13
Matsh mehk wo ha mihshmedo g Barnabas ch Saul
1 Sh am haꞌi ep d Jiosh haꞌichu i tashogiddam Antiok t am. Hema idam ash hab chehgig Simon ch wabshaba hab e aꞌaga S‑chukchu. Kush hema d Lucius ch ab Cyrene t amjed. Kush hema d Manaen ch am wehmaj geꞌeda g kownal Herod. Idam ash am ha mashcham am ha wehm g Barnabas ch Saul.
2 Kush am hu hebai wehsijj am heꞌekia tashkaj wabsh e hoꞌigeꞌidahun ch hab pi haꞌichu koꞌa. Kush am ha tashogid g Hekia S‑apꞌekam Gewkdag mash g Jiosh hab kaij ab ha wui, “Neh, ab ant ha mohtoꞌi g Barnabas ch Saul mat gam hu mehk wo i ahgahi g haꞌichu ni‑ahga. Kumt am wo i ha dagito mat hab wo wa e juh.”
3 Kush am baꞌich i himchud hegai mash wabsh e hoꞌigeꞌidahun ch pi haꞌichu koꞌa ch ab hahawa ha taht idam Barnabas ch Saul matsh hekaj am chehgi mat ha dagito heg wui mat g Hekia S‑apꞌekam Gewkdag am i ha tashogi.
Mash am ha mihshmad g Barnabas ch Saul Cyprus t am
4-5 Tsh gam hu hihi g Barnabas ch Saul mash wa g Hekia S‑apꞌekam Gewkdag am i ha tashogid. Kutsh am ep i ha oi g John Mark matsh am wo i ha wehmt. Tsh idam ged hu dada Selucia kihhim t am. K id an hugidaj an g ge kahchki. K ab hihhim g wapalko. Kutsh idam Barnabas an i chehchsh wahlko ch ed k gam hu aigo i shulig k gam hu dada Cyprus jewed ch ed. Sh am hema kihhimag ch hab e aꞌaga Salamis. Kush am haꞌi chuhch g Tutuligo ha‑chechopi. Sh idam Barnabas am i wahpk ch am ha jehnigid ab amjed g Jesus.
6-8 Sh gam hu aigo hema ep kihhimag ch hab chehgig Paphos. Kutsh gam hu hihim k am ep ha jehnigid. Sh am da hegai mash d kownal id eda jewed ch hab chehgig Sergius Paulus. Kush am hema wehmaj g Tuhligo ch hab chehgig Barjesus ch d s‑hasigam haꞌichu hab wuadam ch ha iattogid mash d Jiosh haꞌichu i tashogiddam. Kumsh hab aꞌaga Elymas mo hab d ahga Ge Mahkai. Sh g kownal d si haꞌichu s‑amichuddam oꞌodham ch ab i ha wai g Barnabas ch Saul nash pi s‑kaimk g haꞌichu ha‑ahga ab amjed g Jesus. Tsh wabshaba ab ha wui kekiwua hegai Elymas k am i chum e nako mat hab wo juh g kownal mat pi ab hu wo ha wohoch.
9 Saul o hab ep e aꞌaga Paul Greek neꞌokikaj. Tsh g Hekia S‑apꞌekam Gewkdag ab ep si mah g Paul g gewkdag. Sh heg ab si shel i neid g Elymas
10 ch hab kaij, “Neh, dap Jiawul pionag nap pi ab wabsh i si shuhdags g pi apꞌekamkaj. K heg hab m‑wua map ab wui kehk g s‑apꞌekam ch chum gawul s‑junimk g Jiosh haꞌichu ahga.
11 Jiosh at hab wo m‑juh mapt pi wo nehnt heꞌes i tash.” Neh, bash kaij g Paul.
Kutsh am wa i hekaj woho hab e juh. Tsh am taht g Elymas mat ab haꞌichu si maꞌish g wuhpuij. K am wabsh i s‑chuhugam wehhejed. Tsh an i dahdaghi an chum hema gahgch mat am wo i wanim.
12 Tsh ab si e tods g kownal k ab i s‑wohoch neidok mash has masma g Jiosh am chehgid g e‑gewkdag.
Mash am ha mihshmad hegam Paul Pisidia jewed ch ed
13 Tsh am hahawa gahi ep i shul hegam Paul ab Paphos t amjed k gam hu dada Perga kihhim t am am Pamphylia jewed ch ed. Tsh wabshaba g John Mark am i ha dagito amai k gam hu uhpam hih Jerusalem wui.
14 Tsh amjed gam hu hahawa hihi idam Paul ch Barnabas Pisidia jewed wui. K am hema kihhimag ch hab chehgig Antiok. Kutsh am dada.
Tsh am i e ai g ha‑mihshmda tash. Kutsh ged hu i wahp idam Paul e wehm oꞌodham ha‑cheopi ed k am i dadhaiwua.
15 Kumtsh am neꞌokchul g Jiosh oꞌohana. Sh hegam mash d ha wanimeddam hab hahawa kaij, “T‑naipijju, chum ach si tatchua mamt am wo haꞌichu ha ahgi g hemajkam mat heg amjed ab wo i e gewpkai.”
16 Tsh ga hu hahawa i kekiwua g Paul ha baꞌich k hab kaij:
“T‑hajuni ch ahpim mam ia ha wehm ihm g Jiosh, ab g wo i ni‑kaiham.
17 Jiosh atsh ab i ha gawulkai g t‑shohshonbad matsh d wo hemajkamgajk. Kutsh am i muꞌida mash eda am kihkahim Egypt jewed ch ed. Tsh ab hahawa i ha doꞌibia ab ha amjed g Egypt hemajkam g si geꞌe e‑gewkdagkaj.
18 Kush an oiopo tohono jewed ch ed giꞌikko wehst‑mahm ahid ab. Sh g Jiosh am s‑hemajim ha nakogahim
19 ch am wo i ha wahpki id eda Canaan jewed. Sh eda g wewaꞌak kawod dakam hemajkam ia kih. Tsh g Jiosh ha hugio k g ha‑jewedga am aꞌai i ha tahpjel g t‑shohshonbad mash hab masma heki hu ahgid g Abrahambad.
20 Tsh heg i dahm am hahawa i ha chuhcha g Jiosh g s‑chu aꞌamichuddam mash am haꞌichu aꞌapꞌechud ha wehhejed.
“Tsh ga hu e ai matsh am i dahiwua g Samuelbad k d Jiosh haꞌichu i tashogiddam.
21 Kush g t‑shohshonbad ab si tahni g Jiosh matsh am hema wo i kei mat d wo ha‑kownaligk. Tsh g Jiosh am i kei hegai Saul mash d Kishbad alidag ch ab d Benjaminbad amjedkam. Kush heg d ha‑kownalig giꞌikko wehst‑mahm ahid ab.
22 Tsh g Jiosh im hu hab hahawa i juh g Saulbad k g Davidbad am i kei matsh d wo ha‑kownaligk. Sh hab kaij g Jiosh ab amjed:
Ihda David mo d Jesse alidag o am si ni‑tatchui oidch hab masma ch am e tashogi mat am hab wo juh hegai mant haschu ab wo i ahgi. Psalm 89:20
23 “Sh hab ep kaij g Jiosh matsh am hema wo i kei g Davidbad amjedkam matsh d wo t‑doꞌibiakamk. Kut wa woho hab e juh g Jiosh. K g Kehshaj hab chehgig Jesus.
24 T wabshaba g Jiosh ab hema wehpeg i wuhshad g t‑wehm oꞌodham. K id hab chehgig John ch ab i ha mihshmad ch hab ha ahg mat gam hu wo s‑ohhod g pi ap e‑chegitoi k wo e pahl wapko.
25 Tsh ihda John id hekaj am i kuhgi g e‑chikpan mo wa hab ha ahg g hemajkam, ‘Pi g hab wo shaꞌi ni‑elidad mani ahni d hegai mam si nenida. Pi ani d ahni ch d wabsh pi haꞌichu an hugidaj an. Mt wo wa nei mat am epai wo i e maskogi hegai mo hig woho d s‑has haꞌichu.’ Neh, bash kaij g Johnbad.
26 “Pegih, ni‑wehm oꞌodham ch ahpim mam hab waꞌap ab si has elid g Jiosh, ab o wehsijj d t‑wuikam ihda s‑kehg doꞌibiadag ahgaj.
27 Hegam kekelibad Jiosh haꞌichu i tashogiddam atki an oꞌoha matsh has wo masmak g Jiosh si Kehsha. K g ha‑neꞌoki e neꞌokchulid t‑shaꞌashagid wehs mihshmda tash. Kuki eda hegam t‑hajuni mo ab kih Jerusalem t ab pi amichud g haꞌichu ha‑ahga ch hab pi amich g Jiosh si Kehsha mat hekid am jiwia k chum s‑ha doꞌibiamk. Jiosh at am i kei g e‑alidag Jesus mat wo t‑doꞌibia.
28 K heg pi ha chuꞌijig. T eda hegam ab chum chuꞌijigch mat g kownal Pilate wo mua. Kumt ab naggia k mua kots t ab k ab hahawa i huduni k gam hu cheh hihaꞌini ch ed.
29 Bat wa masma an oꞌoha g kekelibad Jiosh haꞌichu i tashogiddam mat hab wo e juh. Kut idam am wabsh wohokamch g haꞌichu ha‑ahga.
30 T wabshaba g Jiosh ab uhpam i wuhshad muhkig amjed.
31 Tsh amjed muꞌikko am si i e chehgi ha wui hegam mash an wehmajkahim ch ab wehmaj i hihi Galilee t amjed ab Jerusalem wui. K idam am si s‑mahch ch ahgahim am t‑shahgid.
“Pegih, ab g wo ni‑kaiham, ni‑wehm oꞌodham mam ab d ep Abrahambad amjedkam ch ahpim mam ia ha wehm ab ihm g Jiosh. Ahpim at em‑wui gei ihda haꞌichu ahga mamt has masma wo e‑doꞌibia nat pi gam hu wabsh s‑ohhod g t‑hajuni ab Jerusalem t ab.
32-33 Kutt hemuch ia dada k ia uꞌapa ihda s‑kehg haꞌichu ahga em‑wui. Heki ash hu am ha ahgid g Jiosh g t‑shohshonbad matsh wo uhpam i wuhshad g si e‑Kehsha ab muhkig amjed. Kutsh wa woho hab e juh. Kutki id heki hu oꞌoha g Davidbad mat eda koi hab e juh. K an wa oꞌohanas gohkkam neꞌi ed heg eda Jiosh heki hu oꞌohana mash hab kaij g Jiosh ab e‑alidag wui:
Ahpi ap d si ni‑alidag.
Hemuch ant am i m‑maskogi. Psalm 2:7
34 K hab ep masma an oꞌohanas mash hab kaij g Jiosh ab e‑alidag wui:
B ant wo m‑mah hegai si hekia s‑kehg hoꞌigeꞌidadag mani wa am si ahgid g Davidbad. Isaiah 55:3
Neh, bash kaij g Jiosh ch heg hab ahg mat ab i wuhshad g Jesus muhkig amjed mat pi hekid wo shaꞌi padt g chuhkugaj.
35 K gan hu baꞌich an ep oꞌohadag ch hab chuꞌig:
Pi at wo shaꞌi hiwigi g si e‑Kehsha mas wo padt g chuhkugaj. Psalm 16:10
36 “Neh, pi oki hejel hab e ahg g Davidbad natsh pi muh am hab juniok hegai mat haschu g Jiosh ab mohtoꞌi k am ha wehm e cheh g e‑shohshonbad. Tsh hi padt g chuhkugaj.
37 Heg o hab ahg Jesus mat pi shaꞌi padt g chuhkugaj nat pi g Jiosh ab i wuhshad muhkig amjed.
38 Pegih, ni‑wepnag, id amt hekaj wo chum s‑mahchk mat g Jiosh gam hu hab wo i juh g pi ap em‑chuꞌijig
39 mamt hedai ab wo i s‑wohoch g Jesus. Heg at am wo i em‑apꞌech mamt pi wo ha chuꞌijigk am Jiosh nena ed. T pi haꞌichu ep wo e nako mas hab masma am wo i em‑apꞌech, nih g chehanig.
40-41 “T an ep oꞌoha g kelibad Jiosh haꞌichu i tashogiddam mo hab kaij g Jiosh:
S‑e g wo nenꞌoidk k am wo si i oidahi ahpim mam wabsh has ni‑ahg.
Am ant haꞌichu hab wo juh em‑shahgid.
Kut am hema wo si s‑ap i em‑tashogi mani d ahni ch hab wua.
Mt eda pi ab hu wo ha wohoch.
Nt heg hekaj gam hu hab wo i em‑juh ab ni‑amjed k pi dahm ep wo pihk ni‑el em‑hekaj. Habakkuk 1:5
Neh, bash kaij g Jiosh.
“Pegih, si g wo s‑e nenꞌoidk k ab wo s‑wohog el g Jiosh. T hab pi ab hu wo i em‑ai g s‑koꞌok em‑namkidadag.”
42 Tsh ab i kuhgit g ha‑namki. Tsh wo chum hihi g Paul ch Barnabas. Sh wabshaba g hemajkam ab si ha waid mat am ep wo dada baꞌich mihshmda tash k am baꞌich ep wo i ha ahgi idam haꞌichu.
43 Tsh am i himto g hemajkam. Tsh haꞌi ab i ha oi hegam Paul. Kutsh ab si i ha gewkemhu ab haꞌichu ep ha ahgidk mat am wo wa e nakogad Jiosh hemajimatalig ed. Sh haꞌi idam d Tutuligo hemajkam ch haꞌi d gawul mahs hemajkam ch am ha wehm e mihshmad.
44 Sh am baꞌich d i mihshmda tash. Tsh chum alo wehsijj ab e hemapai g hemajkam matsh wo kah g Jiosh haꞌichu ahga.
45 Tsh hegam Tutuligo mash pi ab hu ha wohochud si s‑ha hehgam k hab kaij mo d wabsh s‑chu iattomkam g Paul.
46 Tsh wabshaba idam Paul am haha wabsh si ha ahgi, “Ni‑hajuni, bo chum mahs matt wehpeg ab wo em‑ahgi g Jiosh haꞌichu ahga ab amjed g si Kehshaj. Kumtki wabshaba s‑ohhod k hab sha e wua mam pi tatchua g pi ha huhugedam doakag am Jiosh kihdag ed. Kutt heg hekaj wo em‑dagito k hegam ha wui wo i t‑nohnogi gawul mahs hemajkam.
47 Bo wa masma am t‑chehanig Jiosh. An o oꞌohanas mash hab kaij:
Am ant i em‑gawulkai mamt am wo i ha tashogi g haꞌichu ni‑ahga g nahnko mahs hemajkam wehsko jewed dahm.
T ab em‑amjed wo s‑mai mat has masma wo e doꞌibia. Isaiah 49:6
Neh, bash kaij g Jiosh.”
48 Tsh am i kah idam gawul mahs hemajkam k si s‑hehgigam ab ihm g Jiosh nash pi ab ha makiog g e‑doꞌibiadag ahga. Kutsh hegam ab i s‑wohoch mat hedai g Jiosh i ha apꞌech mat wo e doꞌibia.
49 Kutsh wehsko i e ahgahi g haꞌichu ha‑ahga ab amjed g Jesus heg eda jewed.
50 Tsh wabshaba g Tutuligo am si i ha chuꞌamu hegam uꞌuwi mash am ha wehm e mihshmad ch hegam mash d hahaꞌichu heg eda kihhim. Kutsh idam am si i ha shoꞌigch g Paul ch Barnabas k gam hu si ha huhuꞌi ab amjed g e‑jewedga.
51 Tsh idam gam hu hahawa si i shahmud g jewed ab e‑tahtad ab am ha chehgidch mat wo ha dagito nat pi pi ap ab hu i ha nei. Tsh gam hu hahawa hihi Iconium kihhim wui.
52 Kush hegam matsh ab i s‑wohoch ab Antiok t ab si s‑hehgig ch ab si uꞌukch g gewkdag ab amjed g Hekia S‑apꞌekam Gewkdag.