5
Wedx ukhete wedx seena' wala khẽeni
(Mt 4.18-22; Mr 1.16-20)
1 Teeçx ente' Jesusa' Genesaret ĩkh pukate ũste', nasa' kxtee zuuna'çxáatx utana pa'j Dxus yuwe's wẽsẽ'j wẽeçxa.
2 Txajũ' Jesusa' e'z barko ĩkh pukasu namu ji'phmée ũstek uy, namu wedx-uwesaawe'sx yu' kasehçxa, wedx ukhetx thethnatx ũs yu'.
3 Aça' Jesusa' teeçx barko Simon jĩite khẽeçxa', yu'te wejkuẽ u'jçxak, kxtee kaçxçxa, Dxus yuwe's pta'sx nasatx.
4 Sa' Dxus yuwe's pta'sxna jxã'jçxa', Simona's na'jĩk:
—Barko's ĩkh wala pxãhte pa'j jxũna u'jçxa txkhẽe ukhe's makh wedx uweya' jĩte',
5 Simon pasçxa':
—Kwe'sxa' teeçx kus utatha'w mjĩina pe'te, nawa teeçx wedxçxáa yuhwa uwemeetha'w. Nawa iidx jxkaahni's kxtey yu'nja jĩçxa',
6 kxtey yuute', wedx wala kuh khẽetx, aça' ukhe' suteeçku yu'.
7 Txajũ' vxite barkote ũssatx pu'çxya' yuukahn kuseju pa'yatx. Aça' txãawe'sxwa kũhçxa', kasxisx pu'çxçxa txãawe'sx jĩitewa ãsxtxi. Nawa e'z barkotey utaçxa dujuaate', ĩkh dxiikhẽ khẽeya'watx yu'.
8 Txã'wẽ yuute', Simon Pedro' Jesus tasxte peejxũkweçxa na'jĩk:
—Adxa' pkalsath aça' adx tasxu mtxutée jĩk.
9 Kxaazkuẽe wedx khẽete', Simon Pedro' wala ũukhçxak txã'jĩ', aça' nasa kxtee ũssawa txã'wẽytxi ũukh.
10 Zebedeo nçxi'kwe'sx Jakobo Juan txãawe'sxa' Simon yakh wedx uwe pu'çxna u'jusatx yu' sa' txãawe'sxwa txã'wẽytxi wala ũukh. Nawa Jesusa' Simona's na'jĩk:
—Ũukhnu, ãçxhũyã'ja' peena yu' wedx uwen u'jumée nasatx Dxus jĩi pkhakhsa yuune'ga jĩte',
11 barkotx ĩkh pukatee jxuka nvxihtna'wa Jesus yakh u'jtx.
Teeçx piçthẽ'j wã'jy weete ãçã'sa's Jesus nuykatxhini
(Mt 8.1-4; Mr 1.40-45)
12 Jesusa' teeçx çxhabte ũste', teeçx piçthẽ'j wã'jy wee seena' kazx ji'phsak pa'j. Sa' Jesusa's uyna'wa, kĩiçhuçxa peejxũkwek na'jĩna:
—Adxa's nuykatxhiwá'ga ahçemeeçxa' jĩte',
13 Jesusa' kuseju jxa'dxna'wa, na'jĩk:
—Ahçeme'nja, naa pa'ga katxhiçxa mneeyũu jĩçpkaçxha', txãa wã'jy weeju katxhiçxak neeyũu.
14 Aça' Jesusa' na'wẽk jxkaah:
—Maa yuhtxwa pta'sxmeene'ga, naasáa sacerdoteçxá's iidx kakwe's txwesya' me'j. Sa' txãa weeju katxhipa'ga Dxusna peesune'ga Moises ma'wẽga jxkaah txã'wẽy, kxah nasa jxukaysa jiyutxna idx ew katxhiçxa neeyũutewa jĩnak jxkaah.
15 Tuuthe'khameetewa, nasa' jweeíiçxáatx Jesus ew yũuni's tuuthe'je'. Aça' wẽsẽ'jya' wala pkhaakhe'tx, ãçã'satxwa kĩh weejuwa nuykatxhikahn.
16 Nawa Jesusa' nasa u'pnimeesu u'jçxak, Dxus yakh puutx we'we'.
Ẽsẽya' ãjasame's Jesus nuykatxhini
(Mt 9.1-8; Mr 2.1-12)
17 Jesusa' teeçx çxhabte Dxus yuwe's pta'sxna ũste', kxteea' fxariseowe'sx vxite' Dxus leya's kaapiya'jsawe'sxwa Galileaju Judeaju vxite' Jerusalenu txajũwe'sx pa'jçxatx kxsũ kaçxçxa u'pu'. Aça' Dxus pu'çxni yakha' Jesusa' ãçã'satxwa nuykatxhi'k.
18 Txajũ' ẽsẽya' ãjãsameea's yakhçxa nuypa'jtx. Sa' Jesus tasxte pa'j nuykũh wẽetx.
19 Nawa nasa wala ũste', u'kaya' ãjãmeeçxa yat ẽete tejkaçxatx txkhẽ nuykĩh ãçã'sa's Jesus ũsnikhẽ.
20 Txajũ' ãçã'sa's yakhsawe'sxa' Jesusa' nuykatxhiyujuna sũhni's jiyuçxa', ãçã'sa's na'jĩk:
—Iidx pkala' peltunãyni yã'jtx neeyũu jĩte',
21 Dxus leya's kaapiya'jsawe'sx vxite' fxariseowe'sxa' ũuste na'wẽtx yajkxna u'pu': Naa piçthẽ'ja' ¿kiimna saga Dxusa's iiweeçx we'wé'? Dxus yuuçxáa pkaltxi peltunãyya' ãjawa'jsa', aça' jweeju yu' ¿kimçxá' peltunãyya' ãjãma'k? sũjũ'tx.
22 Aça' Jesusa' txãawe'sx ũuste yaakxni's jiyuçxa' na'jĩk:
23 —¿Kĩh yũutekwe txã'wẽ yaakí'? ¿Maa thẽymeesakx? Iidx pkala' peltunãyni yã'jtx neeyũu ¿jĩniá'? Meeçxa': Kiiteçxa me'j ¿jĩniá'?
24 Txã'wẽ thẽysatewa Dxus Nçxi'k Nasa Yuusá' naa kiwete pkaltxi peltunãyya' ãjãwa'jsa' naa pa'ga kaajiyu'jya'wath ãçxha' jĩçxa', txajũ' txãa ẽsẽya' ãjãsameea's we'wek:
—Idxa'sthu we'we': Kiiteçxa iidx deeni's tu'sçxa yatna me'j jĩte',
25 dudtey txãa ãçã'sa' kiitena' txajx deeni's tu'sçxa yatna u'kh, Dxusna weçxana tuuthe'jna.
26 Jxukaysa kxtee ũssa' wala kuh yajkxna we'wena, Dxusçxáanatx weçxana tuuthe'je' sa' txã'wẽ ũukhnawa na'jĩ'tx:
—Bagaçx yuhwa txã'wẽ yũunisa yu'sa' iiuymeetha'w jĩ'tx.
Mateo's Jesus pa'yani
(Mt 9.9-13; Mr 2.13-17)
27 Txãa skhẽwa', Jesusa' kasehçxa', gobierno jĩi vxyu pkhakhsa Levxi yaasesa's vxyu pkhakhnite kaçxçxa u'pte uyçxa':
—Adx yakh myuh jĩte',
28 Levxia' kiitena'wa kĩhnawa jxuka nvxihtçxa Jesus yakh u'kh.
29 Txãa e'su', Levxia' txajx yatte fxiesta wala ewsa vxitku Jesusa's pi'kxçxa'. Aça' kxte' gobierno jĩi vxyu pkhakhsawe'sx wala kuhsa vxite' nasa ma'wẽsawa Jesus yakh ih mesate kaçxtxi.
30 Aça' fxariseowe'sx vxite' ley kaapiya'jsawe'sxa' Jesus yakh u'jusawe'sxtxi' na'wẽtx açewe'we:
—I'kwe'sxa' ¿ma'wẽtekwe txã'wẽ gobierno jĩi vxyu pkhakhsawe'sx yakh vxite' pkalsawe'sx yakh ũ'wé'? jĩte',
31 Jesus pasçxa':
—Yu'çe'jsa's jxpeejxmeeta' aka ji'phmée wẽt ũssa', naasáa ãçã'sa yuuçxáa yu'çe'jsa's jxpeejxta'.
32 Adxa' nasa ewsatx pakweya' kĩhmeeth, naasáa pkalsatx pakweya'çxáath kĩh, kxah ewmée yũuna fxi'zeni's nvxihtçxa Dxus tasxte sxaweduutxna jĩk.
Yũunani's Jesusa's pẽyni
(Mt 9.14-17; Mr 2.18-22)
33 Txajũ' txãawe'sxa' Jesusa's na'wẽtx paapẽjx:
—¿Ma'wẽçxata Juan yakh u'jusa vxite' fxariseowe'sx yakh u'jusa txãawe'sxa' tahtatey yũunaana Dxus yakh puutx we'wena fxi'ze'? Naapkaçxha' idx yakh u'jusawe'sx yu' yũunameetx fxi'ze' jĩte',
34 Jesus pasçxa':
—I'kwe'sxa' ¿ptamu en fxiestate', pi'kxnisatxi' kaayũuna'jya' ãjãma'kwe, novxio txãawe'sx yakh nee ũsiite'?
35 Nawa novxio' txãawe'sx tasxu txuteewa'j en pa'jana, txajũ isa yũunaatxna jĩçxa',
36 naa ejemplo's kaaja'da'jnak pta'sx:
—Ropa ĩisx suteniite, tela u'sesa yakh ya'pã'khe'çme'. Txã'wẽme' tela u'sesa' jweeíiçxáak sude' ĩisxsa's.
37 Sa' txã'wẽy beka u'se aahnisa's slun ĩisxsate ya'awu'çme'. Txã'wẽme' beka u'sesa' slun ĩisxsa's sude'k, aça' beka yakh slun yakh e'zíi vxitu'tx.
38 Txãa pa'ga beka u'sesa's slun u'sesate awwa'ja'. Txã'wẽ yu', maa yuhwa vxitumeetxna.
39 Aça' maawa beka jxaawniisa's tudxsa', beka u'sesa's yu' tudxya' wa'lu'k, jxaawniisaçxáa jxthaakwe ewa' jĩçxa.