioja ikehere pambuhija. 6 Eto Timothy na ungota degi pambuto ungota vasiri kito egerembeto puvuto ungota osa ari te humota ari te peni vahaira ainge ehei ingito tunga javotoho ere ora eto ke nei ehei ingera amo ungona dago hotembeto osa ue ehako dago kesi uje ereova ainge dombo dago ungo kesi uje ereora. 7 Avoeto dagota namei kamei dago osaga te memenga te kogora te ungo God humota be ereova avo ingito tunga javotoho ue mihera. 8 Eto ungo Bada egikae sovera te tapa iresova amo dago ta irari javotoho iresuja. 9 Eto dago na ungo avoembo ungotenau Mama God ta tombu ta mihie tunga javotoho be ereora, eto ungo avoembo God osa isapamane ue 10 ungo tombu mine kia ue aro ungota humota ari avo javotoho be aisuja ainge iji te mume te pari ta ke avo eagora. 11 Eto ke nei pari ta eagora amo dago na ungota degi pambasora degi amo ungotenau Bada Iesu Keriso te Mama God te na sirikau tambu aisuja. 12 Eto dago na ungo osa eagora ainge dombo Bada na ungota osa ari ungo ta degi eto embo tapa ta degi irerembeto peni vahai ururou 13 ungota jo avo God na au sovera ari puvutuhurou ungotenau Bada Iesu na amita embo ototohu ga egerembeto puvurou God Mamo na ungo kogue amita toho avoeto ari sasapura irae teho kesuja avo pari ta eagora.