☰ HEBREWS 11
11
Mo has chuꞌig g t‑wohochudadag
1 T‑wohochudadag o hab d ahga mach s‑mahch mo woho hegai mach am wui t‑gewpkadch, chum achs hems pi t‑wuhpuikaj neid. 2 Muꞌijj g t‑shohshonbad ash ab s‑wohochud g Jiosh haꞌichu ahga. Sh hekaj ab s‑ha hohhoꞌid g Jiosh.
3 Ab ach s‑wohochud g Jiosh haꞌichu ahga ch hekaj s‑amichud mat wehs haꞌichu nahto pi haꞌichu amjed am wabsh neokk.
4 Hema ash wa hab chehgig Abel ch ash ab s‑wohochud g Jiosh ch hekaj ab s‑wohog elid k ab wui iagchul g haꞌichu doakam e‑muꞌa. Tsh wabshaba g wehngajbad Cain pi hab masma hab e juh. Tsh g Jiosh ab si s‑hohhoꞌi g Abelbad natsh pi hab juh g tatchuij. Id ach an neꞌokchulid Jiosh oꞌohana ed. K id heg wa wepo mo g Abelbad am wabsh kia neok ch am haꞌichu t‑ahgid.
5 Hema ash wa hab chehgig Enoc ch ash ab s‑wohochud g Jiosh. Sh g Jiosh s‑hohhoꞌid ch gam hu i bei mash wabsh kia doa. Kutsh pi hedai edagi. 6 Hegam at wo waꞌi s‑ha hohhoꞌidad g Jiosh mat hedai ab wo s‑wohochudad. Hegai mat ab wo i miabi g Jiosh at hemho wa wo s‑wohoch mo an hema d Jiosh ch am i e tashogid ha wui hegam mo ab s‑mahchimk.
7 Noahbad atsh ab i s‑wohoch g Jiosh k ab si has elid. Jiosh ash wa am ahgid mat hema hab wo juh g si geꞌe wahlko natsh pi wo ha wiꞌin. Tsh idam Noahbad woho hab e juh k heg eda e doꞌibia g e‑wehm kihkam wehm ch e‑aꞌaliga ha wehm. Bat masma am mahsko wua g Jiosh g hemajkam ha‑chuꞌijig natsh pi hegam pi ab hu wohoch. Kush hab kaij g Jiosh mash idam Noahbad d s‑apꞌekam nash pi ab s‑wohochud.
8 Abrahambad ash ab s‑wohochud g Jiosh ch ab s‑wohog el. Jiosh ash hab ahg matsh am hu hebai wo mah g mehk jewed. Kutsh ab wui wo hih. Tsh g Abrahambad woho dagito g e‑kihdag k gam hu hih wa chum pi mahchch mas hebai wo hih. 9 Jiosh atsh pi oi ha mah hegai jewed. Kush am wabsh i e chiwiapadad ch am kihkahim ikus kih ch ed am ha wehm g e‑amjedkam. Kush g Jiosh am hab waꞌap ha ahgid idam Abrahambad amjedkam matsh am hu hebai wo ha mah hegai jewed. 10 Abrahambad ash ab wui e gewkad hegai kihhim mo d Jiosh nahtoi ch pi hekid wo i gei.
11 Abrahambad ch Sarabad ash wa ab s‑wohochud g Jiosh mash wa hab ha ahgid matsh wo hema mahsid g ali matsh eda heki hu kekelit. Sh g Sarabad pi ha mamdat. 12 Neh, sh wa g Abrahambad d si keli mat pi ep wo chum e nako mas wo alidt. T eda ab amjed i hih muꞌi hemajkam mo pi ta kuintama hab masma mo g huhuꞌu ch hab masma mo g oꞌod an ge kahchki babsho.
13 Wehsijj idam mach am ha chehcheg at koꞌo k huhug koi wehs uꞌuk hegai mash haschu g Jiosh ab ha makiog. Heg o wa wepo wo mehkjed neid ch ab si tatchua hegai haꞌichu no pi s‑mahch mo d wabsh chihpiadam id dahm jewed. 14 Hegam mo hedai s‑mahch ihda o am tasho e gahgid g jewed mat d wo si ha‑enigak. 15 Pi o am hu uhpam e chegito heg wui jewed mat am dagito. Jiosh at wo ha hiwigi mat wo uhpam hihi matp hab wo e el. 16 K wabshaba am e gewpkadch heg wui jewed mo baꞌich i s‑apꞌe, pej hegai dahm kahchim kihdag. Jiosh o s‑hohhoꞌid mo hab aꞌaga mo d ha‑Jioshga nat pi am heki hu nahto g kihhim ha wehhejed.
17 Abrahambad alidag ash hab chehgig Isaac. Tsh wa g Jiosh am wabsh aꞌappe g Abrahambad mash eda d doakam mat wo mua g e‑alidag k hekaj ab wui wo iagchul. Tsh g Abrahambad ab i s‑wohochud k hab chum juh, chum as g Isaacbad d si hejel alidag ch d Jiosh mahkigdag. 18 Jiosh ash wa hab ahgid mat ab Isaacbad amjed wo i hihi g amjedkamaj. 19 Abrahambad o ab s‑wohochud mat g Jiosh wo e nako mat ab uhpam wo i wuhshad g Isaacbad muhkig amjed. K heg wa wepo mat hab e juh nat pi oi wa doꞌibia.
20 Isaacbad ash wa ab s‑wohochud g Jiosh ch hekaj am ha ahgid g e‑aꞌalidag Jacob ch Esau matsh has masma ab wo s‑ha hoꞌigeꞌel g Jiosh.
21 Jacobbad ash wa ab s‑wohochud ch ab ihm g Jiosh ch am ha ahgid hegam e‑wopsmad mash d Joseph aꞌalidag matsh has masma ab wo s‑ha hoꞌigeꞌel g Jiosh. Id at hab juh mo eda muhkhim an wabsh e‑cheowikud an e gewishch.
22 Josephbad ash wa ab s‑wohochud g Jiosh ch hekaj hab kaij am i muhkhimk mat wo uhpam hihi g Tutuligo ab amjed g Egypt jewed ch am ep si shel ha ahgid mat has wo juh g ohꞌoj.
23 Mosesbad jehj ash wa ab s‑wohochud g Jiosh. Kownal ash chum ha chehani g Tutuligo mat wo ha kokda g chechoj e‑aꞌaliga. Tsh eda g Mosesbad jehj pi shaꞌi ehbeni g kownal chehanig k eꞌesto g Mosesbad waik mashad amjed mat mahsi neidch mo s‑ap ulini d ali.
24 Kownal alidag atsh an hahawa bei g Mosesbad k hab aꞌaga mo d madaj. K wabshaba g Mosesbad ab s‑wohochud g Jiosh ch pi hohhoꞌid am i geꞌehogatk mat hab wo e aꞌagad mo d madaj hegai mo pi d Jiosh hemajkamga. 25 Baꞌich i mat ab wo nako g shoꞌigdag ha wehm g Jiosh hemajkamga ki hegai mat am heꞌes wo si s‑hehgigk ha wehm hegam mo pi ab hu wohochud g Jiosh. 26 Am ash aꞌamichud mat wo e shoꞌigch wehhejed g Jiosh si Kehsha. K wabshaba id baꞌich d i si haꞌichu am wehhejed ki g Egypt jewed s‑kaisdag no pi am wa s‑chegitog mash haschu si s‑kehg haꞌichu ab ha makiog g Jiosh g e‑hemajkamga. 27 Kutsh heg hekaj pi shaꞌi ehbeni g kownal k am dagito g Egypt jewed. Heg o wa wepo mo ab neid g pi ta neidagam Jiosh nash pi ab nakog g shoꞌigdag am wehhejed.
28 Jiosh ash am ahgid g Mosesbad mat wo ha cheha g hemajkam mat wo ha kokda g kahwal mahmad k ab wui wo iagchul g ha‑ehꞌed ab e‑pupualit ab. Tsh hab pi wo ha kokda g anghil g wehpeg cheoj ha‑aꞌaliga. Tsh g Mosesbad ab i s‑wohochud k hab masma ha cheha g hemajkam.
29 Kush g Jiosh hab ha ahg g Tutuligo mat am gahi wo i huhud S‑wegi Kahchki oidch. Kutsh ab i s‑wohochud k hab e juh. Kutsh am i tahp g shuhdagi. Tsh am wabsh s‑gaki jewed oidk hihi. Tsh g Egypt t am shondal am chum ha oidk heb e juh. Tsh ha maꞌish g shuhdagi k wehs ha kokda.
30 Neh, an ash wa uhgk hohodai kolhaidag g Jerico kihhim. Kutsh wa g Jiosh hab ha ah g t‑shohshon matsh an wo e himtchul. Tsh ab i s‑wohochud k hab e juh. Tsh hekaj i shul g Jiosh hegai kolhai. 31 Tsh am i wahp k wehs ha kokda hegam mo pi ab hu wohog elid g Jiosh. Tsh wabshaba hema ab s‑wohoch g Jiosh, chum as d chehpaꞌawi, k wa ha doꞌibia hegam Tutuligo mash wa am s‑aꞌagi chechga g jewed. Kumtsh heg hekaj pi mua mamt hekid ha gewito.
32 Pi ant wo ni‑nako manis wehs in wo oꞌoha ab ha amjed hegam kekelibad mash hab chechgig Gideon ch Barak ch Samson ch Jephda ch David ch Samuel ch muꞌi ehp g Jiosh haꞌichu i tashogiddam. 33 Jiosh ash wa hab ha ahg matsh haschu hab wo juh. Kutsh ab i s‑wohochud k hab e juh. Haꞌijj atsh g nahnko mahs jejewed ha gewito k hab wua g s‑apꞌekam. Tsh g Jiosh ab ha mah mash haschu ha ahgid mat ab wo ha mah. Haꞌi atsh wa e doꞌibia ab ha amjed g maipid 34 ch ab amjed mam chum s‑ha kokdaimk g meikaj ch is‑pahyokaj. Do wabsh oꞌodham ch eda ab bei g geꞌe gewkdag k am s‑chechojim ha gewito g e‑obga ab aꞌai jejewed amjed. 35 Jiosh atsh wa ab uhpam i ha chegitoich g ha‑koꞌidag haꞌi uꞌuwi mo ab s‑wohochud.
Haꞌi atsh wa wabsh s‑ap e taht k e koꞌij pi dagitoimk g e‑wohochudadag no pi s‑mahch mat g Jiosh baꞌich i s‑kehg doakag ab wo ha mah. 36 Haꞌijj amsh wa s‑koꞌokam has ha ahg ch ha gewittan k haꞌi ha wupulsh k ged hu si ha kuh. 37 Haꞌijj amtsh wa ha maꞌichshulig k haꞌijj an ha eda si ha hikuch k haꞌijj g is‑pahyokaj am ha kokda. Muꞌijj ash shaꞌi si shoꞌig ch wabsh g haꞌichu doakam eꞌelidagkaj e eꞌenigadadch. Msh wa muꞌi ha shoꞌigchud ch pi ab hu ap ha neid. 38 Kumsh wa ha shoꞌigchud no pi d si s‑ap hemajkam. An o wabsh oiopo tohono jewed oidk ch kaꞌakwulk oidk ch am wabsh kih wahpag ch ed ch chehcho ch ed.
39 Id o wehs d ha‑apꞌedag am Jiosh wehhejed no pi ab s‑wohochud. T eda chum koi ab hu nei mo wa haschu ha ahgid g Jiosh mat hab wo ha juni. 40 Jiosh at hab masma apꞌech mat ab t‑wehm wo bei g baꞌich i s‑kehg apꞌedag.
☰