22
Jesusa's ikhwa'ja's puutx we'weni
(Mt 26.1-5, 14-16; Mr 14.1-2, 10-11; Jn 11.45-53)
1 Pan lewadura ji'phmée ũ'ni Paskua fxiesta ãjãçku yu'.
2 Aça' sacerdote npiiçthẽ'jwe'sx vxite' ley kaapiya'jsawe'sxa': Jesusa's ¿ma'wẽ yũuçxa ikhekxtha'w? jĩnatx txãawe'sx pwe'sx puutx we'wena ũsu'. Nawa nasa wala kuh Jesus ju'gusa ũste', ũukhu'tx.
3 Naapkaçxha' eçxthẽ'ja' Judas Iskariote ũuste u'kak. Txãa Judas yu', Jesus yakh u'jusa docesatewe'sxíiçxáak yu'.
4 Txajũ' txãa Judasa' puutx we'weya' u'kh sacerdote npiiçthẽ'jwe'sx vxite' dxuus yatte thegsawe'sxtxi, Jesusa's txãawe'sx kusete dukhya'.
5 Aça' txã'wẽ puutx we'wete', txãawe'sxa' vxyu dukhya' neeyũutx Judasa's.
6 Txajũ' Judasa' nasa uynimeete paaçte dukhwa'ja's pakwek.
Jesusa' docesawe'sx yakh nmeh ũ'ni
(Mt 26.17-29; Mr 14.12-25; Jn 13.21-30; 1 Ko 11.23-26)
7 Txajũ' pan lewadura ji'phmée ũ'ni fxiesta en ãjk. Txãa ente' piisxáa luuçxtxi ikhe' Paskuatewe'sx.
8 Aça' txãa ente' Jesusa' na'jĩnak jxkaah Pedro Juanwe'sxtxi:
—Me'jwe Paskua fxiestate ũ'wa'ja's pheu'jya' jĩte',
9 txãawe'sxa' pẽjxtxi:
—¿Mteega pheu'j jxthãasu'? jĩte',
10 Jesus pasçxa':
—Çxhabna u'jçxa kxtee pa'jaççxa', teeçx piçthẽ'j uyuune'kwe yu' mitxha's yakhçxa u'jweçte. Sa' e'ste u'jwene'kwe yatte u'kapkaçx.
11 Sa' kxtee pa'jçxa', yat namu's na'jĩne'kwe: Kwe'sxtxi jxpe'jsa' pẽjxya'k kaah: Paskua fxiestate txãa yakh u'jusawe'sx yakh ũ'wa'j ¿mtee piesa pheu'jni ũsna? jĩkaja'k jĩne'kwe.
12 Aça' yat namu' ẽe yatte piesa walasa pheu'jniyã'jsa's pta'sxina. Kxtee ũ'wa'ja's pheu'june'kwe jĩnak jxkaah.
13 Aça' Pedrowe'sxa' u'jçxa', Jesus ma'jĩni'swa jxuka kxtey uyçxa Paskua fxiestate ũ'wa'ja's pheu'jtx.
14 Txajũ' ũ'wa'j ora ãhte', Jesusa' txãa yakh u'jusawe'sx yakh kaçxku mesate ũ'ya'.
15 Sa' na'wẽk we'we:
—¡Mazkuẽ uswa wala yuh yaaki'th, adxa's uu en pa'jmeyna, naa Paskua fxiestate i'kwe'sx yakh nmeh ũ'wa'ja's!
16 Na'jĩ'th na': ãçxha' ayte peena yu' naa Paskua fxiestatewe'sxa's ũ'me'nja, Dxus ki' jxkaajxa' pa'jwa'j en ãhpkaçx.
17 Txajũ' waso's uweçxa Dxusna weçxana orãyçxa', na'jĩk:
—Jxpa'gaçxa jxukaysa mtudxwe naa wasotewe'sxa's.
18 Na'jĩ'th na': ãçxha' ayte peena yu' uwa yu'a's tudxme'nja, ki' Dxus jxkaajxa' pa'jwa'j en ãhpkaçx.
19 Txajũ' pana'swa Dxusna weçxana orãyçxa', pe'ltedeçxa txãawe'sxtxi ũsu'sku na'jĩna:
—I'kwe'sx pa'gate adx kakwe' dukhwa'j yuuya'wa', aça' naa pana' adx kakwe na'wẽsa'. I'kwe'sx pa'gate adx pxthaa yuuçxa uuni's yajkxna txã'wẽ myũuwe bagaçxtewa.
20 Ũ'na jxã'jçxa', waso's jxpa'gaçxa na'wẽk we'we:
—Adx eea's pkawçxa yuuçxáak Dxusa' i'kwe'sxtxi nwe'wewa'ja's u'se pheu'jçxa nvxiht. Aça' naa wasotewe'sxa' adx ee na'wẽsa'.
21 Aça' ãçxha' adx yakh ũ'na u'pa' ay mesate txãa piçthẽ'ja' adxa's açesawe'sx kusete dukhya'wa'.
22 Dxus Nçxi'k Nasa Yuusá' ãçxha' pejka uuya'wayuja'. Adx uuwa'ja's ma'wẽne' Dxus nvxiht txã' kxtey yuuya'wa'. Nawa adxa's açesawe'sx kusete dukhsa' ¡seena' yuh nxuste khẽjena! jĩte',
23 Jesus yakh u'jusa pwe'sx puutx ya'paapẽyi'tx na'jĩna: Kwe'sx ksxavxytewe'sx ¿kim txã'wẽ dukhya'wakx? jĩ'tx.
Maa wejx jxthaakwe walasa yuuwa'ja's pẽyni
24 Txajũ' txãawe'sx pwe'sx na'wẽ yũuwa'ja'stxi puutx ya'paapẽyi':
—Ayte kwe'sx ksxavxytewe'sx ¿maa wejx jxthaakwe walasakx? jĩte',
25 Jesus pasçxa':
—Naa kiwete jxkaahsawe'sxa' wala juuna'çxáa yuuna jxkaaja'tx. Txã'wẽtewa txãawe'sx yuutxi's wala ewsata' jĩ'tx nasa yu'.
26 Nawa i'kwe'sxa' txã'wẽ yũuna jxkaahwa'jsameei'kwe, wejxwa i'kwe'sxa' maaíi yu' jxthaakwe walasa ũsçxawa, nuuçxsa na'wẽ yuuwa'j ji'phi'kwe. Aça' maawa jxkaahwa'ja's ji'phsa', selpisáa na'wẽçxáa yuuwa'j ji'phi'kwe.
27 ¿Maa wejx jxthaakwe walasakx? ¿Puuçte mesate ũ'ya' kaçxsá wejx jxthaakwe walasamanx, meeçxa' puuçsa wáa wejx jxthaakwe walasana? Isa ew yajkxte', mesate ũ'ya' kaçxsá jxthaakwe walasana. Nawa adxa' i'kwe'sxtxi selpisáa na'wẽçxáa ũsthu.
28 Adxa' bagaçxtewa nxuste thẽyte fxi'zeçtewa i'kwe'sxwa adx yakh ja'da pxthaa yuuna nesi'kwe yu' nvxihtmée.
29 Txãa pa'ga adxa' i'kwe'sxtxi ũsu'nja jxkaahwa'ja's, adxa'swa ma'wẽga adx Tata jxkaahwa'ja's ũs txã'wẽy,
30 kxah adx jxkaahna ũsnite pa'jçxa', adx yakh ih mesate ũ'wene'kwe, sa' Israelwe'sx ji'j docesatx jxkaahsa yuune'kwe.
Pedro ĩsxiiwa'ja's Jesus pta'sxni
(Mt 26.31-35; Mr 14.27-31; Jn 13.36-38)
31 Txajũ' Jesusa' Simona's na'wẽk pta'sx:
—Simon, idxa' wala yuh mpa'yajkx. Txã'wẽme' eçxthẽ'ja' i'kwe'sxtxi pẽjxku skuutxh kweejxa'jsa na'wẽ yuuya'.
32 Nawa adxa' iidx pa'gate Dxusa's neewe'weth, Dxusçxáana yajkxna fxi'zekahn. Aça' idxa' Dxus tasxte ki' sxawedçxa', yakhthẽ'jwe'sxtxi kçxhãaçxha'jane'ga Dxus yakh txutemée fxi'zewa'ja's jĩte',
33 Simon pasçxa':
—Adxa' karcelna ma'k yuu meeçxa' uuwa'j ma'k yuu nawa adxa' kĩhte yuhwa txuteme'nja jĩte',
34 Jesus ki' we'weçxa na'jĩk:
—Pedro, idxa's na'jĩ'th na': ãçxhíi atalx we'wemeyna, idxa' tekh us ĩsxĩijaçyã'j yuune'ga adxa's jiimeeth jĩna.
Jxpa'yakx ũs kaahni
35 Txã'wẽ pta'sxçxa' Jesusa' na'wẽk pẽjx:
—Adxa' teeçx ente' i'kwe'sxtxi' Dxus yuwe pta'sxya' kaahçxa' kĩh yuhwa ji'phmeeth kaah, ya'ja, vxyu, pelgatxi txã'wẽsatx. Aça' i'kwe'sxtxi' dxi'the ¿kĩhçxá' peejiigá'? jĩte', txãawe'sx pasçxa':
—Kwe'sxtxi' kĩh yuhwa peejime' jĩtx.
36 Aça' Jesus we'weçxa' na'jĩk:
—Ãçxha' ya'ja ma'k yuu, vxyu ma'k yuu, kçxilx ma'k yuu nawa ji'phsa' jxũçxa me'jwe. Aça' kçxilx ji'phmeesa' atxha's txweyçxa kçxilx mweywe.
37 Txã'wẽme' Dxus librute we'weçxa': Ewmeesathas yuuwesa yakhku ki'pni yuu jĩk naa pa'ga ãçxha' adxa's jxuka txã'wẽy yuuya'wata' jĩte',
38 txãawe'sx we'weçxa':
—Ayte e'z kçxilx yu' ũsta' jĩte', Jesus pasçxa':
—Txã'wẽçxa'. Txãaçxáa ewtxna jĩk.
Jesusa' Geçemanite Dxus yakh puutx we'weni
(Mt 26.36-46; Mr 14.32-42)
39 Txajũ' Jesusa' ũ'na jxã'jçxa', txajũ kasehçxa', Oliwos vxiçna ki' u'kh. Aça' txãa yakh u'jusawe'sxwa e'stey u'jtx.
40 Kxtee pa'jçxa na'jĩk:
—Dxus yakh puutx we'wena me'pwe, ewmeete weteya'mée jĩçxa',
41 txãawe'sx tasxu jxu'jmeekuẽ txuteena u'jçxa peejxũkweçxa na'jĩnak Dxus yakh puutx we'we:
42 —Tata, idxa's ewuweçxte', seena' nxuste uuwa'ju meen nwe'we. Nawa adx jxthãasni's kxtey yuumeeçxawa, iidx jxthãasniçxá's kxtey meen yũu jĩte',
43 Dxus angel cielujũwe'sx kvxiisxa'jna kçxhãaçxha'jya' kĩjk.
44 Txã'wẽme' wala yuh pxthaa nxusna Dxus yakh puutx we'wena u'pu'k naa pa'ga pẽ'ç yuhwa ee na'wẽsak wala pkaw.
45 Sa' Dxus yakh puutx we'wena jxã'jçxa' kiiteçxa u'kh Pedrowe'sxtxi thegya'. Nawa txãawe'sxa' deenitx yu', wala nxusçxa.
46 Aça' kũhçxa na'wẽk we'we:
—¿Kĩjxa'kwe dejé'? Kiiteçxa Dxus yakh puutx we'wena me'pwe, ewmeete weteya'mée jĩk.
Jesusa's preesu'jni
(Mt 26.47-56; Mr 14.43-50; Jn 18.2-11)
47 Jesusa' kxtee we'wena nee ũsiyna, nasa wala kũhtx. Aça' Jesus yakh u'jusa Judas yu' txãa nasa yaçte kũhçxa, Jesus tasxte utxaak pukakwette weçxaya'.
48 Aça' Jesusa' na'jĩk:
—¿Judas, idxa' Dxus Nçxi'k Nasa Yuusa's weçxani yakh wáa kuuwe'jya'wane'ga? jĩte',
49 Jesus yakh u'jusawe'sxa' Jesusa's pẽjxtxi:
—¿Txãa nasatxi's kçxilx yakh puiimtha'w? jĩtx.
50 Txajũ' Jesus yakh u'jusa teeçxsa yu' sacerdote npiiçthẽ'ja's selpisáa thũ'wẽ's spẽ'thku paçuwe'sxna.
51 Aça' Jesusa' we'wek:
—Kxtee pa'j yu' yũunu jĩçxa', txãa thũ'wẽ spẽ'thnite jxa'dxçxa', ki' kaywẽtu'kh.
52 Sa' sacerdote npiiçthẽ'j vxite' dxuus yatte thegsawe'sx vxite' judiu nthẽ'jsawe'sx preesu jxũna u'jya' pa'jsatx we'wek:
—Adxa' ¿pesweethas i'kwe'sxa' kçxilx petx fxtũ atçxawá'kwe adxa's preesu jxũna u'jya' yuwé'?
53 Adxa' i'kwe'sx yakh een isath dxuus yatte ũsu', nawa txagaçxhíi yu' tudxa' utxaameeçxa', jxuka çxhi'dxni naa orate yu' pejka preesu'jya' pa'ji'kwe jĩk.
Jesusa's jiimeeth jĩna Pedro we'weni
(Mt 26.57-58, 69-75; Mr 14.53-54, 66-72; Jn 18.12-18, 25-27)
54 Txajũ' Jesusa's tudçxa jxũna u'jtx sacerdote npiiçthẽ'j yatna. Aça' Pedro' Jesus e'ste jxu'j neeyũuçxak u'jna ũsu'.
55 Kxtee pa'jçxa' patxute ipx yuthçxatx bajçxya' kaçx. Aça' Pedrowa txãawe'sx yakh ih bajçxya' kaçxku.
56 Aça' teeçx u'y selpisá' Pedro txã'wẽ ipx pukate bajçxna u'pte', dxi'pte ew thegçxa na'jĩk:
—Naa piçthẽ'jwa Jesus yakh u'jusa' jĩte',
57 Pedro' ĩsxĩik:
—Adxa' jiimeeth txãa piçthẽ'j kxsusu'i'kwe txã'sa' jĩk.
58 Txajũ' txãa e'su' vxitewa uyçxa na'jĩk:
—Idxwa txãawe'sx yakh u'jusag jĩte', Pedro pasçxa':
—Isa, adxa' txãawe'sx yakh u'jusameeth jĩk.
59 Txãa skhẽwni teeçx orate' vxitek na'jĩna we'we:
—Ĩsxĩimeete, naa piçthẽ'ja's uythu Jesus yakh u'jute. Txãa yakh u'jusaçxaíi, Galileajuwe'sxa' jĩte',
60 Pedro pasçxa':
—Kĩhne'ga we'we' na'swa jiyuçmeeth. Txã'jĩna we'wena nee ũsiyna, atalx we'wek.
61 Aça' Jesusa' tuphiçxa Pedro dxi'pte thegte', Pedro' yajkxku Jesus we'weçxa': Ãçxh atalx we'wemeyna, tekh us ĩsxĩijaçyã'j yuune'ga jĩni's.
62 Txajũ' Pedro' eka kasehçxa seena' wala nxusna ũ'nek.
Jesusa's npeevxysxikani
(Mt 26.67-68; Mr 14.65)
63 Txajũ' Jesus ũphwe'sxte yupna ũssa yu' weeçx we'wenatx pãpã'.
64 Sa' yafxtxi tudçxatx dxi'pte uka'ka' na'jĩna:
—Aan jiyune'ga kim uka'kaçtewa.
65 Txã'jĩnatx wala kuh jwed we'wena wẽesxu'.
Judiu nthẽ'jsawe'sx tasxte Jesusa's kuutxa'jni
(Mt 26.59-66; Mr 14.55-64; Jn 18.19-24)
66 Sa' khikhyna sẽjẽçte', judiu nthẽ'jsa sacerdotewe'sx, Dxus leya's kaapiya'jsa txãawe'sx pkhaakheçxatx Jesusa's kxtee kuutxa'jçxa pẽjx:
67 —Mpeeta'sx, idxa' ¿Kristo dxihgá'? jĩte', Jesus pasçxa':
—Txã'wẽíith jĩtewa, isane' we'we' sũhmeene'kwe.
68 Sa' i'kwe'sxtxi adx paapẽjxwaçwa, pasya'wameei'kwe. Sa' adxa's txhweteya'wameei'kwe.
69 Nawa ãçxhũyã'ja' Dxus Nçxi'k Nasa Yuusá' Dxus ĩtxĩsa pukate kaçxya' u'jwena jĩk.
70 Aça' jxukaysa na'wẽtx pẽjx:
—Na'jĩ'g na', idxa' Dxus Nçxi'kthu jĩne'ga jĩte', Jesus pasçxa':
—Txã'wẽíith. I'kwe'sxa' isa i'kwe we'we' jĩk.
71 Aça' txãawe'sx we'weçxa':
—¿Kĩjxa' jwee vxite testigo peejiikxtha'w? Kwe'sx thũ'wẽju yuutha'w txajx we'weni's wẽsẽ'j jĩ'tx.