6
1 Hegam wohochuddam mo d nenehol at ab wo si has ha elidad g e‑aꞌamo. T heg hekaj pi hedai wo has ahgad g Jiosh ch pi wo has ahgad g t‑mashchama.
2 Hegam mo g ha‑aꞌamo hab waꞌap d wohochuddam at baꞌich ab wo i si has ha elidad ch baꞌich i s‑ap wo ha chikpani nat pi g ha‑chikpan d wo ha‑apꞌedagk g ha‑wehm wohochuddam.
Matt pi heg waꞌi lialkaj wo si pihk t‑elidad
Id apt hemho wa wo i ha mashcham k hekaj wo ha mihshmad mani wa m‑ahgid.
3-4 Ho o wabsh chum si e hahaschud ch d wabsh pi haꞌichu mahchim hegam mat hedai i pi heg hekaj wo ha mashcha t‑kownalig Jesus Christ mashchama. Heg o d wohokam t‑mashchama ch am t‑tashogid g s‑apꞌekam himdag. K idam wabsh tatchua mat wo ha neꞌowinad ch wo ha kawnid. Id o wabsh i wahmud g hehgamdag ch bagatalig ch pi ap has ahgadag.
5 Kut hegam wo ha kawhainad matp hedam pi ap haꞌichu chegito ch pi mahch g wohokam ch hab chum elid mat g oꞌodham wo s‑e kaisch id hekaj t‑himdag.
6 K wabshaba id d s‑wohokam s‑t‑kaisdag matt wo himad g s‑apꞌekam ch wo si s‑ap t‑tahtkkad, chum achs pi haꞌichu wo edgidad.
7 Pi ach haꞌichu shaꞌi uꞌad ch in mahsi id dahm jewed ch pi haꞌichu shaꞌi be k wo hih.
8 Heg o am wa chum s‑apꞌe am t‑wehhejed matt ab wo wa al heꞌes haꞌichu koꞌad ch ab s‑ap wo t‑enigadadch.
9 Hegam mo s‑e kaischudamk at heg hekaj hab wo s‑junim g pi apꞌekam. T g ha‑tatchui gam hu hab wo i ha juh ab amjed g Jiosh. Kut haꞌi ep wo ha padch.
10 Nahnko mahs pi apꞌekam o ab shohshon heg amjed mat hema heg waꞌi lialkaj wo si pihk e elidad. Haꞌi at heg hekaj im hu hab i e juh ab amjed g e‑wohochudadag k oi wa muꞌi haꞌichu pi ap tahhadkam ab nako.
Haꞌichu i shelinida am Timothy wui
11 Pi g hab masma hab e juhni mo hegam mani am ha ahg nap pi d Jiosh chikpandamga. Id apt eda am wo i e nako s‑apꞌekam ch e‑wohochudadag ch pihk elidadag ch haꞌichu nakogadag ch hemajimatalig mapt wo wepo chuꞌigk mo g Jiosh.
12 Am g si e gewkad wehhejed g Jiosh k wo s‑wihnam uꞌukchid g e‑wohochudadag mapt hekaj am wo i wah Jiosh kihdag ed hab masma mat g s‑melidkam hab wo e juh mat wo ha gehg.
Id at hekaj ab i m‑bei g Jiosh mapt wa am si s‑kehg ah g e‑wohochudadag am muꞌi hemajkam ha kaichudk.
13-14 Bapt wabsh masma hab wo e juh matsh wa g t‑kownalig Jesus natsh pi heg s‑ap ah g wohokam am tahgio hegai geꞌe kownal mo hab chehgig Pontius Pilate. Kupt wehs am hab wo juh ihda mani m‑ahgid k ab wo ai mat ab ep wo i hih g Jesus. T hab pi hedai ab hu haꞌichu wo m‑chuꞌijigch. Id ani ab si m‑chehani am tahgio g Jesus ch am tahgio g Jiosh. Jiosh o ab ha mahkch g doakag wehs haꞌichu dodakam ch ab ep wo i m‑wehmt mapt hab wo juh g ni‑chehanig.
15 Jesus at ia ep wo i e chehgi heg i tash ed mo kehshch g Jiosh. Jiosh o si s‑hemajima ch wehs haꞌichu nuhkud ch d kownal wehs ha dahm g kokownal.
16 ch pi hekid ha mumkku. Pi o hedai neid ch pi hedai wo e nako mas wo nei. An o haꞌichug hab mahs tonlig ch ed mat pi hedai wo e nako mas ab wo miabi. Pi at hekid wo huhug g gewkdaj. Kutt ab wo si has elidad chum hekid. Neh, bo masma.
17 Ab g i ha chehani hegam mo d s‑kakais mat pi wo si e hahaschudad heg hekaj haꞌichu e‑eniga ch pi ab hu wo hiwgad ch wabshaba ab wo hiwgad g Jiosh. Heg o wud mo s‑baꞌama ab t‑mahk wehs haꞌichu mach haschu i hekaj s‑ap t‑tahtk.
18 Ab g i ha chehani mat am hab wo i junihi g s‑kehg chikpan ha wehhejed hegam mo tatchua g i wehmta k pi wo chu daꞌad ch wo haꞌichu ha hoꞌidad g shoꞌigkam. Id o d woho s‑kaisdag.
19 Bo masma heg wa wepo mo e toꞌidahim g s‑namkig haꞌichu an dahm kahchim ch ed hekaj wo si s‑ap tahtkkad chum hekid.
20 Si g s‑ap nuhkud hegai mamt ab m‑nuhkudach. Pi g am hu ha wehmajk hegam mo wabsh pehegi e neꞌowin heg hekaj mo hab chum elid mo d haꞌichu mahchig. Id at pi wo shaꞌi i t‑wehmajk matt baꞌich i s‑ap wo s‑mai g Jiosh.
21 Haꞌi o hab chum e ahg mo edgid ihda mahchig ch oi wa wabsh heb hu wua g e‑wohochudadag.
Neh, Jiosh at wo wa s‑m‑hoꞌigeꞌel.