12
ዎሳ ኬꬃላ ዳማ ባይꬅ የልዳ
1 የ ዎደ ካት ሄሮድሳ ዎሳ ኬꬂ አሱንꬃፓ ባጉንꬃና ባይኤ አይክዳ።
2 ዋሐንሳ እሸ ያይቆባ ማሻራ ዎꬍዳ።
3 ይና አይሁዱንꬃና ኡፋይስዳኖ ብእ፥ ጉጂ ጴጥሮሳን አይꬅዳ። ይና Ꮉንዳና ቦራ ባአለ ቦንችዘ ቃምተ።
4 ጴጥሮሳ አይኪ አጭዳ። ፋስጋ ቦንችዘ ዎድትፓ ማቂ ዎርዡንꬅ ቲኖ ኣꬆደስ ቆፒ፥ ኦይዲ ኦይዲ ዎታዳሩንꬅ ኤዛ ናጎደ ጋር ታጶ እዝፑን ዎታዳሩንꬅስ አꬂ እንግዳ።
5 ይኒ ግሾ፥ ጴጥሮሳ አች ኬꬃ ናግንታነ። የዝን ዎሳ ኬꬃ አሱንꬅ ኤስ ምንꬂ ጾዝ ዎሳነ።
ኪታንቾ ጴጥሮሳ አች ኬꬃፓ ከስዳ
6 ሄሮድሳ ጴጥሮሳ አሱንꬅ ቲኖ ሺሾዳንፓ ቲኖ ቃማ ጴጥሮሳ ላምእ ዛላራ ላምእ ዎታዳሩንꬃራን ላምእ ሳንꬃላታራ አጭንቲ ኡን ግዳ ገንትዳ። ናግዙንꬅ አች ኬꬃ ፉርꬅተ ኤቂ ናጋነ።
7 ቲርካይዝን ላꬄ ኪታንቾ በንትዳ። አች ኬꬃ ፎኦ ፎእዳ። ኪታንችዘ ጴጥሮሳ ምልቶ ቦቺ ባርክዚ፥ «ኤለ ደንዶ» ያጋይዳ። ኢራ ሳንꬃላታን ኤ ኩሽትፓ ዎꬍዳ።
8 ኪታንችዘ ኤጎ፥ «ነ ማእቶ ማኦ፥ ነ ጫምቶን ኣꬆ» ያጋይዳ። ጴጥሮሳ Ꮉንጋራ ኦችዳ፤ ኪታንችዘ፥ «ነ ላጽንዛ ማእ ታና ካሎ» ያጋይዳ።
9 ጴጥሮሳ አች ኬꬃፓ ኬዚ ኪታንችዛ ካልዳ። ኤስ ቆንጭꬅ በእዘጋራ ይእዳፕ አትን ኪታንችዘ ኦችዘ ባዝታ ቱሮ አዝካያ።
10 ኪታንችዘን ጴጥሮሳን ቲኖን ላምእንꬃ ናግዘ ዛብዛ አꬊ ካታማ ካንግዘ ብርታ ፉርꬅትጎ የልዳ። ፉርꬅታ ኡንትስ ፋ ፋስ ኤሪ ቡጉንትዳ። ኡን ኬዚ ፈቲ ኦገራ Ꮉንጎደራ ኪታንችዘ ቲርካይዝን ጴጥሮሳፓ ሻክንትዳ።
11 ጴጥሮሳስ ዎዝንታ ማቅን፥ «ታና ላꬂ ፋ ኪታንችዛ ዳኪ፥ ሄሮድሳ ኩሽትፓን ናጊ በትደ አይሁደ አሱንꬅ ኡባፓ አሽዳኖ Ꮉተ ቱሮ ኤርዳ» ያጋይዳ።
12 ኤ ይኖ አካክደ ዎደ ጋማ አሱንꬅ ዎላ ሺቂ ጾዝ ዎስዘ በስተ፥ ማርቆሳ ጋዘ ዋሐንሳ እንታ ማይራም ካራ ቅትዳ።
13 እዘ ባለ ኤቂ ጼግዳ። ፈቲ ሮዳ ጋእንትዘ አርታ ፉርꬅቶ ቡጎደስ ይእዳ።
14 ሮዳ ጴጥሮሳ ቃላ ማቅዳኖ ኤርደ ዎደ ኡፋይሳር ኩሚ ፉርꬅቶ ቡግካይዝን ሱብ ዎጺ Ꮉንግ፥ «ጴጥሮሳ ባለ ኤቅዳ» ያጋእ አሱንꬅስ ኦህዳ።
15 አሱንꬅ ኢጎ፥ «ነ ዣሽታነ!» ያጋይዳ። ሮዳ ጴጥሮሳ ማቅዳኖ ጌሽ ኦህዳ። ኡን፥ «የ ኤ ኪታንቾ» ያጋይዳ።
16 የዝን ጴጥሮሳ ባለ ኤቂ ጼጊ አሻንጽን አሱንꬅ ፉርꬅቶ ቡጊ ኤዛ ብእ ጋማ ቆፕዳ።
17 የዝን ኡን ስእ ጋዉደ ጋር ጴጥሮሳ ፋ ኩሽተ ማሊ ላꬂ አች ኬꬃፓ ኤዛ ዋይዝ ኬሰዛኮ ኡንትስ ቆንጭዝ ኦህ፥ «Ꮉኖ ያይቆባስን አማንዘ አሱንꬅስ ኦሆተ» ጋእ እዝፕ ኬዚ መለ በሳ ቅትዳ።
18 ሳአ ዎንትዘ ዎደ «ጴጥሮሳ አባ ቅትዶ?» ጋእ ዎታዳሩንꬅ ዎል ግዳ ጋማ ካጭንትዳ።
19 ሄሮድሳ ጴጥሮሳ ኮይዝን፥ ኤ ꬋብደ ዎደ ናግዙንꬃና ቁሪ፥ ኡንታና ዎꬎደ ጋር ኪትዳ። ይንፓ ሱባ፥ ሄሮድሳ ይሁዳፓ ቂሳርያ ዎꬊ እዘ ኤራꬅ ዎደ በትዳ።
ሄሮድሳ Ꮉይቆ
20 ሄሮድሳ ጢሮሳ አሱንꬃላን ስዶና አሱንꬃላ ጋማ ካጭዳ። ኡን ዎላ ፈትላ ይእ ካት ሞርና ብላስጦሳ ማድንቶደ ጋራ ዎሲ ዬኤ ጋእዚ ፋስ ጭማ ማህ ጊጎደስ ሄሮድሳጎ Ꮉንግዳ። ኡን ጋድታ ካꬃ ካትዘ ጋደፓ ደንጋነ የሻ።
21 ሄሮድሳ ሹምንትደ ዎደ ፋ ካእቱሞ አፉልቶ ማእ፥ አራታላ በቲ አሱንꬅስ ኦህዳ።
22 አሱንꬅ፥ «ይና ጾዘ ቃላ፥ አስ ቃላ ባያ» ያጋእ ዉይስዳ።
23 ሄሮድሳ ጾዝ ቦንችካይዘ ግሾ ኢራ ላꬄ ኪታንቾ ኤዛ ጉድን ዛቅላራ ሙእንት Ꮉይቂዳ።
24 የዝን ጾዘ ቃላ ድጭተራን ዳልግተራ Ꮉንግዳ።
25 ባርናባሳን ሳዉላን ፋ ኦችቶ ፋዲ ማርቆሳ ጋዘ ዋሐንሳ ፋራ ኤኪ የሩሳላመፕ ማቅዳ።