Parnai Yang Arbang-pilŏ́ng: Tám Uraq Tamme Cang Cadô Rô-ma 6

Callong Luaih Táq Dyôn Ticuoi Cuchet; Ma Yê-su Táq Dyôn Ticuoi Tumống

1 Khán iki, imo he ính táq-ntêr? Ŏ he táq luaih níc, dyôn Yang Arbang-pilŏ́ng têq choi mat he a-ưi lư loi lớiq? 2 Lư lớiq piaiq iki! He la arớq khoiq cuchet te arnáq luaih. Khán he khoiq cuchet te arnáq luaih, ngki he lớiq têq táq nnáng arnáq luaih. 3 Imo arớq inha lớiq chom te rit táq tíc na dơq? Ndóng he ráp tíc na dơq, la he táq tíc he át mui mít alứng Yê-su Crit. Ndô la arớq he cuchet munơi alứng Yê-su tưi. 4 Tớq he ráp tíc na dơq la arớq he sŏ́ng cuchet munơi alứng Yê-su, alứng arớq ngai tứp he munơi alứng Yê-su tưi. Ma co nhơ te chức Yang Arbang-pilŏ́ng, iki án táq dyôn Crit tumống lieh te cuchet. Alứng án táq muchứng ngki tưi dyôn he têq tumống lieh, alứng cơt tamme loi.

5 Khán he sŏ́ng cuchet munơi alứng Yê-su, iki he lư bôn tumống lieh muchứng án tưi. 6 He chom arlớih arlêng, mít tieq he khoiq cuchet munơi alứng Crit tớq along calláng. Ndóng ngki, Yang Arbang-pilŏ́ng pupít nhéq callong luaih te mít tieq he; dyơ he lớiq sáng ính táq nnáng arnáq luaih. 7 Co ticuoi ndon khoiq cuchet, yang Satán lớiq têq tardông nnáng dyôn táq luaih. 8 Ma khán he cuchet munơi alứng Crit, iki he tin he bôn tumống munơi alứng án tưi. 9 He khoiq chom dyơ, Crit tumống lieh te cuchet, alứng án lớiq nai cuchet nnáng. Callong cuchet lớiq têq cơt ưlla án. 10 Crit cuchet mui chư sớng dŏq choi ticuoi luaih. Dyơ hoi-ndô án tumống lieh, dŏq táq máh arnáq Yang Arbang-pilŏ́ng yua án táq. 11 Muchứng ngki tưi, cóq inha parngíh, inha la arớq ticuoi khoiq cuchet alứng lớiq têq táq nnáng arnáq luaih. Ma cóq inha parngíh tưi, inha la arớq ticuoi bôn tumống lieh nhơ te Yê-su Crit, dŏq inha táq máh arnáq ndon Yang Arbang-pilŏ́ng ính inha táq.

12 Êq dyôn nnáng callong luaih cơt sút tớq mít inha; iki inha lớiq veng nnáng cannính inha bôm. 13 Êq mŏp cháq inha dyôn arnáq luaih, arớq mít saq báq ính. Ma cóq inha mŏp cháq inha dyôn Yang Arbang-pilŏ́ng, co Yang Arbang-pilŏ́ng khoiq dyôn inha tumống lieh te cuchet, alứng án choi inha dyôn táq arnáq tinớng ŏ. 14 Callong luaih lớiq têq cơt ưlla nnáng inha, co inha lớiq át nnáng tớq phep rit Môi-se. Ma inha át tớq callong choi mat te Yang Arbang-pilŏ́ng.

Top Tin Yê-su Ính Táq Ranáq Tinớng Ŏ

15 Khán iki, imo he ính tông? Hoi-ngki Yang Arbang-pilŏ́ng choi mat he, alứng phep rit Môi-se lớiq cơt sút nnáng he. Iki, têq he táq arnáq luaih lớiq? Lư lớiq têq iki! 16 Imo arớq inha lớiq chom, khán inha peh ngê mmo, inha lư cơt sol dyôn ngê ngki. Khán inha peh ngê luaih, inha cơt sol dyôn ngê luaih. Cống te ngê luaih la inha cuchet. Ma khán inha peh ngê Yang Arbang-pilŏ́ng, inha cơt sol Yang Arbang-pilŏ́ng. Alứng Yang Arbang-pilŏ́ng dyôn inha bôn cống, la inha bôn mít tinớng ŏ chứng mát án. 17 Cư si-ơn Yang Arbang-pilŏ́ng! Ndóng nsuoi inha cơt sol dyôn ngê luaih, ma hoi-ndô inha peh nhéq tarngứh tarhơ máh callong piaiq te Yê-su Crit, ndon ngai khoiq cato inha. 18 Yang Arbang-pilŏ́ng khoiq taláh inha te cơt sol callong luaih; ma án táq dyôn inha cơt sol callong tinớng ŏ loi. 19 Cư cato inha tớq parnai acám ndô ính inha chom arlớih lư. Ndóng nsuoi inha mŏp cháq inha dyôn cơt sol arnáq saq. Iki mít inha cơt saq lư loi. Ma hoi-ndô, cóq inha mŏp cháq inha dyôn cơt sol arnáq tinớng ŏ. Iki mít inha cơt práh ŏ.

20 Ndóng inha cơt sol ngê luaih, inha lớiq chom parngíh amớh te arnáq tinớng ŏ. 21 Amớh tarnáp te ngê ndon inha veng hoi-nsuoi? Lư lớiq bôn tarnáp amớh. Hoi-ndô inha sáng achiet la co tian te arnáq saq ngki, cống te ngê luaih la inha cuchet. 22 Ma hoi-ndô Yang Arbang-pilŏ́ng khoiq taláh inha te ngê luaih. Iki inha cơt sol Yang Arbang-pilŏ́ng loi. Cống te arnáq ngki la inha bôn mít práh ŏ alứng bôn tumống níc-níc. 23 Co cống te callong luaih la he cuchet. Ma Yang Arbang-pilŏ́ng choi mat he dyôn têq bôn tumống níc-níc nhơ Yê-su Crit Ưlla he.