13
Pkaltxi nvxihtmeeçxa' maawa jxuka vxituni
1 Txãa ensuy nasa maaíi yu' Jesusa's na'wẽtx pta'sxna utxáa:
—Galileajuwe'sxa' Dxusna weçxana neewe'weya' altalte kabwa'j tajkx ikheçpkaçxha', Pilato' txãawe'sxtxi' ikhkaakh, aça' txãawe'sx eea' takx ee yakh jxuka ka'duk jĩte',
2 Jesusa' na'jĩk:
—Galileaju nasatx txã'wẽ yũute', txãa uusaawe'sxa' Galileasu nasate jxthaakwe pkalsane'ta yu', txãa pa'gatx txã'wẽ uu ena's ji'phu ¿sũjũkwé'?
3 Na'jĩ'th na': Txãawe'sxçxáa thaakwe pkalsa yu'çmeeta'. Aça' i'kwe'sxwa pkaltxi nvxihtçxa Dxus tasxte sxawedmeeçxa', txãawe'sx na'wẽyçxáa uuwa'jsai'kwe.
4 Txã'wẽy diecioçxo nasa Siloete toçxe kajkwekhẽ wetete' uutx txãa uusaawe'sxa' Jerusalen çxhabte u'psawe'sxte jxthaakwe yuuwesane'ta yu', txãa pa'gatx txã'wẽ uu ena's ji'phu ¿sũjũkwé'?
5 Na'jĩ'th na': txãawe'sxçxáa thaakwe yuuwesa yu'çmeeta'. Aça' i'kwe'sxwa pkaltxi nvxihtçxa Dxus tasxte sxawedmeeçxa', txãawe'sx na'wẽyçxáa uuwa'jsai'kwe.
Higwera tasxa's spẽ'th kaahni
6 Jesusa' naa ejemplo'sku pta'sx:
—Teeçx piçthẽ'ja' higwera fxtũu tasxku txajx kiwete uhni ji'phu'. Sa' thegya' u'kh, yũnwáana sũhçxa. Nawa uyme'.
7 Txajũ' na'jĩk kxtee uuthasx thegsa's: Naa fxtũu tasx yũnuuçwáana sũhçxa adx thegya' pa'jna ũsni tekh anxuyã'ja', nawa teeçx yũn yuhwa uynimeeth. Aça' mespẽ'th, ¿mjĩya'çxáa kxul ũsya'wana? jĩte',
8 uuthasx thegsa pasçxa': Menvxiht naa anxuçxáawa, aça' kiwe's luupe'jçxa sxaakwe'je'nja.
9 Aça' yũnne'jwáana. Txã'wẽ yũute yũnmeete, kaaspẽ'the'jene'ga jĩk.
Teeçx u'y ku'le u'juya' ãjasame's sapatu ente nuykatxhini
10 Teeçx sapatu jxkaase ente', Jesusa' judiuwe'sx pkhaakhenitek kaapiya'jna ũsu'.
11 Aça' kxte' teeçx u'y diecioçxo anxuyã'j ãçã'na u'jusak ũsu', eçx luuku vxit-sa pkxuute ku'le u'juya' ãjasamée.
12 Aça' Jesus uyçxa', pa'yak:
—I'kwe' naa weeju katxhiyã'ji'kwe jĩçxa',
13 Jesusa' ãçã'sa kakwete jxa'dxku. Naapkaçxha' txãa u'ya' dudtey ku'le'ya' ãjãçxa', seena' wala Dxusa's weçxana we'wek.
14 Jesusa' txã'wẽ sapatu jxkaase entewa ãçã'a's nuykatxhite', judiuwe'sx pkhaakhenite npiiçthẽ'jsa' ũusaçxaçxa nasatx na'jĩk:
—Ki'su' seis en ji'pha' mjĩiwa'j. Aça' katxhi wẽeçxa' vxite ensu myuhwe. Nawa sapatu jxkaase ente yu', katxhiya'çxáa yu' pa'jnuwe jĩnak jxkaah.
15 Aça' Jesus pasçxa':
—Ãateçxáa ew we'weçxa' ũuste yu' ewmeeçxáa yaakxsawe'sx mpaaswe: I'kwe'sx kla meeçxawa i'kwe'sx jiba tudni ũste', makwe jxkaase entewa jxũkhwedeçxa yu' yusya' ¿jxũna u'jmeema'kwe?
16 Naa u'ya' Abrahan ji'ja' nawa eçxthẽ'ja' diecioçxo anxuk kaãçã'jna ji'phu'. Aça' makwe jxkaase entewa eçxthẽ'j kuseju kusa'the ¿ewmeemanx? jĩte',
17 Jesusa's açeyaakxsawe'sxa' wẽsẽ'jçxa', thaametx. Nawa nasa jwee kuhsa yu' weçxa'tx, Jesus txakwe wala ew yũupa'ga.
Mostasa fxiwa's kaaja'da'jni
(Mt 13.31-32; Mr 4.30-32)
18 Txajũ' Jesusa' na'jĩk:
—Dxus jxkaahwa'j ena' ¿ma'wẽkx sũjũ'kwe? Txã'sa' ¿kĩh yakh kaaja'da'jaki'th?
19 Nawa na'wẽ': teeçx piçthẽ'j txajx kiwete mostasa fxiwa's uhte', ma'wẽ seena' walaakx. Aça' vxiçxakuẽ yuhwa txãa mostasa ku'tasu yaatutxki txã'wẽsa'.
Lewadura's kaaja'da'jnisa
(Mt 13.33)
20 Ki'kin vxite ejemplo na'wẽsa yakhku kaaja'da'jna pta'sx Dxus jxkaahwa'j ena's:
21 —Teeçx u'ya' tekh libra skuutxh ũ'wete le'çxkwe lewadura's ka'dte', ma'wẽ jxuka pẽethẽjekx txã'wẽy yuuna jĩk.
Vxitx pteezsa
(Mt 7.13-14, 21-23)
22 Jesusa' Jerusalenna u'jweççxa', çxhabsu msuuwa iikaapiya'kh u'jwe'.
23 Aça' teeçxsa' na'wẽk pejx:
—Dxus tasxte ewte neeyũuwa'jsa' ¿kuhmeewáatxna? jĩte', Jesus pasçxa':
24 —I'kwe'sxa' wala yuh mpa'pçxuwe vxitx pteezte u'kaya'. Na'jĩ'th na': Maawa wala yuh u'ka wẽjẽtxna, nawa thẽytewa pa'pçxumeeçxa yu' u'kaya' ãjãmeetxna.
25 Yat namu' vxitxa's aphyã'the', i'kwe'sxa' ekaju neeyũuçxa' vxitxte tu'kakana na'jĩne'kwe: Vxitxa's meen phaade, kwe'sx u'kaya'watha'w jĩne'kwe. Nawa txãa pasçxa': Adxa' jiimeeth i'kwe'sxa' majũwe'sxne'kwe nawa jĩte',
26 i'kwe'sxa' na'jĩne'kwe: Kwe'sxa' idx yakh txutemée mteewa u'jusatha'w. Aça' idxa' kwe'sx çxhabsuwa kaapiya'jg jĩwá'kwe.
27 Nawa txã' na'wẽ pasuna: Na'jĩyã'th na', i'kwe'sxtxi' jiimeeth majũwe'sxne'kwe nawa. Adx tasxu me'jwe, i'kwe'sxa' jxukay ewmée yũusaçxáa i'kwe jĩna.
28 Aça' i'kwe'sx yu' eka kutxi'jni neeyũuçpkaçxha', Abrahan, Isaak, Jakob vxite' Dxus yuwe pta'sxsa txãawe'sx yu' Dxus jxkaahna ũsnite ũste uyçxa', seena' wala ũ'nene'kwe ki'th yuhtxwa ksuusu'jna.
29 Ekaju neeyũusáa txã'wẽ nxuskahníi sek kãanijũwe'sx, sek khẽenijũwe'sx, majũ majũwe'sxwa jxuka pa'jya'wata', Dxus jxkaahna ũsnite u'kaya'.
30 Aça' kxtee u'kawa'jsa ãçxh maaíi yu' e'stewe'sx ũsta' txãa yu' yaçte yuutxna, naapkaçxha' yaçtewe'sx yu' e'ste yuutxna jĩk.
Jesusa' Jerusalena's thegçxa ũ'neni
(Mt 23.37-39)
31 Txãa entey maz fxariseowe'sx pa'jçxa', Jesusa's na'jĩtx:
—Me'j ayjxu. Txã'wẽme', Herodesa' idxa's ikhya'wa' jĩna pta'sxte',
32 Jesus pasçxa':
—U'jçxa na'jĩne'kwe txãa thẽ'ja's: Ãçxh yakh kuskus yakh nee mjĩiwa'j ji'phthu eçx luuku vxit-satx nasa ũusu kutxi'jna ãçã'satxwa nuykatxhina. Sa' tekh ente' mjĩina jxã'ja'nja jĩ'k jĩne'kwe.
33 Adxa' nee u'juwa'j en ji'phíiçxáath tekh en ãhpkaçx, txãa pa'gatey Dxus yuwe pta'sxsa' Jerusalen ekaju yu' uuwa'j ji'phme'.
34 Jerusalentewe'sxa' Dxus yuwe pta'sxsatx ikhna Dxus kaahnisatxwa pãpana pkxuui'kwe. Nawa adxa' i'kwe'sxtxi' maazkuẽe uswa pa'yath nwe'weya', atalxwa ma'wẽga luuçxkuẽtx fxuu ku'ta dxiite yu'ãsxi' txã'wẽy yũuya', nawa nwẽesẽ'jmeei'kwe.
35 Txãa pa'ga mpa'yajkxwe. I'kwe'sx çxhaba' jxuka pçuuna sa' ãçxhũyã'ja' adxa's peena yu' uymeene'kwe, Dxus kaahni jxtuhthe ki' kĩiwa'j en ãhpkaçx jĩ k.