3
የሱሳን ንቆድሞሳን
1 ፋርሳዉንꬅ ባጋፓ ማቅደ፥ አይሁዱንꬅ Ꮉላቃ፥ ንቆድሞሳ ጋእንትዘ ፈቲ አስ የነ።
2 ኤዝን ቃማ የሱሳጎ ይእ፥ «ቦንቾ አስታማርዛዮ፥ ኔኒ ጾዚ ኪትደ አስታማረ ማቅዛኖ ኑኒ ኤራነ። አኮስ ጋይኮ፥ ጾዚ ኤራ የዛንጽኮ Ꮉኖ ኔኒ ኦችዘ ክለ ባዝቶ ኦቾደስ ዳንዳእዘ አስ ባያ» ያጋይዳ።
3 የሱሳ ማህ፥ «ታኒ ኔስ ቱሮ ቱሮ ጋነ፤ ኦደን ላምእንꬃ የልንታንጽኮ ጾዘ ካእቱሞ በአደስ ዳንዳኦስ» ያጋይዳ።
4 ንቆድሞሳ፥ «ጭንጊ አሲ ዋይዝ ላምእንꬃ የልንቶደስ ዳንዳኤ? ፋ እንቲ ሳዛ ማቂ ገሊ ማህ የልንቶደስ ዳንዳአነ?» ያጋይዳ።
5 የሱሳ ማህ፥ «ታኒ ኔስ ቱሮ ቱሮ ጋነ፤ አስ Ꮉꬃፓን ጌሽ አያናፓ የልንታንጽኮ፥ ጾዘ ካእቱሞ ገሎደስ ዳንዳኦስ።
6 አሾ ናአትꬅ አደፓን እንድፓን የልንታነ፤ ጾዘ ናአትꬅ ጌሽ አያናፓ የልንታነ።
7 ታኒ፥ ‹ይን ላምእንꬃ የልንቶደስ ቤዛነ› ጋእ ይንትስ ኦህደ ግሾ ኔኒ ጋማ ቆእፕፐ።
8 ባቆ ፋ ኮይዘ ዛላ ባቃነ። ነ ኤ ኦꬅቶ ስእዛኖ ፋትን ኤ አባፓ የእዛኮ ዎይ አባ ቅትዛኮ ነ ኤሮስ። አያናፓ የልንትደ ኡባ ይኒ ፋና» ያጋይዳ።
9 ዬዝን ንቆድሞሳ፥ «ይና ዋይዝ Ꮉኖደስ ዳንዳኤ?» ያጋእ ኦጭዳ።
10 የሱሳ ማህ፥ «ኔኒ እስራኤሉንꬅ አስታማረ ማቅተራ Ꮉኖ ኤሮሳ?
11 ታኒ ኔስ ቱሮ ቱሮ ጋነ፤ ኑ ኤርዘባዝ ኦህነን ብእደባዝ ማርክꬋነ፥ የዝን ኑ ማርካትꬅቶ ይን ኤኮስ።
12 ታኒ ይንትስ ሳአባዝ ኦህን ይን አማኖሱንꬅ ሳሎባዝ ኦህን ዋይዝ አማኖደ?
13 ሳሎፓ ዎꬍደ አስ ናአይፕ አትን ሳሎ ከዝደ ኦደን ባያ፤ [ሳሎ የዘ አስ ናአይ ታና]» ያጋይዳ።
14-15 ሙሴ አኮ ባይዘ ጋናስ ሳአ ሾሽ ሱጽዳንፋና ታና አማንዘ ኡቡንꬅ መዽና ደኦ ኤኮደ ፋናን ꬋባመ ፋና አስ ናአይ ሱጹንቶደስ ቤዛነ።
16 ኤዛ አማንዘ ኡቡንꬅ መዽና ደኦ ላቶደፕ አትን ꬋባመ ጋር ጾዚ Ꮉና አላምቶ ሎይꬂ ካꬍደ ግሾ ፋ ፈቲ ናአያ እንግዳ።
17 ጾዚ ፋ ናአያ Ꮉና አላምተ ኪትዳና አላምቶ ፍርዶደስ ማቅካይዝን አላምቶ ኤ ባጋራ አሾደስ።
18 ናአያ አማንዘ ኦደን ፍርድንቶስ፥ የዝን ናአያ አማኖሰ ኦደን ፈቲ ጾዘ ናአያ አማንካይዘ ግሾ Ꮉተ ፍርድንትዳ።
19 ፍርድታን Ꮉኖ፦ ፎኦ አላመ ይእዳ፥ የዝን አሱንꬅ ኦችታ ኢታ ማቅደ ግሾ አሱንꬅ ፎእትፓ አꬂ ꬉማ ካꬋነ።
20 ኢታ ባዝ ኦችዘ ኦደን ፎኦ እጻነ። አኮስ ጋይኮ፥ ፋ ኦችታ ቆንጫመ ፋና ፎኦጎ የኦስ።
21 የዝን ቱርቶ ኦችዘ ኦደን ጾዘ ኪትዳን ፋና ኤ ኦችዳኖ ፎኦ ቆንጭሳደ ፋና ፎኦጎ የእነ።
የሱሳን ጻማቅዘ ዋሐንሳን
22 ይንፓ ሱባ፥ የሱሳን ኤ ታማሩንꬅን ይሁዳ ሳአ ቅትዳ። የሱሳ የይጋ ጻማቅተራ ኡንታራ ኤራꬅ ዎደ በትዳ።
23 ማህ ዋሐንሳ ሳሌመ ካለ የዘ ሄኖና ጋዘ በሳ ጋማ Ꮉꬅ የዘ ግሾ አሱንꬃና የይጋ ጻማቃነ። አሱንꬅን የይጋ Ꮉንግ ጻማቅንታነ።
24 የ ዎደ ዋሐንሳ Ꮉጋ አጭንትካያ።
25 ይንፓ ሱባ፥ ዋሐንሳ ታማሩንꬅን ፈቲ አይሁደ አꬃይ ጌሸ ዎጋባዝ ዎላ ላልዳ።
26 ኡን ዋሐንሳጎ Ꮉንግ፥ «አስታማርዛዮ፥ ዮርዳኖሳ ቦርካፓ ሰኮ ፍንꬃ ኔራ የዘ፥ ኔኒ ኤ ባዝ ማርክꬍዳይ፥ Ꮉይቼ ጻማቃነ። አሱንꬅ ኡባ ኤጎ Ꮉንጋነ» ያጋይዳ።
27 ዋሐንሳ ማህ፥ «ጾዚ እንግካይዘ አስ አኮ ባዝን ኤኮደስ ዳንዳኦስ።
28 ‹ታኒ ክርስቶሳ ባያ፥ የዝን ኤፓ ቲኖ ኪትንትዳ› ጋይዳንስ ይን፥ ይን ኦምተ ታስ ማርካ።
29 ገሎደስ ጊግንትዳና ኤኮደስ ጊገዘስ። ኤክዘስ ላጉንꬅ ኤ ካለ ኤቂ ኤ ጋዛኖ ስእዘ ዎደ ጋማ ኡፋይታነ። ይኒ ግሾ፥ Ꮉና ታ ኡፋይስታ ፎልንትዳ።
30 ኤ ዳሞደስ ታ ኤሮደስ ቤዛነ» ያጋይዳ።
31 አፋፓ ይእዘ ኡባፓ ꬎቃ። ሳአፓ በንትደ ሳአ አስ፤ ኤ ሳአባዝ ኦህነ። ሳሎፓ ይእደ ኡባፓ አꬂ።
32 ኤ ፋ ብእደባዝን ስእደባዝ እዞ ማርክꬋነ፥ ዪኮን ኤ ማርካትꬅቶ ስእዘ ባያ።
33 ኤ ማርካትꬅቶ ኤክዘ ኦደን ጾዘ ቱሮ ማቅዳኖ ትልዛነ።
34 ጾዚ ፋ ጌሽ አያና ኤስ ኩንꬅ እንግዘ ግሾ ጾዚ ኪትደ ጾዘ ቃላ ኦህነ።
35 አዳይ ፋ ናአያ ካꬊ ኡባባዝቶ ኤ ኩሽተ ጋድዳ።
36 ናአያ አማንዘስ መዽና ደኦ የነ። የዝን ናአያ አማኖሰላ ጾዘ ፍርዳ የነፕ አትን ኤ ደኦ ደንጎስ።