☰ JOHN 1
Id ash d John Oꞌohana ab Amjed g Jiosh Alidag
1
Mash g Jiosh alidag hab e aꞌaga Jiosh Neꞌoki
1 Gd hu i si wehpeg ash d doakam hegai mach hab aꞌaga Jiosh Neꞌoki. Id ash d Jiosh ch am wehmaj g e-ohg Jiosh. 2 Jiosh ash am e wehm dahshch mash eda pi koi haꞌichu shaꞌi nahtois 3 ch am i kei matsh wehs haꞌichu wo nahto. Kutsh wa woho wehs haꞌichu nahto 4 k an uꞌukch g gewkdag ch wehs ha mah g haꞌichu doakam g doakag. K ihda doakag am tonlidch g hemajkam chegitoidag. 5 K wabshaba g hemajkam pi e nakog hejel mas wo s-amich mo haschu chum ha tashogid.
6 Am ad hema i kei g Jiosh g oꞌodham mat wo t-mihshmad. D id hab chehgig John. 7 D g mihshmdaj hab chuꞌig matsh in wo i wuhsh jewed dahm hegai mo ab t-mahkch g t-doakag. K hab d elidaj g Jiosh mat wehs hemajkam wo kah ihda haꞌichu ahga k ab wo hiwgad hegai mat in i wuhsh. 8 Pi ad hejel hab e ahg g John ch wabsh heg an ahgachug mad in i wuhsh. 9 Id o d wohokam tonlig ch am tonlidch g wehs hemajkam ha-chegitoidag.
10 Pegih, d ia haꞌichug g Jiosh Neꞌoki jewed e-nahtoi dahm. D wabshaba hemajkam nahtoij pi amichud. 11 Ia adki mahsi k d t-wehm oꞌodham. D eda muꞌijj g Tutuligo pi amichud ch pi ab hu hiwig. 12 Kuchd wabshaba haꞌijj ab i s-wohoch mo d Jiosh si Kehsha k ab hiwig. Kud heg hekaj ab t-mah g apꞌedag matt d haha wo aꞌaligajk g Jiosh. 13 Pi ach heg wabsh hekaj d Jiosh aꞌaliga matt in mamsi o heg wabsh hekaj mo g t-jehj ab s-wohochud g Jiosh o heg wabsh hekaj mach hab t-elid machs d aꞌaligaj. Jiosh at hab t-juh mach d hahawa aꞌaligaj.
14-16 Hegai mo d Jiosh Neꞌoki ad e wepogi g hemajkam k woho t-wepo chuꞌig ch ia t-shahgid d doakam. D g John an aꞌaga k si s-kaidam hab kaij, “Id o d hegai mani hab ahg ch am em-ahgid mat ab hema wabsh ni-oidk wo i e maskogid k eda woho d si s-has haꞌichu nash pi chum hekid an haꞌichug.” Neh, bo kaij g John. Kuchd heg amjed s-mahch g Jesus Christ ch am hahawa s-mai moki d Jiosh alidag ch si s-hemajima ch heg waꞌi ahg wohokam ch woho ab si s-t-hoꞌigeꞌid.
17 Dash Mosesbad matsh wa an oꞌoha g Jiosh chehanig am ha wehhejed g hemajkam. K wabshaba d Jesus Christ mad ia uꞌapa g Jiosh hemajimatalig ch wohokam. 18 Pi oki hekid hedai shaꞌi e-wuhpuikaj neid g Jiosh. K wabshaba g alidaj am wehmaj d hemako ch ab t-wui mahsko wua.
Mash haschu i ahgachug g John am ha pahl wapkonch
An g neid g Matthew 3:1-12; Mark 1:1-8; Luke 3:1-18
19 Am ad t‑mihshmad ihda John tohono jewed ch ed. K eda am Jerusalem kihhim t am dadha g t‑geꞌegedga ahchim Tutuligo. Tsh am i ha ai g haꞌichu kaida ab amjed g John. Kutsh am haꞌi ha cheha g papal ch hegam mo d papal ha wehm chikpandam matsh wo s‑mai mas hedai wud hegai John.
Tsh idam am hihim k am dada k ab s‑mahchim mas hedai chum e elid ab wui hab kaijch, “Nap hab chum e elid map d Jiosh si Kehsha?”
20 D ab wabsh si ha wehm neok g John ch am si tasho ha ahgid mo pi d hegai.
21 D ab ep kakke, “Aha nap d hegai Elijabad ch ia uhpam jiwia?”
D g John hab kaij, “Piaꞌa, pi ani d hegai.”
D ab ep kakke, “Nap d hegai Jiosh haꞌichu i tashogiddam matsh in wo i wuhsh?”
D hab ep kaij, “Piaꞌa, pi ani d hegai.”
22 D hab hahawa kaij, “Pegih, k am wo t‑ahgi map hedai wud. Hemho wa att am wo ha ahgi g t‑geꞌegedga map has e aꞌaga.”
23 D g John hab hahawa kaij, “Ahni ani wud mo hab ni‑ahg ch an oꞌohanas:
Hema atsh gam hu jeg ed wo ha mihshmad g hemajkam hab kaijch, ‘Neh, in atsh wo i wuhsh jewed dahm hegai mo d ge kownal wehs haꞌichu dahm.
Kumt heg wehhejed wo i e nako am dagitok g pi ap e‑chuꞌijig.’ Isaiah 40:3
Neh, id o d neꞌokij hegai kelibad Jiosh haꞌichu i tashogiddam mash hab chehgig Isaiah,” bad kaij g John.
24 Idam mad ab haꞌichu kakke g John o d haꞌi hegam mo hab e aꞌaga Palasi. K hegam Palasi chum si nuhkud g t‑himdag. 25 D heg hekaj hab ep kaij idam ab John wui, “Pegih, p haschu ahgch ha pahl wapkon ch eda wa chum pi d Jiosh si Kehsha ch pi d Elijabad ch pi d hegai Jiosh haꞌichu i tashogiddam matsh in wo i wuhsh?”
26 D hab hahawa kaij ab ha wui, “Ha ani pahl wapkon mat wo i e nako. Hemu at in wo i wuhsh hegai mo hig woho d si s‑has haꞌichu, pej hemu ia haꞌichug em‑shahgid. Kum pi amichud. 27 Pi g hab wo ni‑elidad manis ahni d si haꞌichu. Ihda mat am ni‑oidk wo i wuhsh at wehs ha baꞌich d wo i si haꞌichuk.”
28 Neh, wehs ihda ad hab e juh gan hu aigojed g Jordan akimel mo am d wahlko kih.
Mash g John am wohokamchud g Jesus
29 Am baꞌich d i tash, d am jiwia g Jesus John wui.
D heg an aꞌaga ch hab kaij, “Neh, id o d hegai mat wo e wepogi g kahwal mad k ab wo e iagchul Jiosh wui mat gam hu hab wo i juh g pi ap t‑chuꞌijig. 30 Id ani hab ahg mani wa hab em‑ahgid mat ab wabsh ni‑oidk wo i wuhshani k wabshaba wehs ha baꞌich d i si haꞌichu no pi chum hekid an haꞌichug. 31 Pi ani hab wa shaꞌi mahch mas hedai d wo Jiosh si Kehshak. K wabshaba g Jiosh am ni‑chehani mant wo ha pahl wapko g hemajkam. T hab wa masma am wo tashogi g si e‑Kehsha am t‑wui ahchim Tutuligo.” Neh, bad kaij g John.
32-33 D am hebai i cheka, d si s‑mahch ch ahg g John hab kaijch, “Bo kaij g Jiosh ab ni‑wui, ‘Ab at wo i hud g Hekia S‑apꞌekam Gewkdag k ab wo e ul si ni‑Kehsha ab. Kupt hab wo s‑mahchk mo d ihda mat wo ha mah g hemajkam g Hekia S‑apꞌekam Gewkdag.’ Neh, bo kaij g Jiosh ab ni‑wui. Kut wa woho si s‑hemajim ab i hud g Hekia S‑apꞌekam Gewkdag k ab e ul id ab Jesus hab masma mat g hohhi an hasko wo i dahiwua ab i hudunik. 34 Kunt wa neid k heg hekaj si s‑mahch mo ihda Jesus d Jiosh alidag.”
Hegam mash wa si wehpeg am i oi g Jesus
35 Am baꞌich d i tash, d am ep haꞌichug g John. Kuchd gohkajj an wehmaj ahchim mach ab si wecho t‑mashcham. 36 D ab him g Jesus. Kud g John neidok hab kaij, “Neh, m ia him hegai matsh kahwal mad wepo wo e iagchul am t‑wehhejed.”
37 Kuchd am i kah ahchim gohk k gam hu i oi g Jesus. 38 D ab haꞌab i e wua k ab i t‑neid k hab kaij, “Shahchu am tatchua?”
Ch hab kaij, “Bahp dak ch amjed ha mashcham?”
39 D hab kaij, “Oi g wo ni‑oid k wo nei mani hebai da.”
Kuchd gam hu oid k am wehmajkahim im hu i juhk amjed ch ga hu si ai g s‑chuhugam.
40 Hegai mad ni‑wehm kah g John ch am i oi g Jesus o hab chehgig Andrew. K g wehngaj ihda hab chehgig Simon. 41 K g Andrew d wehpegkam mat am i gahghi g e‑wehnag k hekid am i chehg k hab ahgid, “Cheh att hegai moki d Christ.” (Id o hab d ahga ‘Jiosh si Kehsha.’) 42 D g Andrew am hahawa uꞌapa Jesus wui.
T ab si shel i nei g Jesus k hab kaij, “S-mahch ahni map d Simon ch d alidaj hegai mo hab chehgig Jonas. Iꞌajed apt hab wo chehgigk Peter.” (Id o hab d ahga ‘Hodai.’)
Jesus atsh ab i ha gawulkai g Philip ch Nathanael
43-44 Am baꞌich d i tash, d hab i e ah g Jesus mat gam hu wo hih Galilee chekshani wui. K eda an oimmed hegai mo hab chehgig Philip ch am d kihkam Bethsaida t am. (Ahchim g Andrew ch Peter ha wehm ach am hab waꞌap d kihkam Bethsaida t am.) Jesus ad am cheh g Philip k hab kaij ab wui, “Ab g i ni-oid k wo ni-wehmajk.”
45 D g Philip gam hu i gahghi g Nathanael k am i chehgiok hab kaij, “Cheh att hegai matki wa ab amjed an oꞌoha hegam Mosesbad ch kekelibad Jiosh haꞌichu i tashogiddam. Heg oki wud mash d Jesus ch heg d alidag mash d Josephbad ch ab Nazareth kihhim t ab d kihkam.”
46 D ab wabsh ge i nen k hab kaij, “Ih, nat hig woho haꞌichu s-apꞌekam wo i wuhsh ab Nazareth t amjed?”
D g Philip hab kaij, “Pegih, k ab wo i him k hejel e-wuhpuikaj wo nei.”
47 D ga hu haha wabsh i hihim.
D g Jesus neid k hab kaij, “Neh, id o d si oꞌodham m ab him.”
48 D g Nathanael hab kaij, “P has masma s-ni-mahch?”
D hab kaij g Jesus, “M ani wabsh tonlid ch m-neid map am da suhna wecho mat eda koi m-cheh g Philip.”
49 D hab kaij g Nathanael, “Ih, neh, kupki d Jiosh alidag ch d t-kownalig ahchim Tutuligo hemajkam.”
50 D hab kaij g Jesus, “Ab ap ni-hiwig nani pi am wabsh tonlid ch m-neid. Nt wo si shel m-ahgi mapt baꞌich i s-ta neidamam haꞌichu wo nei imhab i baꞌich. 51 Dani Jiosh si Kehsha ch am wo kuhpiꞌo g dahm kahchim am em-wehhejed. Kumt wo nei mat am wui wo i chehchsh g anghil ab ni-amjed k ab ni-wui ep wo i huhud.”
☰