18
Khuẽs ewmeesa vxiuda's nwe'weni
1 Dxusa's peçxkanamée bagaçxtewa txãa yakh puutx we'wena nes yuukahn naa ejemplo'sku pta'sx Jesusa':
2 —Teeçx çxhabte teeçx khuẽs u'pu'k, Dxusa's yaakxsamée sa' nasatxwa peeygãja'çme'.
3 Txãa çxhabte' teeçx u'y vxiudak u'pu', sa' khuẽs tasxte pãatxhĩ'khya' u'jna nesku yu': Ũ'kwe's meen nwe'we, açesa wala pkxu'tx jĩna.
4 Maazkuẽe uswa pa'thewa, txãa khuẽsa' pu'çxme', nawa na'wẽk yajkx: Dxusnawa yaakiçmeeth sa' nasa maa yuhtxwa peeygãasameeth.
5 Nawa naa vxiuda' wala kuçx tahtatey pa'ja'k aça' pu'çxhi'nja peena yu' pa'khamén jĩk.
6 —Khuẽs ewmeesa yuhwa txã'wẽk pu'çxya' yajkx jĩk Jesusa'.
7 Dxusa' ¿txã'wẽyçxáa pu'çxmeema'k txajx txhitxhnisatxi'? Txã'wẽ kus ma'k yuu en ma'k yuu nawa pxthaa we'wena nes yuute' pu'çxya' jxthẽeyuumeena.
8 Na'jĩ'th na': Dxus Nçxi'k Nasa Yuusáa naa kiwete sxawedna kĩi entewa ¿txã'wẽ Dxus yakh pu'vxitumée neewe'wesa ũsma'tx yuu? jĩk.
E'zsa dxuus yatte Dxus yakh puutx we'weya' u'kani
9 Jesusa' na'wẽk vxite ejemplo pta'sx txã'wẽ maaíi yu' wala ewsatha'w sũhna vxite yuutxi' ahçena fxi'zesawe'sxtxi:
10 —E'z piçthẽ'jtx dxuus yatte Dxus yakh weçxana puutx we'weya' u'ka. Teeçxsa' fxariseo', aça' vxite' gobierno jĩi vxyu pkhakhsak yu'.
11 Fxariseo yu' yujuçxa na'jĩnak Dxus yakh puutx we'we': Dxus, idxa's wala weçxa'th, adxa' vxite nasa na'wẽmeeth. Txãawe'sxa' pesweeta', ewmée kazxsata'. Sa' nyu ji'phçxawa vxite yakh pkal yuusata'. Aça' adxa' txã'wẽsameeth. Naa piçthẽ'j ayte ũsa' gobierno jĩi vxyu pkhakhsa txã'wẽsaçxáa yuhwa meeth.
12 Sa' ki'sute e'z us yũuna'th. Adx knayni kĩjkĩhnawa diesmo dukhe'th idxa's jĩk.
13 Naapkaçxha' gobierno jĩi vxyu pkhakhsa yu' jxu'theçxáa yujuçxa cielute yuhwa pagaymée naasáa txajx peçxuteçxáak iikakana Dxusa's na'jĩ': Dxus, adxa's meen peeygãh. Wala yuuwesath jĩnaçxáak we'we'.
14 Na'jĩ'th na': Gobierno jĩi vxyu pkhakhsa we'weni's Dxusa' pasne'. Nawa fxariseo yu' pasnimeene' yatna sxawedna u'j. Maawa iiwejçx iiwejçx yajkxçxa we'wesa', jxthaakwe ãhmeekwesa yuuna. Nawa maawa ãhmeekwesa na'wẽ yajkxna we'wesa' iiwejçx yaakxsate jxthaakwe ewsa yuuna jĩk.
Luuçxkuẽtx Jesus bedekĩyni
(Mt 19.13-15; Mr 10.13-16)
15 Txajũ' nasa' Jesus tasxte txãawe'sx luuçxkuẽtx nuypa'jtx Dxus kusete neewe'wekahn. Aça' Jesus yakh u'jusawe'sxa' ũusçxa we'wetx luuçxkuẽtx nuypa'jsatx.
16 Nawa Jesusa' txãa yakh u'jusawe'sxtxi pa'yaçxa na'jĩk:
—Luuçxkuẽ adx tasxte yuhte', kuçx yupnuwe, txãa pa'gatey Dxus jxkaahna ũsnisa' naa luuçxkuẽwe'sx na'wẽsa jĩi íiçxá'.
17 Isath we'we', maawa luuçxkuẽ na'wẽ Dxus jxkaahwa'j ena's wa'lmée jxpa'gameeçxa yu', bagaçxte yuhwa Dxus tasxte u'kameetxna jĩk.
Piçtakx wala ji'phsa Jesus yakh puutx we'weni
(Mt 19.16-30; Mr 10.17-31)
18 Txajũ' teeçx piçtakx npiiçthẽ'jsa na'wẽk paapẽjx Jesusa's:
—Idxa' wala ewgu kĩhsuwa jxuka, txãa pa'ga na'wẽth paapẽyi': ¿Ma'wẽ yũuçxa pçumée ĩtxĩ fxi'zewa'ja's ji'phuki'th? jĩte',
19 Jesusa' na'jĩk:
—¿Kĩh yuupa'gaga adxa's ewsa jĩ'? Naa kiwete' teeçxçxáa yuhwa ewsa yu' meeta'? naasáa Dxus yuuçxáa ewsa ũsa'.
20 Pçumée ĩtxĩ fxi'zewa'ja's ji'phu wẽeçxa', Dxus jxkaahnitxi' jiig txãatxi' kxtey myuu. Txã' naata': Ptamsayã'ja' vxite yakh pkal yuuwa'jme'. Nasa ikhwa'jme'. Pesweewa'jme'. Vxitetx ĩsxĩina nuywe'wewa'jme'. Neywe'sxtxi peeygãhna ewçxáa yũuna fxi'zewa'ja' jĩte',
21 txãa piçtakx pasçxa':
—Txãatxi' le'çxkuẽjũjx jxuka kxtey yuunath waláa jĩk.
22 Aça' Jesus wẽsẽ'jçxa' na'wẽk jxkaah:
—Txã'wẽtewa, nee peeji'. Iidx ji'phuni's jxuka txweyçxa, puuplesatx peesune'ga. Txã'wẽ yũuçxa', cielute ji'phsa yuune'ga. Txã'wẽ yũuçxa adx yakh myuh jĩte',
23 txãa piçtakxa' wala nxusna neeyũuk, wala ji'phsa yu'k txãapa'ga.
24 Txã'wẽ nxuste', Jesusa' na'jĩnak we'we:
—Maawa wala ji'phsa yakha', wala yuh thẽya' Dxus jxkaahna ũsnite u'kawa'ja'.
25 Aça' txã'wẽ thẽysa's yajkxte yu', kamelxo yuhwa thẽymée wáa yũz kafxga u'kaya' ãjatxna.
26 Txã'jĩte', na'wẽtx we'we:
—Txã'wẽ thẽyte', ¿kim ewte neeyũuya' ãjãkx? jĩ'tx.
27 Aça' Jesusa' na'jĩk:
—I'kwe'sxçxáa yu' ãjãmeene'kwe. Nawa Dxus yakh yu', kĩh yuhwa thẽysa meea' jĩte',
28 Pedro' na'wẽk we'we:
—Kwe'sxa' idx yakh yujxa' kwe'sx ji'phuni's jxuka nvxihttha'w jĩk.
29 Aça' Jesus pasçxa' na'jĩk:
—Isath we'we': Dxus jxkaahni's nwẽesẽ'jya' maawa yat, neywe'sx, nyakhwe'sx, nyu, nçxi'kwe'sx txã'wẽsatx nvxihtçxa',
30 naa kiwete nee ũsíi txãa nvxiitnisate jxthaakwe jxpa'gatxna, sa' vxite kiwete' pçumée ĩtxĩ fxi'zewa'ja's ji'phutxna jĩk.
Jesusa' txajx uuwa'ja's ki' pta'sxni
(Mt 20.17-19; Mr 10.32-34)
31 Jesusa' txãa yakh u'jusawe'sx docesatx fxiite pa'yaçxa na'wẽk pta'sx:
—Ãçxha' Jerusalente pa'jya' u'jweçtha'w, aça' Dxus yuwe pta'sxsawe'sxa' fxi'jtx Dxus Nçxi'k Nasa Yuusá's ma'wẽ yũuwa'thewa txã' jxuka kxtey yuuna.
32 Dxus Nçxi'ka's vxite nasatx dukh ya'wata', aça' txãawe'sxa' npeevxysxijkana wẽesxuuna fxne'sx avxythethna yũuya'wata'.
33 Sa' wala peçxujkwena yuuçxa ikhetxna. Nawa tekh ente' ki' ĩtxĩ yuuna jĩtewa,
34 txãa yakh u'jusawe'sxa' weh yuhwa jiyumeeta' sa' txã'wẽ kxtey yuutxna sũjũ'çwameeta'.
Teeçx piçthẽ'j Jerikotewe'sx uyya' ãjasame's Jesus nuykatxhini
(Mt 20.29-34; Mr 10.46-52)
35 Txajũ' Jesusa' Jeriko çxhabte pa'jaçte', teeçx piçthẽ'j uysaméek dxi'j pukate kaçxçxa lmusxnu pẽjxna u'pu'.
36 Sa' nasa wala skhẽwna susuçte wẽsẽ'jçxa', pẽjxku:
—¿Kĩh yuuçna? jĩna.
37 Aça' nasa pasçxa':
—Jesus Nasarethuwe'sx aysu skhẽuuça' jĩte',
38 uysame' na'jĩnak sus we'we:
—¡Jesus, Davxid ji'j, adxa's meen peeygãh! jĩna pxthaa we'wete',
39 nasa yaçte u'jsawe'sx yu':
—Sxuuna' myuu jĩnatx wẽesxu we'we. Nawa txãa yu' jweeíiçxáak sus we'we:
—¡Davxid ji'j, adxa's meen peeygãh! jĩna.
40 Txajũ' Jesusa' nee yujuçxa pe'jya' kaakh. Sa' utxaana kũhte', na'jĩk:
41 —¿Kĩhga yũu jxthãasu'? jĩte':
—Adxa' uyya' ãjã'çmeeth, txãasath uy wẽjẽ' jĩk.
42 Aça' Jesus we'weçxa':
—Kaauyu'juna sũhçxane'ga adxa's pi'kx, txãa pa'ga ãçxha' uyna mneeyũu jĩçpkaçxha',
43 txãa dudtey uyya' ãjãk, sa' Dxusna wala weçxana Jesus e'stey u'kh. Txã'wẽ uyya' ãjãte nasa uyçxa', txãawe'sxwa txã'wẽytxi Dxusa's wala weçxa.