8
Ungotenau Priest Peni Dombo amo Iesu ra
1 Eto ke erera amita be amo erevira. Ungotenau priest peni dombo amo Keriso ra eto amita ari amo ke erena vahai aravora. Eto amina uhu i ta avo arumba Bada God ta ingeni be hena ta arumbeto mihie
2 utu i degi otohu ai ta Bada God ta tombuta God ta ke agi ue pure ere ua eto degi otohu amo embo na ae rate God na ena.
3 Eto priests pepeni na o teto heveto amite donda nei nei amite tapa God ta vivi ihagora te ungotenau priest peni amita hande ikaguja amo mihia.
4 Eto enda ta priest na Moses ta ke pepeni simba ue vivi ihagora avoeto Iesu na enda ta iraehija amo priest mane aehija
5 amita be amo enda ta priests na pure do eagora amo uhu ta do mihia amita aririvo avo ahe kihira eagora eto Moses na amo ainge dombo pene ikasi oro gerikihinu God na Moses ta degi ke einge ena, “Eto umo tiri hamo ta do koguea ainge dombo inono ta ejo.” ke ainge God na ena.
6 Eto ke be amo Iesu na priest eto pure aja ikena amo peni be rate enana ta pure amo isapa ra, eto God na embo ta degi ke ijie noma eha kajena ai ta eto be javotoho puvuroja ena amo noma mahu kajena ainge manera.
7 Eto noma kihi embo ta degi kajena amo ivo irae kito amo noma eha mane ikaehija
8 rate God na amita embomeni ta sapura harikihe ke einge ena, “Eto na bada God nane erena, amo iji puvuto ere hua avoeto Israel embomeni ta eto Judah embomeni ta noma eha kajasona
9 amo noma mahu enana ta ohihi ta ingeni ta humbuto Egypt enda toto pahue kajea aingeko mane aisuja. Eto nau noma mahu kajea amita ke amo enana agi ae avo kito toa te na Bada God nanena erena.
10 Amo Israel embomeni ta noma eha amo ambota kajihe ke einge aisona amo ke pepeni nau avo enana ta siro ta ikihe jo ta kikiva aisona eto na enana ta God ano enana amo embomeni nau aisora.
11 Eto embo peni te isapa te tapa na ari nau mo do aingere avo kiae ke ko mane aisora avoeto da vahai embomeni na namei ta degi ahe poekihe ke einge, ‘God avo be kijo.’ ke aingeko avo mane ahera.
12 Eto enana ta ari sasapura avo hotembeto toasona amo ehako daroho irari ta mane hotembasona.” ke ainge Bada God na ena.
13 Eto God na noma eha kajari avo ke ijie noma mahu kajari avo toau jaise eto saivasuja.