13
Matsh am wo i wuwha g gohk s-ta ehbidamakam oꞌodham
1 Ntki haha wabsh nei hegai s-ta Ehbidamakam oꞌodham mo e wepogidch g mischini haꞌichu doakam. Id at ab i wuhsh ge shuhdagi t amjed k ge wehst-mahm aꞌag ch wewaꞌak mohmi. K an aꞌagaj an gigiko an shahshꞌai. K an mohmij an oꞌohadag g si pi apꞌekam chechgig.
2 Ihda s-ta Ehbidamakam oki hab sha mahs mo g ohshod. K g tahtdaj hab sha mams mo g judumi tahtad. K g chinij hab mahs mo g mawid chini. T g Nehbig Hujud ab mah g gewkdag ch e-kownaltalig wehs jewed dahm.
3 Hema g moꞌoj o hab sha mahs matki wa e muhkid k wabshaba ep doa k e chegito. Kut ab si has i el g hemajkam wehsko k am i oi ihda s-ta Ehbidamakam. T wehs hemajkam ab i ihm g Nehbig Hujud nat pi ab mah g e-gewkdag hegai s-ta Ehbidamakam
4 k ab ep ihm g s-ta Ehbidamakam ch hab kaij, “Pi oki hedai hab shaꞌi masma mo ihda. Pi atki hedai wo shaꞌi e nako mat wo cheggia.”
5 Kum wabsh hiwgid ihda mat wo si pi kehg neokad. Kumtki ab ep mah g gewkdag am oidam g giꞌikko wehst-mahm gamai gohk (42) mashad.
6 Kut ihda am ha hekaj pad neo ab wui g Jiosh k pi ap hekaj g chehgigaj ch nahnko ahg g Jiosh kihdag ch hegam mo an kih kihdaj ed.
7 Ab amtki hiwigi mat wo ha cheggia g Jiosh hemajkamga k wo ha gewito. Kumt ab ep mah g gewkdag am ha dahm g wehsko dakam hemajkam mo has i kaidam d neneokdam.
8 K wabshaba g Jiosh hemajkamga ha chechgig o an oꞌohadag e doꞌibiakam ha-oꞌohana ed. Ihda oꞌohana o d enigaj hegai mat kahwalkaj e muhkid am ha wehhejed. Idam e doꞌibiakam at pi ab hu wo ihm hegai s-ta Ehbidamakam. Hegam waꞌi mo pi an hu oꞌohadag heg eda oꞌohana at ab wo ihmad hegai s-ta Ehbidamakam.
9 Am g wo s-ap i aꞌamichud ihda.
10 Hegam mo hedai d ha wuikam mat wo e kuhpach at hemho wa wo e kuhpach. Hegam mo d ha wuikam mat wo e koꞌij at hemho wa wo e koꞌij. K eda d ha-wuikam g Jiosh hemajkamga mat wo s-chu nakogad ch wo s-gewkk am e-wohochudadag ed.
11 Ni hahawa ep neid matki ab hema ep i wuhsh ged hu jewed wecho amjed. Id o hab waꞌap mahs mo g s-ta ehbidamakam haꞌichu doakam ch ge gohk aꞌag hab sha masma mo g kahwal aꞌag ch hab masma neok mo g nehbig hujud.
12 Hegai s-ta Ehbidamakam mat wehpeg i wuhsh oki ab mahkch g gewkdag hegai mat am hahawa i wuhsh. K heg ab wehs ha chehani g hemajkam jewed dahm mat ab wo si has elidad hegai wehpeg s-ta Ehbidamakam matki uhpam e chegito.
13-14 K id hiwgid mat am hab juh g si geꞌe s-hasig haꞌichu. K wehs hemajkam neid mat ab i huduni g mehi dahm kahchim t amjed in jewed dahm. Bo wa masma wehs ha iattogid g hemajkam id dahm jewed ch d s-chu Iattomakam Haꞌichu i Tashogiddam ch ab ha chehani mat am haꞌichu wo nahto mat heg wo wepogidask s-ta Ehbidamakam mat wehpeg i wuhshani k atki e muhkid g is-pahyokaj k uhpam e chegito.
15 Hegai s-chu Iattomakam Haꞌichu i Tashogiddam atki am ihbheiwua id eda mat am e nahto. Tki heg hekaj e nako ihda haꞌichu ha-nahtoi mat wo neok k ep wo ha kokda wehs hegam mat pi ab hu wo i shul wui.
16 Tki ihda s-chu Iattomakam Haꞌichu i Tashogiddam i ha huilisamad wehs hemajkam matp hedai d wo i k mat an wo e chepos heg hekaj wehpeg s-ta Ehbidamakam cheposig. Kumtki wa woho an ge ha chechpos an s-apkojed ha-nohnhoi an ch ab ha-koka ab.
17 Pi atki hedai wo e nako mas haꞌichu wo ha nolawt o haꞌichu wo gagda, heg hi wa mat ab wo cheposigk g s-ta Ehbidamakam chehgigkaj o heg hekaj nuhmilo mo d chehgigaj nuhmilo.
18 Id oki d si s-juhk haꞌichu. Kut am wo i mamche matp hedai wo s-chu amichudad mo has d ahga hegai s-ta Ehbidamakam nuhmilo no pi hegai nuhmilo d chehgigaj hema oꞌodham. K ihda nuhmilo d chuhdp siant chuhdpo gamai chuhdp (666).