10
1 Eto Moses ta ke pepeni agi ue Judea embomeni na iji tapa God ta degi pene gaga ta ere ikihahera te ke pepeni amina embo javotoho ari inono aera, amita be amo Moses ta ke pepeni amo ari be mane rate ari be puvuresuja amita ahe kihira.
2 Eto embo na o teto pene ikari amina embo jajavotoho ari inono kito embo na amita ari sasapura mahu humbari irae ari avo kito amo pene ehako mane ikaehija
3 rate enana jua vahai vahai amita jo ta enana ta ari sasapura avo hotembihe pene kaiketo ere ikihahera
4 amo o ‘Cow’ siaja te o ‘Goat’ te eto o tapa amita orosa na embo ta ari sasapura amo egari irae ari inono ae ra.
5 Avoeto Keriso na enda ta puvuresi ue God ta degi ke einge ena, “Eto embomeni na Umo jakeka ijie o teto heveto pene neite neite ue ikagora avo inena kogue jenge erae ere ua avoeto hamo nau avo siriketo ikasi ere oa.
6 Eto nei amo embo ta ari sasapura irae aja o teto heveto pene gaga ta ikeore evekaguja avo inena kogue jenge erae ere ua.
7 Avoeto, God nau, ke erena amo no uje ana ke mahu kajari mihia avo ano inono inono aja asi uje ue puvena.” ke ainge Keriso na ena.
8 Eto ungo ke ingeva amo Keriso na ke kihi ta einge ena, “Eto Moses ta ke pepeni agi ue ari sasapura avoeto o teto heveto ikeore ji ta evekihoi pene neite neite eagora te ari ainge avo inena kogue jenge erae ere ua.” ke ainge ena.
9 Te ke nei tutumota amo einge ena, “Na uje no avo asi puvena,” ainge ena amo ari mahu avo toau irae ururou ari eha ihiketo asi ue ena.
10 Eto God ta uje ena amo hamo amita avo pene gaga ta ikena amo iji vahai ikena rate amo daroho irari ta pene avoeto amina ungotena otohu ere ora.
11 Eto ari mahu amo eingera, eto Judea ta priests na iji tapa o teto heveto pene gaga ta hande vahai aravo iji tapa kaikari ikagora te hande amina ari sasapura irae ari inono aera.
12 Te ungotenau priest vahai eha puvija amina ari sasapura ta hande iji vahai ikenu inono enu vihito God ta ingeni be ta arumbeto mihie
13 amita kitoho embomeni taro veau amita uhu avo embomeni ta hamo ta haito iresuja iji avo simba ue mihia.
14 Eto God ta embomeni tongopa ambu ue au otohu ara God na siriketo umbuna avo pene vahai amina enu enana ta ari sasapura irae enu embo jajavotoho eagora.
15 Eto Ahihi Otohu na ungotenau degi ta ke aravo araha ta hariketo eria amo einge kajari mihia,
16 “Eto Bada God na ke einge eria ‘Na noma eha kajari ta ke asona amo einge asona, nau ke pepeni tapa amo embo ta jo ta eto hotembari ta kajasona.’ ”
17 eto ke nei ena amo erevira, “Na enana ta ari sasapura te ke pepeni poekari te avo ehako mane hotembasona,” ke ainge ena.
18 Amo ari sasapura mahu hotembeto toari avoeto ehako mine mane aisora.
Ungotena God ta degi hombekasora
19 Avoeto namei kamei, ungotena kogora amo Iesu ta orosa amina ungotena degi Otohu be Otohu amita jo ta horari haite
20 amo degi peikari be mahu avo toto bo eha vasiri te amo Iesu ta hamo ai ta horasora.
21 Eto God ta bande Otohu ai ta amo ungotenau Priest Peni Dombo be amina mihia
22 avoeto ungotenau jo ari sasapura na tongopa avoeto hotembu hotembu eagora avo orosa na humbuto jahevau javotoho au umo javotoho na humbuto hamo ta tongopa egau javotoho au jo tapa na God humota ue God ta degi puvuresora.
23 Eto ke Ikari Embo avo humota ari haite avoeto amita degi do humbasi uje ere ora amo ihikitoki mane asora te tihi tambueto ere pambuhuma humbasora
24 eto ungotena daingeto osa mine ara ue ari jajavotoho asora amita ke avo oje kahari mine ara aisora
25 eto embo nei nei amo vahai ta horukari peive ere ora te ungotena vahai ta horukari avo mane toasora. Eto Bada ta puvurari iji avo puvuto ere hua avo kito sovera ari ta ke javotoho mine ara evujo.
26 Rate embo amuna God ta ke be avo ingito ari sasapura toae kaikari aisuja amo amita ari sasapura ta pene Keriso na ikena avo iraera
27 te embo amina ari sapura ta hajire God ta degi humbasuja eto God na amita kitoho embo ji vevere pajire be ta ikau evikihirou ari avo amita degi puvuresuja amo umo kiari avoeto joru ue iresuja.
28 Eto ari mahu amo eingera, eto embo vahai na Moses ta ke pepeni avo amita uje na sapura unu embo nei heriso nei vahai na kito harikeo embo amo ihase ae teo pehena.
29 Ainge dombo God ta Meni ta orosa ari eha ta overekari amina embo egari javotoho ari haite rate embo amina God ta Meni ta orosa be mane ke ijie Ahihi Otohu ta degi urumbihe God ta Meni haito jaevekasuja amo amita ari sapura avo eto hajire peni vahai ngahia na ikau kesuja.
30 Eto God na ke einge ena amo ungotena kiari amo, “Enana ta ari sapura ta mine amo nanena ikasona,” ainge ena eto ke nei amo, “Bada na amita embomeni ta ari tapa avo siriketo amita hajire ikasi ke ena.”
31 Avoeto embo na God vasiri te amita ingeni ta veaute avoeto joru pajire be ue osaga kesora.
32 Eto ungo God ta usasa kihi humbuheva avo hotembevu. Eto iji amikote amo ungo na embo nei ta degi osaga memenga humbuheva te toae sovera eto mihaheva.
33 Eto iji nei nei amo ungona embo tapa ta tihi ta urumbari te memenga te kogueva eto iji nei amo ari ainge dombo namei kamei nei ta degi eo osaga koguo ungo na jo unu hondate ava.
34 Eto ungota namei kamei tipura ta ikeo mihio ungo na jo enu hondate ava. Eto ungota haja vajae egimbeto umbua te ungota daroho irari ta donda nununga ari avo hotembihe mine do ae toava.
35 Eto ungota hamo ta sovera ari amina ungota hotari peni be avo humbasova avoeto hamo ta sovera ari avo gosukavojo
36 eto ungo God na hotari umbava ke ena avo sovera eto God na ungo do ava uje ere ua avo ere uma hotari avo humbasova.
37 Amita ke amo einge kajari mihia, “Eto iji isapa eto Embo puvuresuja amo porere mane aisuja te puvuresuja.
38 Eto embo nau javotoho amina Na humota ue iresuja te Na toasuja amo Na amita degi tumo aisona.” ke ainge kajari mihia.
39 Rate ungotena God egikari embo mane avoeto God na au daroho irari ta osaga memenga mane kesora te ungotena God humota ururoro amo God na oreketo humbari embopo ra.