16
Hohas-hahaꞌa mo shuhdags g Jiosh aꞌappemadag
1 Kuni wa hema ep kah. K id am s-kaidam neok ab amjed g cheopi ab ha wui idam wewaꞌak anghil ch hab kaij, “Am g wo hihim k wo iawua g s-koꞌok namkidadag an jewed dahm ab ha amjed hegam hohas-hahaꞌa.”
2 Tki g wehpegkam anghil am him k am iawua an dahm g jewed hegai mo wasibch e-hoas-haꞌa ch ed. Kutki g si s-koꞌok ch s-ta ehbidama hihiwdag ha ai hegam mo ab ha ab hab chuꞌig g s-ta Ehbidamakam cheposig ch idam mat i shul ab wui g wepogidaj.
3 Tki amjed g gokkokam anghil am hahawa epai iawua hegai mo wasibch an ge shuhdagi dahm. Tki g shuhdagi hab masma e ehꞌedch mo g muhki ehꞌed. Tki wehs haꞌichu koi am ge shuhdagi ch ed.
4 Tki amjed g waikkokam anghil am epai iawua hegai mo wasibch an aꞌakimel ch ed ch shohshonkam shuhdagi ch ed. Kutki e ehꞌedch g shuhdagi.
5 Kuni kah mo hab kaij ab Jiosh wui hegai anghil mo nuhkud g shuhdagi:
“Dap si hekia s-apꞌekam Jiosh ch chum hekid an haꞌichug.
K ab d ha-wuikam idam g s-koꞌok namkidadag.
6 Iawua at g ha-ehꞌed g m-hemajkamga ch hegam haꞌichu i m-tashogiddam.
Kupt heg hekaj g ehꞌed ab ha mah mat wo ih.
Id o wa si e gahgid idam.”
7 Niki amjed hahawa hema ep kah. K id ab neok iagchulidakud amjed ch hab kaij, “T-kownalig Jiosh, dap si s-gewkdagkam. K g m-lodaita si woho ch si s-apꞌe.”
8 Tki amjed g giꞌikkokam anghil am iawua hegai mo wasibch an tash t an. Kut ha mehi g hemajkam g e-s-tonikaj.
9 T eda idam pi gam hu s-ohhod g pi ap e-chegitoi. Jiosh o ha hiwgid mat wo e shoꞌigch. K heg hekaj ab si s-koꞌokam has ahg ch pi ab hu has elid g gewkdaj.
10 Tki amjed g hetaspokam anghil am iawua hegai mo wasibch an dahm g s-ta Ehbidamakam kownal daikud. Kutki g s-chuhugam an gei wehsko s-ta Ehbidamakam kownalitalig ed. Kuki g hemajkam si e kihkꞌishch pi nakogch g s-koꞌok
11 ch si pi kehg neneok ab Jiosh wui heg hekaj e-hihiwdag ch haꞌichu s-koꞌok ch wabshaba pi gam hu s-ohhod g pi ap e-chegitoi.
12 Tki amjed g chuhdpokam anghil am iawua hegai mo wasibch heg eda ge akimel mo hab chehgig Euphrates. Tki gaksh ihda mat ab gahi wo i huhud g kokownal ab siꞌal wecho amjed.
13 Niki hahawa ep neid g waik pi kehg gewpkdag. K idam hab mahs mo g babad ch d jijawul ch ab i wuwha ha-chihchini amjed g Nehbig Hujud ch g s-ta Ehbidamakam ch g s-chu Iattomkam Haꞌichu i Tashogiddam ch hab wua g s-hasig haꞌichu.
14 Idam waik gewpkdag atki am hihi ha wui g kokownal an wehsko jewed dahm mat ab wo i ha hemapai. Kutki idam kokownal wo ha cheggia g Jiosh hemajkamga.
15 (Bo kaij g Jiosh alidag, “Ab g wo ni-kaiham. Bant masma s-aꞌagi wo jiwia mo g s-chu ehskam. T wo s-ap e tahtkkad hegam mat wo s-nenenashanik. T wabshaba hegam mat pi hab wo masmak wo si e elidad hab sha masma mo an wabsh s-dahpkam oiopo.”)
16 Tki amjed hegam waik gewpkdag am ha uꞌapa g kokownal amai mo g Tutuligo hab aꞌaga Armageddon.
17 Tki amjed g wewaꞌakkokam anghil am iawua hegai mo wasibch an hewel ch ed. K ab hema si s-kaidam neok ab amjed hegai kownal daikud mo am da cheopi ch ed hab kaij, “Am at hab e juh.”
18 Tki am si tohonno g wepgi k am si kokp g tataniki. Tki g jewed si s-gewkam uꞌugij. Pi oki hekid hab shaꞌi masma uꞌugij g jewed am i amjed mat an e nahto g oꞌodham. Id oki d si geꞌe jewed uꞌugij mo pi hebai hab shaꞌi masma.
19 Tki hegai geꞌe kihhim waikpa e tahp. Kutki wehsko g kihhim gan hu aꞌai jewed dahm i shul. Jiosh o am wa s-chegitok hegai geꞌe kihhim mo hab e aꞌaga Babylon ch ab mah g s-koꞌok namkidadag. Id at heg wo wepogidask mat ab wo ih g si s-nawmdag nawait nat pi heg hekaj si s-koꞌokam wo e juh.
20 Kutki wehs g siꞌiskod jejewed ch dohdaꞌag wo heb hu hihi.
21 Tki g shaꞌi si geꞌeged chea an wo i shul. Idam oki hehemako am hu i siant s-wehch ch atki ab wo i shul dahm kahchim amjed am ha dahm hegam pi apꞌekam hemajkam. Kutki idam ab wo si pad neneo Jiosh wui.